Январьданул 27-нний Аьрасатнал Президентнал БакIссавнил Ккавкказнавусса федерал округрал вакил Сергей Меликовлул дунни жулла республикалул исполнительный властьрал органнал ва федерал органнал Дагъусттаннайсса структурардал каялувчитуращалсса совещание.

Совещание тIитIлай, Меликовлул бувсунни укун гьарзасса къуллугъчитал гьурттусса совещание цалчин хъанахъишиву. Ганал увкусса куццуй, укунсса формат аьркинссар региондалийсса тагьар цукунсса дуссарив, захIматшивуртту ссаву дуссарив, къалмакъаллал кIанттурду цуми буссарив кIул бан.
«Зувату чIявуми республикалий зий бур чIярусса шиннардий, мунияту ттун аьркинну бур зуяту зура дуллалисса давурттал хIакъиравусса хавар ласун. Ттул хъисвагу щак бакъар зун тамансса затру кIулну бикIаншиврий, ттунгу, полпреднал щалва аппаратрангу мюнпатсса. Миннуя мюнпат хьунссия Респуб­ликалул БакIчинангу, Дагъусттаннал ХIукуматрангу аьркинсса хIукмурду кьамул бан ва давуртту дуван.
Хъиривмур ша хьун аьркинссар жулва дянивсса, яни региондалул ва федерал властьрал дянивсса хIала-гьурттушиврул даража лавай баву. Цанчирча жулва хьхьичIсса чIявусса задачартту личIи-личIину щаллу буллан къашайссар, мукунма къашайссар цумур-бунугу таксса цуппалусса паччахIлугърал органдалуща щаллу буван цавагу захIматсса масъала. Укунасса инсаннан жува чIалачIиссару АьФ-лул полномочиярттащалсса власть кунма. ЧIяву чIумал властьрал личIи-личIисса органну цащалва цивппа бавкьуну зий бакъахьурча, гьарца орган личIину зий хIарачат булларчагу, цичIав щаллу къашай», — увкунни полпреднал.
Сергей Меликовлул федерал органнал Дагъусттаннайсса идарарттал каялувчитурай дюъ дирхьунни «Ттул хъунама цама уссар» тIисса заявленияртту къадуллан аьркиншиврий.
«Агарда жунна жулла давриву хьхьичIуннайшиву хьуну ччарча, жува аьр­кинссару зун аьмсса командалуву. Дагъусттаннал аьрщарай зу зузиссару зул кумаграх, зул давурттах мюхтажсса инсантурал мурадру щаллу бавриха. Жулва агьамми мурадру хъанахъиссар региондалий социал-политикийсса цалий дарцIусса тагьар цIакь даву, инсантал преступлениярттая буруччаву, оьрмулул даража гьаз баву, БакIссавнил Ккавкказнаву экономика лядуккан даврил бущи анавар буккан баву. Ведомстварттал принципру миннуяргу лахъсса бикIан бю­хъайссар», — увкунни полпреднал. Сергей Меликовлул увкусса куццуй, хIакьину къааьркин­ссар паракьатну щягубивкIун, Аьрасатнал хIакъиравусса санкциярду дацIан даннин, Украиннаву къалмакъал цийнура цурда лещаннин, лихъачалтрал мугьали бацIаннин, навтлил багьри цалийн бучIаннин ялугьлан. Гьарцама – республикалулгу, федерал даражалийгу – зун аьркинссар цалий бацIаву цIакь давриха, инсантурал багьу-бизу ххуй бавриха.
«Тагьар лиян дуллалисса гужирдал БакIссавнил Ккав­кказ, хаснува Дагъусттан, ккалли буллай бур тагьар оьлукъин дан, гьалакIу дан къулайсса плацдармалун. Хъинну къалайкьсса, баявурсса иширан ккалли бантIиссар жува, ми иширттаву хIала-гьурттуну лякъирча рес­публикалий федерал властьрал ккаккан бувми, цалва буржру дакI марцIну биттур къабуллалими.
Гьай-гьай, жуватува гьарцаннаща шайссар федерал центрданул кумаграйн чул бищун, амма жува чул бищун аьркинссар жулва гужирдайн, жулла каширдайн, жулва пишакартурайн. Цуксса хIайпнугу, на зухь дюъ дихьлай ура, къуллугъирттай битайни лулттурасри ласласи­сса ишру хъанахъисса сигналлу дукIлай душиврий.
Агана щил-бунугу хIакьину коррупциялущалсса талатаву – му паччахIлугърал пиарданул элементри тIисса пикри бухьурча, на зу вих буллай ура, цавагу мукунсса иш полпреднал ва гужирдал структурардал къулагъасрава къабукканшиврий», — увкунни Сергей Меликовлул.
Мува масъала яла ххалбивгьунни нузру аьнт дурсса тагьардануву.