Аьдатравун багьсса куццуй, гьарица шинал ахирданий оьрмулуву хьусса дахханашивурттая, асар хьусса, дакIний личIансса иширттая цIухху-бусу бару жу махъ нанисса, сий дусса миллатрал вакилтурахь.
Ва даву дуллалисса чIумал чIалан бикIай гьарицагу инсан, архсса зунттал шяраву ялапар хъанахъимагу, дазул кьатIувмагу, хъунасса къуллугъчигу, укунасса зузалагу миллатрай дакI цIий ушиву, жулва маз, культура дуруччаврил буруккинттарай ушиву.
Укунсса ххаллилсса арсру, душру миллатраву буссаксса, чаннасса бучIантIимунийнсса хьулгу ххишала шай.
Я Аллагь, щалагу миллатран даркьусса, барачатсса шин хьуннав. Жува тIимур Залгу тIий лякъиннав.
Андриана Аьбдуллаева

Шарип Шарипов, ДР-лул ХIукуматрал председательнал хъиривчу, экономикалул элмурдал доктор
Ларгсса шинал республикалул оьрмулуву хъуннасса агьамшиву дусса, тIааьнну дакIний личIансса ишру чансса къавхьунни. Агьалинал багьу-бизулул, экономикалул шартIру къулай хьунсса хьхьичIуннайшивуртту хьунни. Ми хьхьичIуннайшивурттугу хьуссар жулва халкьуннан бувчIлан бивкIун тIий так цаннацIун ца бавкьуну зий, аьмсса хIарачатрайну гьаз бан хьунтIишиву цалва оьрмулул даража.
Давурттугу, къайгъурдугу чIявусса шин дия. Бигьану бакъая. Ци чулийгу, приоритет проектру щаллу давриха зий, шинал лажиндарай дан дакIний бивкIмур бартдигьин бювхъунни.
АПК-лул куратор хIисаврай, кIицI лаган ччива ва аралувугу дакI ххари дансса ккаккияртту хьушиву. ТIабиаьтрал бигьа да­къасса шартIирдах къабурувгун, жулва аграрийтурал гьарица чулуха хьхьичIмур шиналнияр ххуйсса ккаккияртту хьун дунни.
Сочи шагьрулий бюхттул­сса даражалий лавгсса Олимпий тIуркIурдалгу, Къирим жунма зана баврилгу халкьуннал дакIурдивун гьавас бувтунни, Ватандалухсса ччаву чантI учин дунни. Билаят­раяссагу, республикалияссагу, жулва хъуниминнаяссагу пахрулул дурцIунни халкьуннал дакIру. Мукунсса патриот асарду жулла обществалул цIакьсса гьанулул ххазинардур.
Ларгсса шинал ттулва оьрмулувугу хьунни тIааьнну дакIний личIансса ишру. КIицI лагав оьрмулул 50 шин бартлаглагисса юбилей. ЧIивимур душ лавгссар школалийн, хъунмур душгу кулпатрал хьунни.
ДакIнийхтуну барча буллай ура Дагъусттаннал агьлу, жулва лак ЦIусса 2015 шинащал. Гьарица ужагъравун ва шин ххаришивур­ттащал, хъинбалардащал, хъиншивурттащал духханнав. Гьарица инсаннавун хъин-хъинсса давурттив дуллансса гьавас багьаннав, каши-кьудрат ххи хьуннав. ЦIуллушиву, тIайлабацIу, талихI-тирхханну!

Муслим Даххаев, ДР-лул УФСИН-лул хъунама, виваллил службалул генерал-майор
Ларгсса шин ттунна оьрмулул иширттавугу, давривугу тIайлабацIу бусса, даркьусса шин дия.
ТIааьнну дакIний личIансса ишру хьунни республикалийгу, билаятрайгу. Бюхттулсса даражалий ларгунни Сочи шагьрулийсса Олимпиада. Ва Олимпиадалул чIалачIи бунни Аьрасатнал ХIукуматрал гуж-кьудратгу, жулва спортсментурал бюхъу-гьунарданул даражагу.
Ларгсса шинал, ахиргу, Аьрасатналшиврий бавцIунни бястлихун багьсса Крым.
Шинал лажиндарай ттулла давривугу хьхьичIуннайшивуртту хьунни. Евростандартирттайн букIлакIаврицIун дархIусса чIярусса давурттив дан бювхъунни. Даврил ккаккияртту хIисавравун ларсун, нара каялувшиву дуллалисса управление Аьрасатнал ФСИН-лул управлениярдава яла хьхьичIунсса 10 управлениялул сияхIравун дагьунни. 83 субъектрал управлениярдаву яла хьхьичIунминнувун дагьаву му мадарасса ишри, жу дурмунин бивщусса лайкьсса кьиматри.
Ххарисса иш хьунни ттулва кулпатравугу. Арснал Гьаруннул къуртал бунни Москавуллал ПаччахIлугърал университет.
ДакIний личIансса хьунни ЦIуссалакрал райондалий, чIявусса бусравсса хъамалгу бувкIун, лахъа-хъунну кIицI ларгсса кIира юбилей: район сакин хьуну 70 шин бартлагаву ва ЦIуссалакрал аьрщарайн ххявхсса боевиктал ххит бувну 15 шин там шаву.
Ларгсса шин тIайлабацIусса дия учин бюхъанссар ттула лагма-ялттунал, гъан-маччанал, дустурал кулпатирттаву бивкIу-буккурду, кьурчIишивуртту къархьуну тIий. Инсан ссаякIуй мюхчанну акъасса замана бур. Оьккимур чIарах буккаву – мугу хъунмасса тIайлабацIур.
ЦIусса шинал цинявппагу дагъусттанлувтуран, хаснува жулва лакран, чIа тIий ура гьарица ишираву тIайлабацIу. ДакI къума лаган дансса хавар цавагу кулпатравун къабухханнав. Ххаришивуртту чIяру даннав. Нитти-буттал оьрчIру, оьрчIал нину-ппу ххари буллай личIаннав.
Лакрал махъ нанисса, бивзний ша бавкьусса, тIиртIунийн ка диллалисса шин хьуннав.

Рита Мурачуева, ДР-лул ЦIуллу-сагъшиву дуруччаврил министерствалул хъунмур эксперт
Ларгунни янил ляпI учиннин ца шин ттигу. Шиная шинайн оьрмулул кьадру хъиннува кIул хъанай бур.
ХIайп, цуксса жунма къа­ччайнугу, дунияллия лаглай бур жунма гъансса, ххирасса инсантал. Оьрмулул кьарал мукунсса дур, цавай дунияллийн буклакисса, цавай лаглагисса. Жуятува личIи хьусса гъансса, ххирасса инсантал дакIнийн багьувкун, дакI къума лагай. Амма оьрму бутлан аьркинни жува, чIарав ччисса оьрчIалгу, оьрчIал оьрчIалгу, жулва кумаграх мюхтажсса гьарица инсанналгу цIаний.
Мугу хъунмасса талихIри, агана вища захIматсса тагьардануву ливчIсса инсаннан кумаг бан бюхъарча. Мукунминнавасса бура нагу. Ялагу, ттул оьрмулуву тIааьнсса асарду личIан бай оьрчIал оьрчIацIун бавхIусса гьарица лахIзалул. Ттухьхьунма биривсса тархъансса мутта миннан хас бувара. Хъуннасса ххаришиву дикIай миннаха къайгъурду буллан. ХIарачат буллан бикIара ласнахсса, оьрчIахсса къулагъасгу чан къахьун. Аллагьнайн щукрулий бикIара, ттущава миннал оьрмулуву гьуртту хьун бюхълай тIий.
Цакуну ялун дирунни цIусса шин. Ва шинал щалвагу Аьрасатнал, Дагъусттаннал халкьуннан чIа тIий бура яла аьркинмур – цIуллушиву. Гьарица инсан оьрмулул уччиннин итаннав, дунияллий дакьаву, паракьатшиву хьуннав. Царагу ужагъраву оьрчIал хъяхъаву чан къахьуннав.
ТIайлабацIусса, даркьусса шин хьуннав.

СалихI Сагидов, МахIач­къала шагьрулул Кировский райондалул администрациялул хъунама
Ларгсса шинал ттул оьрмулуву дакIний личIансса ишру чансса къавхьунни. Хъунмасса бахшишну хьунни нара дурсса даврин лайкьсса кьимат бивщуну, Дагъусттаннал БакIчи Рамазан АьбдуллатIиповлул чулуха ттунна ХIурматрал грамота дулаву. Мунил уттиния тихунмайгу ттула бюхъугу, бажаргу ишла бувну зунсса гьавас бувтунни. Ларгсса шинал ттуйн тапшур бунни ва бигьа бакъасса ва жаваблувсса къуллугъ.
Шиккун учIаннин махъсса ххюра шинал лажиндарай Ккуллал райондалул администрациялул бакIчинал цалчинма заместительну зий, укунсса даврил чан-кьансса опыт салкьи хьуну бунугу, цIусса къуллугърайсса даву дачин дан бигьану бакъая. Кировский район дур МахIачкъалаллал районнаву яла хъуннамур. 246 азара инсан ялапар хъанай ур шикку. Ва райондалувун духлахисса шяраваллу ва поселокру Чечень жазиралия Сулакьрайн бияннин дур архсса, шагьрулул зума-къирагърай дирхьусса.
Щурущи дан канилу дакъасса арцущал, так ца гьавасрацIух зун багьунни ттун.
Нава ва къуллугърай дахьа зун айивхьусса ппурттуву МахIачкъала шагьрулул бакIчи МахIаммад Сулаймановлул баян бунни субботникирдал месячник. Му давривух хIала бувххун, жула райондалийн дагьлагьисса кIанттурдай чIярусса ччюрк дукьан дурну, мурхьру бувгьуну мадарасса давуртту дарду. Ахъушинскийл цIанийсса куча лухIи аьрщи дирчуну, тIутIив дургьуну чIюлу барду. Нава ва даврийн учIайхту, ттула биялдарайсса шаннагу шяраваллил ва ххювагу поселокрал график бувну, чув ци дулланссарив ккаккан дурссия. Агьали кIункIу бувну, щиривкIуну зун бивкIру марцIшиврул, чаннал ва уртту-тIутIив дургьуну шагьрулул чIалачIин ххуй дансса давурттаха.
Красноармейскалий бия 15 шинал лажиндарай салкьи хьусса ччюрклил бакIурду. Миннулшиврий жуй хъунисса аькIри дишин най бия. Ттунма кIулцири, дустал, гъан-маччами кIункIу бувну, цуманаща ци кумаг бан шайрив ккавккун, 15 техника зузи дурну, 3-4 гьантлул дянив букьан барду ми ччюрклил бакIурду. Мукунна хъуннасса даву дарду Семендер поселокрай. Поселок хъуннасса дуну дурмургу личIину итталун дагьлай дакъар.
ХIакьинусса кьини шагьрулуву гьарца зат дур приватизировать дурну. МахIачкъалаводоканал, МахIачкъалагаз, горсетьру,
САХ-рал управляющий компанияртту. Ми идарартту муниципал образованиярттачIа дакъаний, жуща ва ягу тамур даву дувара тIий миннайн буюр бан хъанай бакъар, миннатру буллан багьлай бур. Ца талихI, шагьрулул бакIчи каялувчинал опыт бусса,укунсса давурттал сант кIулсса, бажар бусса инсан ушиву. Шагьрулул бюджет­рава 26 ччюрк дукьайсса техника ларсунни, иннул кумаграцIух жущагу мадара давурттив дан бювхъунни. Мурхьру, уртту-тIутIив дургьуну, шагьрулул чIалачIин ххуй дуллалисса даражалийн буцарду шагьрулувун буххайсса ва бу­ккайсса кIанттурду. ХIакьинусса кьини администрациялул хъунама хIисаврай нава хьунаакьлакьисса захIматсса масъала цамургу бур. ЗакондалуцIун къабавкьуну аьрщив дургьуну, микку къатри дуллай бур шагьрулул чIалачIингу зия дуллай, къатри даврил тIалавшиннардугу къадурурччуну.
Нава рязисса, иш хьунни, ларгсса шинал ахирданий 2-3 инсаннаща зузи бан бюхъайсса, суткалий 640 тонна асфальтрал итадакьайсса автоматизированный асфальтовый завод тIитIаву. Уттинин бивкIмур приватизировать бувну бия, мунияту шагьрулул хъунаманал инвестортал кIункIу бувну зурул дянив лавсун ва завод жул райондалий бивхьунни.
Му заводрацIа ттул хъуннасса ххаришиву дур. Партра-мачIан хьусса жула ххуллурду бакьин бан ва чара бакъа аьркинну бия. Завод зий буссар. Вания тихунмайгу муния хъунмасса мюнпат биянссар.
Ххуллурдив бакьин буллан ишла дувара куну шагьрулул хъунаманал кIира техника дуллунни жул администрациялухьхьун.
Мунал тапшур бунни жуйн Ухссавнил чулухсса ГАИ-лул пострачIату шагьрулувун буххай­сса кIанттул чIалачIин ххуй дан. Ца жула гужрацIух му даву дан хьун най дакъая. Зузи кьини субботник баян бувну, финансовый ва промышленный колледжирттаву дуклакисса оьрчIру-душругу бу­ккан бувну, хъуннасса даву дарду. Уттиния тихунмайгу Аллагьнал кабавкьуну, жула биялдаралусса райондалул чIалачIин ххуй дан чIярусса цаймигу давурттив дуллансса пикрилий ура.
БухкIуллухун дирну дур цIусса шин. Гьарица инсаннал дакIниву цала-цала умудру, хияллу бухьунссар. На чIа тIий ура гьарнал дакIнийсса ххуймур, хъинмур бартлаганнав тIий.
Оьккимур, пашманмур ларгсса шинаву личIаннав, ххаришивуртту ялун дияннав. Цинявппагу лакран чIа тIий ура куннал ку бугьаву, цаннан ца бувчIлачIаву, цIуллушиву, талихI-тирхханну.
Барчагу буллай, барчаллагьгу тIий ура нара дуллалимунил чIалав бацIлацIисса ттула зузалтрахь, дустурахь. ЗуцIун даркьусса, зул иш бавчусса шин хьуннав.

ХIажи Айдиев, ЦIуссалакрал райондалул администрациялул бакIчи
Ва жуятура нанисса шинал ЦIуссалакрал райондалий дакIний личIансса ишру чIявусса хьунни.
Сентябрь зуруй республикалул къуллугъчиталгу, чIявусса бусравсса хъамалгу бувкIун бюхттулну кIицI дарду Дагъусттанналгу, ЦIуссалакрал райондалулгу тарихраву кьурчIисса, лажин чирчу­сса иширттацIун дархIусса кIира юбилей: ЦIуссалакрал район сакин дурну 70 шин бартлагаву ва ЦIуссалакрал аьрщарайн ххявхсса боевиктал ххит бувну 15 шин шаву. Вай жяматрайх кьини дурксса ишру жул агьалинан тачIав дакIния къабуккантIиссар.
1944 шинал репрессиярттал мугьалттухьхьун биривну мичи­ххичнал аьрщарайн бизансса бувк­сса лакрал агьулданул хъунмасса захIмат бивхьуссар ЦIуссалакрал район сакин дурну ва хIакьинусса даражалийн диян дан.
Мукуннасса хъин къашай щавуну ливчIунни ЦIуссалакрал агьалинал оьрмулуву ярагъуннищалсса боевиктал ххявхсса 1999 шинал сентябрь зурул гьантри. Тай дяъвилул иширттаву жанну дуллуссар чIявусса ЦIуссалакрал къучагътурал. Ва кьини бакъассагу, гьар мудангу жу ми хIурматрай дакIнийн бичару.
Хьунни ххариссагу ишру жул райондалул оьрмулуву ларгсса шинал. Февраль зурул 11-нний республикалул БакIчи Рамазан АьбдуллатIипов, Аьрасатнал регионнал развитиялул министр Игорь Слюняев, республикалул ХIукуматрал Председатель Аьвдуссамад ХIамидов ва цаймигу бусравсса хъамалгу бувкIун лахъа-хъунну тIитIарду Новостройрайсса ЦIуссалакрал шяраву цIусса школа. Мукунма цIусса дуккаврил шинайнин гьарта-гьарзасса, ттизаманнул тIалавшиннардай бувсса цIусса школа тIитIарду ТIюхчардал шяравугу.
Чапаевкаллал шяраву дайдишару детсад буллансса давуртту. Новостройрайсса азарханалул хьхьичI бувару оьрчIру тIуркIу тIунсса площадка.
Хьунни бизан баврил масъалар­ттацIун бавхIусса билаятрал ва рес­публикалул къуллугъчитуращалсса мюнпатсса хьунабакьавуртту.
Шинал ахирданий Москавлив на хьунаавкьура Ухссавнил Ккав­кказуллал иширттаха зузисса АьФ-лул министр Лев Кузнецовлущал. Му хьунаакьаврийгу бизан баврил хIакъиравусса мюнпатсса, ва масъала лябукку буну щаллу хьуншиврийн вихшала дишин буллалисса ихтилат хьунни.
Навагу рязисса, ЦIуссалакрал жяматгу ххари бансса иш хьунни цIусса миналийн бивзсса агьлу газрал щаллу бан «Чапаево» тIисса газрал станция (АГРС) цIубуккан баву. Ухссавнил Ккавкказуллал иширтталсса буллалисса министр Лев Кузнецов, республикалул БакIчи Рамазан АьбдуллатIиповгу гьурттуну шадлугърай тIитIарду му станция.
Вара кьини ЦIуссачIурттащиял шяраву тIитIарду 315 дуклаки оьрчIансса ттизаманнул даражалийсса цIусса школа. Жяматран хъуннасса ххаришиву дия Федерал министр ва республикалул БакIчи цивппа барча бан бучIаву.
ЦIусса шин ЦIуссалакрал агьулданун даркьусса, буллугъсса хьуннав. Лахъи лавгсса бизан баврил масъалагу жунма ччикун, тIайлабацIуну щаллу хьуну, агьалинал дакIру рахIат дукканнав. ЦIусса миналий цIусса къатраву щавшсса кюртти барачатсса хьуннав. Щалагу Дагъусттаннай паракьатшиву ликканнав.

Юсуп МахIаммадов, Лакрал райондалул администрациялул бакIчи
Цумацагу агьалинай дакI цIуцIисса бакIчи жяматран къулай­сса, миннал багьу-бизу бигьа бансса шартIру дузал даврил къайгъурдай икIан аьркинни.
Ххуйсса шартIру – ми хьхьичIра-хьхьичI ххуйсса ххуллурдугу, щинал дузалшиннагу хъанай дур. Ми масъалартту щаллу буллай, мадара давурттив дан бювхъунни райондалул администрациялуща.
Цаппарасса давуртту къуртал дурну, бакIуйн дуккан дарду, цаппарассаннуха хIакьинугу зийнма буру. Къаххуйсса тагьарданий буссия КIундиннал шяравунсса ххуллу. КIа ххуллу бакьин бансса пикри бакIрава буклай бакъая. Ларгсса шинал ВицIхъату ЧIарттал дазуйн бияннин утта бувну бакьин барду. Мукунма нигьачIисса тагьарданий­сса ШавкIрату Щаравсса ххуллу буллай байбишин, проектно-сметный документация щаллу дурну къуртал шавай буру.
Бувссар республикалул трассалия КIулушацIун, Читтурав нанисса ххуллурдугу.
Ури-Мукьардал махIлалийсса ххуллу буллай байбивхьуну, 5 км. лахъишиврийсса щаллу хьу­ссар. 2016 шинайннин къуртал бантIиссар.
Мадара давуртту дарду райондалул агьали щинал кьянатну къабитан. Ххюлусмату Гъумукун дурцусса щин гъарал ларчIтари оьлухълай дуну, Буршая щаращул щин дурцуну, Ххюлусмату Гъумукунсса щинаххуллуцIун дазарду. КIиччагу лагма-ялттусса щархъавун ЧIурттахьхьун, Читтурав, ТIулизмав, ГьукIрав щин дурцуссар.
МарцI дурссар 20-хъул шиннардий марцI къадурну диркIсса жула къутаннайн щин нанисса каналлу. Нава рязисса ххуйсса даву хьунни Гъумучиял хъун бяр марцI баву. Ххуйсса пишакартал бувцуну, бакьингу бувну, щин итадаркьуну буссар. Бярнил лагма-ялтту чIюлушинна дансса цаппарасса давуртту лирчIунни. ЦIусса шинал чанигу бувцуну, щюллишиягу дургьуну, инсантал щябикIансса скамейкардугу бишин пикрилий ура.
ЦIусса шинал мукунма дакIний буссар Гъумук, ттизаманнул журалийсса, личIи-личIисса машлул точкардащалсса, цIусса ярмарка тIитIин. Му даврил харжлугъ цала бакIрайн ласунсса спонсор увккунни. Мунащал ци-цукун данссарив сант рутлай буру.
Райондалул администрациялул къатри шамулчинмур зивугу гьаз дурну, 1-мур зивулийгу МФЦ тIивтIуну, цIудуккан дарду.
ЧIарттал шяраву цинярда шартIру дусса, аьркинмунил лащу-щаллусса ФАП тIитIарду. Мукунмасса ФАП буварду ГьунчIукьатIрал къутандалийгу.
ДакIний личIансса иш хьунни кIанттул цилакаялувшиннарал органнал давриву хьун дурсса хьхьичIуннайшивурттахлу респуб­ликалул зунттал районнал дянив Лакрал райондалул 2-мур кIану бугьаву.
Арулла шинал лажиндарай жул район 5-лла лайкь хьуну дур 2-мур кIанттун. 2013 шинал жу бувгьуссия цалчинмур кIану.
Райондалий ххуй чулиннайсса дахханашивуртту хьунни цIуллу-сагъшиву дуруччаврил ва социал аралуву.
Амма шинал ахирданий райондалий жяматралгу, ттулагу, цалва миллат ххирасса, миллатрал тарихрал кьадру кIулсса цинявппа лакралгу дакIнийн щунсса иш хьунни. Гъагъари бувну лявкъунни миллатрал виричу Хан Муртазааьлил гьайкалданучIа ва Нуххулу кьулла тIисса дарувсса щин дусса зиярат кунмасса кIанттурдай бувгьусса мурхьру.
ХIакьинусса кьинигу бувчIин бюхълай акъара му дучIидакъасса къел щил, циван дурссарив. Ялагу тIааьн бакъасса асарду биян бунни ларгсса шинал Аьрасатнал чулухунмай баян бувсса санкциярдал. МуницIун бавхIуну ЦIусса шин захIматсса дикIанссар тIисса прогнозру дур. ЗахIматссар тIий бигьа­сса лякъиннав. Буллугъсса, авадансса шин хьуннав. Нитти-буттан оьрчIал дард къаккакканнав. ДакIниву чаннасса пикрирду буминнал хияллу бартлаганнав.
Лакку миллатрай кьини дацIан­нав. Лакку билаятрай аргъ дизаннав!

Сяид Сулайманов, Ккуллал райондалул администрациялул бакIчи
2014 шин, ттухьва цIуххирча, оьккину къаларгунни. Райондалий цаппара агьамсса давуртту дан бювхъунни. Ваччав цIуну буллалисса школа цIусса дуккаврил шин дайдишиннин къуртал бансса умудрай буру. Ваччату Вихьливсса ххуллу бачIи бакьин буварду. Мукунма Вихьлияту Къянив бияннинсса ххуллу бакьин буллай, хIакьинусса кьинигу давурттив найнна дур. Мадарасса давуртту дарду шяраваллал вивсса ххуллурдугу бакьин буллай.
Гьашину ЕГЭ жул райондалий цавагу гъалатI къавхьуну дуллушиву тасттикь бунни ДР-лул КIулшивуртту дулаврил министерствалул.
Культуралул шин духьувкун, райондалий дурссар лакрал аслий­сса культура ккаккан дуллалисса фестиваллу.
Ккуллал райондалул культуралул пишакартал гьуртту хьуссар Дагъусттаннай хьусса цинявппагу культуралул иширттавух. Вай гьарзат хIисавравун лавсун, Дагъусттаннал 41 райондалува 1-мур кIану жул райондалул культуралул зузалтран буллунни. Мугу ххарину дакIний личIансса иш хьунни.
Райондалий къавхьунни жямат­рал итталун багьсса закондалул ххуттава бувксса ишру.
Ххуйну дирхьуну дур райондалий спортрал даву. Ччя-ччяни бувай личIи-личIисса спортрал бяст-ччаллу.
Жул ца къювулийсса масъала бур райондалул агьалинал, ятту-гъаттара ябулларчагу, хъуру къадугьлай бушиву. Аьрасатнал лагма къарши дарцIусса хIукуматру чIяру хьунни. Уттивагу жучIара ххяххаймирагу бакIлахъия дугьланхьуви жулва инсантал тIисса умуд бур.
Ккуллал райондалул муниципал сакиншиннарал чулухагу, ттула чулухагу барча буллай ура Дагъусттаннал жямат, цинявппагу лак цIусса шинащал. Аьрасатнавугу, Дагъусттаннайгу паракьатшиву хьуннав.
Къахьуннав цаннан ца къабувчI­лачIисса ишру. Ялун нанисса шин хьуннав тIайлабацIу бусса. Бартлаганнав гьарица инсаннал дакIнийсса мурадру.

Жавраил Хачилаев, предприниматель, ДР-лул Дакьаву дуруччаврил комитетрал председатель
Ва жуятура ларгсса 2014 шин политикалул ва социал иширттал чулуха авадансса шин дия. Ми ишругу жула халкьуннал багьу-бизулул тагьар захIматшиврувун дутлатисса бия.
Кризис, багьри гьаз шаву, цайми хIукуматирттащалсса арарду зия шаву, Американал ва Баргълагавал билаятирттал Аьрасатнал чулухунмайсса санкциярду, миннан жавабран жулла хIукуматрал ласласисса ххуллурду – вай гьарзат чIаланну асар хьунни Аьрасатнал халкьуннан, мукунма дагъусттанлувтурангу, хаснува ахIвал-хIал кIюламиннан. Билаятралгу, республикалулгу каялувчитуран агьалинал оьрму, багьу-бизу бигьа бансса ххуллурду лякъин аьркинни.
КIицI къабувну къабучIир ЖКХ-лул хIаллихшиннардал масъалагу.
Укунмагу мюрщисса хар­жир­дацIух аьмал буллалисса инсантурачIан ЖКХ-лул хIаллих­шиннардах ссурулун дирсса счетру дукIлай, халкь депрессиялувун бичлай бур. Ми ча лавсъсса, цукун хIисав бувсса багьри буссарив хъирив лаян бюхълай бакъар.
Республикалул хъуниминнал къулагъас дикIан аьркинни инсантал ва аьратталсса, ццахханну дагьсса тагьардануву къабитан.
Ттула кулпатраву хьусса ишир­ттая тIурчарив, ларгсса шинал душ щар булав. Мунин арс увну ххари унна. Мунангу, жагьилсса оьрмулуву дунияллия лавгсса, ттула ххирасса уссил Адамлул цIа дуллуну рязину ура.
Ялун нанисса цIусса шин Да­гъусттаннал халкьуннан бигьасса, рахIатсса хьуннав тIий ура. Куннал кув бувгьуну, цаннан ца бувчIлай личIаннав. Дагъусттаннай дакьаву ва паракьатшиву ликканнав. ЦIусса шин гьарица ужагъравун ххаришивурттащал духханнав.
Юсуп Губулов, Республикалул ортопедиялул ва травматологиялул центрданул ортопедиялул отделениялул хъунама, цIуллу-сагъшиву дуруччаврил отличник, лавайсса категориялул врач
Жуятура нанисса шин хьхьичIра-хьхьичI ттун дакIний лирчIунни жулва кулпатраву хьусса хъуннасса ххаришиврийну. Ттул арснан душ бунни. Ва жул кулпатраву цалчинсса оьрчIал оьрчIри.
Ялагу шин дакIний лирчIунни ттулва пишалуцIун, даврицIун бавхIусса мюнпатсса аьрххилийнугу. Шинал ахирданий Москавлив ларгунни Аьрасатнал ортопедтурал ва травматологтурал 10-сса съезд. Цайми билаятирттаясса хIакинталгу гьуртту хъанахъисса му съездрал делегатну нагу увчIунна. Нава зузисса центрданийгу цIу-цIусса технологияртту ишла дуллай, артроскопический операцияртту буллан бивкIру.
Сустав баххана байсса операцияртту булланссагу пикри буссия, амма цаппарасса мунин аьркинсса затру щаллу дан къархьуну, му даву дайдишин къабювхъунни. Жулва халкь сустав баххана бан тиху-шихунмай занази къабувну, жучIава буллан ччай буру, хIадурнугу буру. ЦIусса шинал байбишин умуд бур.
ЦIусса шинал жулва халкьуннан хьхьичIра-хьхьичI цIуллушиву чIа тIий ура. Чан хьуннав бала-апатIру, цIунцIияртту. Жулва ххуллурдай гьарза хьуну бур машинартту, чIяру хьуну дур ДТП-тту. Мунияту, инсантуран апатIру, цIунцIияртту хьусса ишру ялу-ялун чIяву хъанай бур. На чIа учивияв, аьрххи-ххуллийн увксса гьарца инсан сагъ-саламатну цала кулпатирттавун зана хьуннав, куну.

Аьли МахIаммадов, Австриянал музыкалул университетрал студент, ш. Вена
Ларгсса шин ттул оьрмулувугу, творчестволувугу хъуннасса агьамшиву дусса иширттацIун дархIусса, чIявусса тIайлабацIуртту хьусса, шин дия. На увхра дуклан Австриянал Вена шагьрулийсса музыкалул ва прикладной искусствалул университетравун. Ва Австриянаву яла лаваймур даражалул кIулшивуртту дулайсса университетран ккаллиссар. ЛяличIинува дакIний личIансса иш хьунни нава шийх «Вольный стрелок» тIисса немецнал опералул агьаммур партия щаллу даву. Ва опералул командалущал на гъирарай зий ивкIра. Репетициярдал чIумал хъиннува гъанну кIул хьура шиву гьуртту хъанахъиминнащал. Куннан кув бувчIлай, кунная кув рязину бивкIру. Спектакльгу хъинну ххуйсса хьунни. Дуклан увххун хъунма хIал къавхьуну ттуйн оьвкунни Вена шагьрулийсса ца яла хьхьичIрамур архитектуралул гьайкалну хъанахъисса Петерскирхе тIисса концертирттал залдануву ттулалусса балайрдал ва оьруснал композитор П. И. Чайковскийл музыкалийсса дуэтру тIутIисса концертрал программа хIадур дан.
Укун агьамсса концертрал программа хIадур дан ттуйнна вихшала даврия на хъинну ххарира. Ва концерт ккаккан дурну махъ ттуйн оьвтIий бур Германнавун. Вай концертирттайн хIадур хъанахъисса репетициярдай на кIул хьура Австриянал хьхьичIунсса композитортуращал, музыкантътуращал. Миннащалсса хьунабакьавурттая ттул творчествалун хъунмасса кумаг хьунни.
Ларгсса шинал ттулва оьрмулуву хьусса иширттаву яла дакIний ливчIмур ва ххаримур хьунни нава Дагъусттаннайн ттула коцертращал учIаву. Ва аьрххи бия ттун ца чулуха Ватандалийн учIаврия ххарисса, гамур чулухагу Дагъусттаннал халкьуннал нава цукун кьамул авивав тIий вас-ццахлийсса. МахIаттал хьуну ивкIра зал тамашачитурал бувцIуну ккаккайхту. Хъинну ххуйну кьамул увра на ттулла Ватандалий. Хъунмасса барчаллагьрай ура буттал шяраваллил агьулданийн – Бархъаллал жяматрайн ттула чIарав бавцIусса. ЦIусса шинал чIа тIий ура лакран, цинявппагу Дагъусттаннал халкьуннан барачат, буллугъшиву. Цаннал ца бугьаву, куннан кув бувчIлачIаву. Гьарза хьуннав ххарисса, чаннасса асардал бувцIусса лахIзарду. Хъинну ччива уздансса, хьхьичIунсса лакрал миллатрая, Дагъусттанная щалла дунияллун кIул хьуну. Дуссар жучIара цайминнан ккаккан данмур, пахру-ххара бан лайкьмур.