КЬУРБАННУЛ ДУШ МАММАЕВА СИЯСАТ
ЦIуцIишанийгу лахъи лавгун, оьрмулул 81 шинаву аьпалу­хьхьун лавгунни чIявучин бусравсса, хIакьсса лакку хъамитайпа, захIматрал ветеран, Ккулатусса Маммаева Сиясат Кьурбаннул душ.

Бувну бур Сиясат 1934 шинал Кьурбаннул ва Аминатлул кулпат­раву мукьилчинсса оьрчIну. Сиясатлун 3 барз хьусса чIумал, ппугу ивкIуну, 4 мюрщисса оьрчI ябуллан багьну бур ниттин Аминатлун. Канихьсса чIивисса Сиясатгу бувцуну, нину ларгун дур дояркашиву дуллан архсса Щухьлалу тIисса фермалийн, Гьарун Сяидовлул цIанийсса колхозраву. Оьрмулул 14 шинаву Сиясатгу байбивхьуну бур вара фермалий дояркашиву дуллай, чIярусса шиннардий зий, лайкь хьуну бур хьхьичIунсса доярка тIисса цIанин, ларсун дур хIурматрал грамотартту ва арцуйнусса бахшишру.
Сиясат бия дакI-аьмал уздан­сса, иминсса, чIахху-чIарахнащал бавкьусса хъамитайпа. Ванил хъуни бувссар 5 душгу, 2 оьрчIгу. Хъунигу бувну, цалва-цалва оьрмулул ххуллийн бивчуссар.
Сиясатлул бивкIулул кьур­чIишиву кIидачIлай, дакIнийх­тунусса жижара буллай буру ванил уссихь, оьрчIахь, душваврахь, цинявппагу гъан-маччаминнахь.
Цил бунагьирттал аьпа баннав, рухI хъинний дишиннав, алжаннул ххари баннав. Амин.
Ккуллал
ва 2-мур ЦIувкIуллал жямат

———————————

ХIАСАННУЛ ДУШ ШТАНЧАЕВА ШАМАЙ
Июнь зурул 22-нний, оьрмулул 78 шинаву, личIину къашавайгу къавхьуну, жуятува личIи хьунни дакI-аьмал ххуйсса, дугърисса зунттал хъамитайпа ХIасаннул душ Штанчаева Шамай.
Шамай бувну бур Ккуллал райондалий Хъусрал-ЧIарттал шяраву 1937 шинал, ЧIанкIуев ХIасаннул ва ЯхIияева Мисидул кулпатраву. 1944 шинал бизан бувну бур ЦIуссалакрал райондалийн, Чапаево шяравун. Хасавюртлив интернатрай 10 классгу бувккуну, Москавлив экономикалул ва статистикалул институт къуртал байхту, МахIачкъалалив Статуправлениялийн зун тIайла бувккун бур.
Шамай хъунмасса хIаллай «Авиаагрегат» заводрай хъунмур экономистну зий бивкIссар. 1993 шинал шиччава пенсиялийнгу бувккун бур. Лажин кIялану хIукуматрал даврий бувсса захIматрахлу ва лайкь хьуну бур мадарасса медаллан ва ордендалун.
Шамайл кьурчIисса бивкIу­лул жижара буллай буру ванил арсурваврахь Рашидлухь, Казимлухь, цинявппагу гъан-маччаминнахь. Ванин бакъамур оьрму оьрчIан, оьрчIал оьрчIан булуннав. РухI алжаннул ххари даннав.
ГьунчIукьатIрал
ва Чапаевкаллал жямат

——————————————

КIуллагу дакъа 2 шин ларгунни Дагъусттаннал Автодорданул зузалтрачIа лавайсса хIурматрай, 35 шинай плановый отделданул инженер-экономистну зий бивкIсса, ЧукIуннал шяравасса Муртазялиева Жамисатлул душ Гулмира лавмартсса цIуцIаврил жуяту личIи бувну.
Гулмирал дакI-аьмалдануя, хIалимшиврия буслайнма бикIай ванищал зий бивкIми.
Къабигьану бухьунссар Гулмирал ниттин ва гъан-маччаминнан ва кьурчIисса бивкIу лялиян буван. Аллагьнал ссавур дулуннав.
Ванин бакъамур душнин булуннав. Алжаннул ххари баннав.
АрхIал зий бивкIсса дустал, уртакьтал