МАХIАММАДЛУЛ АРС РАБАДАН ПАРХАНОВ
Июньдалул 30-нний, зумадугьул зуруй, тамансса хIаллай инжитнугу ивкIун, аьпалувух ивхьунни 1935 шинал Ахъушиял райондалийсса Сагниял шяраву уварчагу, жагьилсса, агьилсса оьрму ГьунчIукьатIув лавгсса,
миналул инсаннаяр лавайсса акъа шяраваллил агьулданун ялавайсса къаивкIсса, цала шяравучунаяр хьхьичIунсса инсаннан ккалли уллай ивкIсса насихIатчи, маслихIатчи, мюрщиминнал Рабадан-дацци, хъуниминнал хIурматлув Парханов Рабадан МахIаммадлул арс.
Рабадан 1943 шинал цалва нитти-буттащал, уссу-ссурвавращал ивзун ур ГьунчIукьатIрал шяравун. Тания шихуннайгу кIа шяравалу хIисав дувайва буттал миналун, бувуна кулпат ПатIиматгу, кIиччара арх дакъасса КIямашрал шяраватусса. Рабадан кIирагу шяраваллин акъагу кIулссагу, бусравссагу икIайва лагма щархъиян. Хъинну захIмат ххирасса, тачIав даврия махъунай къашайсса, янин ккаркмур канил дуллалисса усттар ия жул Рабадан-дацци. Аьпалувухгу ивхьунни Рамадан-Рамазан зуруй, алжаннул къапурду тIивтIуна хIадурсса зуруй. Алжаннул ххари аннав, рухI кIукIлуний хьуннав.
Рабадан зий икIайва ризкьичину, яттил бригадирну, оьллал фермалул каялувчину. Чув, ци даврий зурчагу, захIмат ххирану, лажин кIялану, барчаллагьран лайкьну дувайва гьарцагу даву. Мунияту увчIуну ия чIярусса шиннардий шяраваллил советрал депутатну, колхозрал правлениялул членну. Хъуннасса гьурттушинна дувайва жяматравусса давурттаву. Рабадан ия захIматрал ветеран, ванан дуллуну дия чIярусса медаллу, бахшишру, грамотартту оьрмулуву бивхьусса захIматрахлу. Цува куна захIмат ххирану тарбия бувну, цалва-цалва оьрмулул ххуллурдайн бивчунни кIия арс, минная бивзминнан ия ххаллилсса хъунамямма.
Рабадан аьпалувух ишаврил кьурчIишивугу кIидачIлай, жижара буллай буру оьрмулухун аьзизну бивкIсса кулпат ПатIиматлухь, арсру Мухтардухь, Тажуттиннухь, вайннал хъаннихь, оьрчIал оьрчIахь, ссихь, ссурваврал оьрчIахь, уссил оьрчIахь. Ххишала акъа бусравну ивкIсса куявнал Рабаданнул жижара буллай буру кулпат ПатIиматлул щалвагу ляхъиндалухь. Гьав нурданул дуцIиннав, алжаннул ххари аннав. Амин.
ГьунчIукьатIрал, КIямашрал, Сагниял жямат
—————————————————————
АЬЛИЛЛУЛ ДУШ ОЬМАЕВА ШАВЛУХЪ
Оьрмулул 87 шинаву аьпалухьхьун лавгунни Лаккуй цIа дурксса Къистилихъал тухумраясса инсан, ас-намусрал бувччусса, дакI-аьмал авадансса хъамитайпа, Оьмаева Шавлухъ.
Шавлухъ бувссар 1928 шинал Ккуллал райондалийсса Къичурлухиял шяраву Аьлиллул ва Къистилихъал ХIабибатлул кулпатраву, 5 арс ва 3 душ бусса къушлий.
Арсурвавраву хъуна-хъунама Аьлил, гьарца чулуха оьвхъусса оьрчI, ивкIуссия оьрмулул 18 шинаву. КIия уссу ялагу лавгссия дунияллия, 5-6 шин къархьуну. Ниттий ХIабибатлуй бикIайва цIими хъанай. Бияча дунияллий яхI бусса хъамитайпа. Шавлухъ душурвараву хъунма-хъунмуръя. Оьрмулул аргъираву, 30 шин хьуну-къархьуну, ва цуппагу къашавай хьуну бивкIссар, бивчIай-буккай тIий. Ниттиуссурвал ялув бавцIуну, га чIумал лякъин жапасса даруртту тIалав бувну, Аллагьналгу цIимилийну Шавлухъ хъин хьуссия.
Лайлатул кьадри хьусса инсан буссия Шавлухъ – биялсса бия ванивугу ниттил яхIлил ва ххуйшиврул бутIа. Хъинну ччаву дусса бия уссурссуннах. Хаснува мунин чIалачIин къадикIайва чIивима уссу Аьлиха. «Ва ттуйн ниттил аманат увссар», — тIийнма бикIайссия.
Мубараксса, бусравсса Рамазан зуруй лавгунни аьпалухьхьун жул хIал бавкьусса, хIалимсса, аьдилсса Шавлухъ. Вил бунагьирттал аьпа баннав, рухI рахIатний дишиннав! Гьав нурданул дуцIиннав!
Жяматрал, мачча-гъаннал чулухату Амирханов Ися
