Гъинтнил каникуллал хьхьичIсса Дагъусттаннал парламентрал 52-мур сессия хьунни ХIукуматрал къатраву ва зурул 25-нний. Сессиялий гьуртту хьунни Дагъусттаннал БакIчи, Халкьуннал Мажлисрал депутатътал, ХIукуматрал члентал, федерал ва республикалул органнал каялувчитал, политикийсса партиярттал ва жяматийсса организациярттал вакилтал, СМИ-рду.

ХI. Аьдилов
Парламентрал каникуллу дайдишин хьхьичI депутатътуран багьунни ххалдигьин сайки 25 закондалул проект. ЛяличIисса къулагъас дан тIий бур бюджетирттал иширттах. ДР-лул финансир­ттал министр Аьли Исламовлул бувсунни цукунсса дахханашивуртту дан аьркин­ссарив бюджетрал закондалуву.
Дагъусттаннал депутатътурал чIурду буллунни «Об обеспечении тишины и покоя граждан» на территории Республики Дагестан» тIисса закондалул проект цалчин дурккуну кьамул даврихлу. Муния ихтилат бунни ДР-лул строительствалул ва ЖКХ-лул министр Муса Мусаевлул. Ганал мукъурттийн бувну, гужсса чIуний музыкалух, балайрдах вичIидихьлахьаву, пиротехника ишла дуллалаву, къатраву ремонт дуллалаврицIунсса гужсса чIурду хIасул буллалаву ппив хъанай дур гьарца кIанай. Ганал бувсунни маркIачIанмай 23 ссятрая, кIюрххил 7 ссят хьуннин паракьатшиву дикIан аьркиншиву, АьФ-лул Жилищный кодексрайн бувну.
Дагъусттаннал БакIчи Рамазан Аьб­дуллатIиповлул сессиялий баян бунни МахIачкъалаллал БакIчинал кIанайма МахIаммад Сулаймановлуща ххишала къабюхъайшиву шагьрулул каялувчину ацIан. «Ганал дяйкьин дунни Республикалул каялувчиналгу, аьмну ХIукуматралгу цайнна дирхьусса вихшала», — увкунни Региондалул каялувчинал.
Дагъусттаннал парламентрал спикер Хизри Шихсяидовлул мукъурттийн бувну, МахIачкъалалив 148 къатта буллай бур проектно-сметный документру бакъа ва хасъсса экспертизартту дакъа, цимилагу ккаккан бувну бивкIссар Родопуллал бульварданий ва ЖКХ-равусса диялдакъашивурттайн, амма ми духлаган дурну дакъар.
Депутатътурал ва Республикалул бакIчинал ккаккан бунни сентябрьданийннин ми диялдакъашивуртту духлаган дуван.