ЛичIлулну бикIияра вай цIуцIавурттая, вай бигьану лахъайссар цанная цаннайн. Гъинттул хъинну ччяни инсан загьрулул шайссар (отравить), мунияту архну бикIияра кIичIираваллал микIитIанханттая (забегаловка).
ЛичIлулну бикIияра майонез ишла дурсса салатирттая, крем хIаласса пироженыйрдая. Бигьалаглагисса кIанттурдай мадукари шакъархьсса хьхьирил продукты. Вай продуктылул вардиш дакъасса организмалуйн кьянкьану гьужум бантIиссар. Гъинттул чIумал, чурх загьрулул баврицIун, бюхъайссар ххюрхху хьун кунная куннайн лахъайсса цIуцIавурттугу.
1. Дизентерия. Халкьуннаву ва цIуцIаврийн учай «чапалсса каруннил цIуцIаву» куну. Яла хъунмур лишан ва цIуцIаврил оь хIаласса лякьлулссар.
Цукунни буруччин аьркинсса? Гьантлун 5-6-лла кару шюшлан аьркинссар, хаснува дукра дукан хьхьичI. Ахъулсса, ахънилсса дукан хьхьичI, бананная, мандаринная тIайла хьуну, шюшлан аьркинссар чара бакъа.
2. Энтеровирусная инфекция, кутIану учин, хъунххюттулгу цIумулул грипп. Ва цIуцIаврил лишанну: инсан хIал чанну, кIарчIа тIий, кIиришиву лархъун, лякьлувун къюву дуллай, лякьа хьюму ларсун икIайссар.
Цукунни уруччинтIисса? Агарда зу бучIлай бухьурча бярув, неххавун, хьхьиривун, личIлулну бикIияра кьацIливун щин къагьан. ХIачIлачIияра щин фабричный упаковкалийсса. ЛичIлулну бикIияра «Родниковый» щиная. Агарда гайннуцIа кьанкь, чIанулун багьну луцI бухьурча, макь кунна марцIсса цIай бусса дакъахьурча – махIачIару мукунсса щин.
3.Сальмонеллез.
Дайдишайссар дакI ларай най, кIарчIа тIий. Лякьа хьюму ласайссар, ми цирдагу дикIайссар щюллисса рангирал, оьнцIул ххаллу (слизь) хIаласса, чурххал кIиришиву гьаз шайссар.
Цукунни буруччин аьркинсса? АьнакIал ккунукру ххуйну шашияра, дагъ бара ягу канакияра ххюнкIлул ккунукру, шиву сальмонелла дакъассар. Ххуйну шашияра ягу дагъ дувара аьнакIул дикI. Ххуйну щаралахъияра накI, дякъин дурну яла хIачIияра.
4.Столбняк.
Ва цIуцIаву дайссар аьрщаравусса бактериярдал. Вай бактериярду инсаннал бурчу кьувкьусса кIанттурдайн багьувкун шайсса бур загьру, вайннул бювчIунбишай спазм дайссар. Бюхъайссар къюкI дацIан дан, ягу гьутрурду отказ хьун бан.
Цукунни буруччин аьркинсса? ЛичIлулну бикIияра зуйра чIирисса дунугу ххарци къахьун. ОьрчIай, роликирттай бигьлан нанийни, бакIрая ччаннайн дияннин янна лаххарча хъинссар. Багьну щаву диярчагума, янналул чанну дакъа инфекция хьун къадитантIиссар. Агарда щаву хьурча, чIирисса ххарци дунугу, травмпунктрайн лавгун прививка дан аьркинссар. Столбнякрал прививка 10 шинай цал дулларча хъинссар.
Р.S. Травмпункт чIарав бакъаминнансса маслихIат – гара цIана перекись водородрай шюшияра щаву, мигу дакъахьурча, шюшияра щаву марцIсса щинай ссахIвангу бувккун. Шиккува учин, перекись водорода хъанахъиссар гьарцаннал аптечкалуву чара бакъа дикIан аьркинсса хьюмушивуну. ХIадурнасса раствор дахлай дур ччимур аптекалуву.
ЦIуллуну битаннав.
Т. ХIажиева
