Ккуллал райондалийгу, щалвагу Аьрасатнаву кунма, вай гьантрай бивщунни Махъва-махъсса гюнгутIи. АцIния цара шинал мутталий цачIу бивкIсса цалва дустал, кIулшиврул кIулли дуллай бивкIсса учительтал цакуну кьабивтун, цIусса ххуллийн буклай, цамур оьрмулувун бухлай бур оьрчIру. Гьай-гьай, цуксса кьюлтI дулларчагу, вайннал иттав макь ххалхъанай дур.
ХIажимурад ХIусайнов
Ккуллал райондалул КIулшиву дулаврил управлениялул бакIчинал хъиривчу Оьмариев Жамалуттиннул бувсунни ттухь ва шинал 11 ва 9 класс къуртал буллалисса оьрчIая:
— Гьашину Ккуллал райондалул школардай 11 класс къуртал буллай ур 90 оьрчI, 9 класс къуртал буллай ур 99 оьрчI. ЕГЭ дуллалиминнал сияхI дахханасса дур. Вай 11 класс къуртал буллалисса оьрчIава 2 оьрчI ур 11-мур классравун шагьрулия Лаккуйн дуклан увкIсса. Мунийн бувну вайннал ЕГЭ дулунтIиссар МахIачкъалалив. Укунсса хIукму бунни КIулшиву дулаврил министерствалул. Вай бакъассагу, хьхьичIсса шиннардий школа къуртал бувсса 9 оьрчIгу ур ЕГЭ дуллалисса. Вайннан, цалва хьхьичIава лавсъсса баллу ххи буван, экзаменну цIунилгу дулун ччай бур. Ва бучIисса ишри. Майрал 25-нний Аьрасатнаву ЕГЭ дулун ккаккан бувну буну, гьашину Махъра-махъсса занг рирщуссар майрал 22-23-нний.
Цалчин дулун ккаккан дурсса ЕГЭ дия географиялул ва литературалул. Ккуллал райондалий вай экзаменну дулун ччисса оьрчIру чансса бушиврийн бувну, ва кьини жулва оьрчIру кIицI дурсса экзаменну дулун лавгссар Гергебиллайн. Вайми ЕГЭ-ду дуллантIиссар Ккуллал шяравусса 2-мур школалий (оьрус маз, математика-базовая, математика-профильная, информатика, биология, история, обществознание, химия). 9-мур класс къуртал буллалисса оьрчIал дулунтIиссар оьрус мазрал ва математикалул ГИА-рду.
