На бура КIямашатусса ХIасанхIусайнова Мухлисат Гъазил душ. На нава хъунна бава хьуну бура. Дяъви къуртал хьуну 70 шин хьунни, амма тания бивсса баларду уттигу лялиян буван бюхълай бакъар.
Дяъви байбишиннинма жул кулпат (нинугу, жу, шама уссугу, нагу) Узбакисттаннаву Ташккантрай ялапар хъанай буссияв. Ттул ппу къалайчи ия. Байбивхьуна дяъви, 1942 шинал ппу дяъвилийн увцуна. Ттул ппу Амаев Гъази Аьмал арс увну ур 1906 шинал КIямашав хъудугьул кулпатраву. Буттал къалайчинал пишагу лавхьхьуну, щаргу дурцуну, оьрчIругу бувну, Ташккантлив мина дирхьуну ялапар хъанай бивкIун бур.
Дяъвилияту буттал бувагу ца чагъар бувкIссар. Мунийгу чивчуну бур: «Жу Сталинградуллал чулухунмай бачин бувну буру. Ттул чагъар къабувкIун, чагъар гьан мабару. Бюхълай бухьурчан, нава чичинна чагъар. Зувагу Лаккуйн шаппайн насияра», — тIий. 1943 шинал ттул шамагу уссу ливтIуна: ца 4 шинаву (Ташккантлив увччуну уссар), ца 7 шинаву, цагу шин хьуну. Оьрмулул 32 шинаву нинугу диркIуну, на навалу ливчIунав. Буттаягу ххишала чагъар къабувкIуна. Нагу ттула ниттилссил хъунма бувунав.
Щалва оьрмугу ттул ттула аьпалухьхьун лавгсса ласнащал Илияслущал колхозраву зий лавгунни. Циксса бакъахьунссар, на кунма нитти-буттацIа, уссурваврацIа хьусса дяъвилул ятинтал щалагу СССР-данул агьалинаву.
Мяйжаннугу, га хъуннасса байран дур Ххувшаву ларсъсса, ххарисса, 70 шин дяъви бакъа ларгсса, амма цукун хъамабитави, «без вести пропал» тIий, дяъвилия зана къавхьусса ппу, 3 арснацIагу хьуну, 32 шинаву дунияллия ларгсса нину. Мукунсса дяъвилул баларду циксса шинну гьарчангу кьюлтI учин бюхълай бакъар.
Я Аллагь, ххишала тукунсса бала жула ялун къабияннав.
Мухлисат ХIасанхIусайнова
