Вай гьантрай ЦIуссалакрал райондалий хьунни Ниттихъал кьинилун хас бувсса шадлугърал мажлис. Байрандалун лайкьну чIюлу бувсса къатравун, авадансса ссупралухун оьвкуну бия райондалул цинярдагу щархъавасса хъаннийн. Ми ва чаннасса ва тIааьнсса ниттихъал байрандалущал барча бунни ЦIуссалакрал райондалул бакIчи ХIажи Айдиевлул.
— Ниттихъал кьини дунияллий яла агьаммур байрандалун ккалли дан бучIисса байранни. Ниттиятур оьрму байбихьлахьисса, ниттихъайри дуниял дарцIусса, ниттилли щащайсса цIакьсса кулпатрал кюругу. Дазу-зума дакъассар ниттил ссавурданул, мунил дакIнива нанисса ччаврил ва аякьалул. Ниттил ччаврилли жувунма гужгу, гьавасгу бутлатисса, хъинмунийнсса умуд ва вихшалагу дишин буллалисса.
ДакIнийхтуну чIа тIий ура циняв ниттихъан цIуллушиву, кулпатирттаву нахIу-хIалимшиву. Зул оьрмулуву байранну гьарза хьуннав, оьрчIал, кулпатирттал ххари буллай личIаннав бусса оьрмулий. Бартлаганнав зул дакIнийцири мурадру, — увкунни ХIажи Айдиевлул.
Ниттихъахь дакIру ххари дансса, тIааьнсса махъру увкунни ДР-лул Халкьуннал Мажлисрал депутат Зайнуллагь Мирзоевлул, райондалул хъунаманал хъиривчу Ися Чергизбиевлул, ЦСОН-далул директор Малика Жамхатовал.
Ниттихъан хас бувсса балайрду увкунни Культуралул къатлул зузалтрал ва дуклаки оьрчIал. Циняв шиккун бувкIсса ниттихъан дуллунни багьлул ххирасса бахшишру ва тIутIив.
