Асланбаглул арс Кьурбанов Рамазан
Вай гьантрай уттигу ца лухIи бала бувххунни 1-мур ЦIувкIуллал шяравасса Асланбагхъал ужагърайн: авария хьуну лавгунни дунияллия оьрмулул 51 шинаву Асланбаглул арс Кьурбанов Рамазан. ДачIи шин хьунуккар мунал хъунама уссу, шяраваллил администрациялул хъунаману зий ивкIсса МахIаммадгу мукуна авария хьуну дунияллия лавгун. КьурчIишиву уссурваврал кьадарданул!
Шяраваллил хозяйствалул техникум къуртал байхту Рамазан Тамбовский областьрайн тIайла увккун, совхозрай зий уссия гъаттарал духтурну. Микку зий унува заочнайну къуртал бувну бур Саратоврал ветеринартал хIадур байсса институтгу.
Зий ивкIун ур Рамазан Сухокумскалий, ЦIувкIрав. 1993 шинал зун ивкIун ур Ккуллал райондалийсса ветеринарный лабораториялий ветврачну-серологну. 2004 шинал му лабораториялул хъунаману ивтун ур. 2012 шиная шинай зий уссия ДР-лул ветеринариялул комитетрал Госветинспекциялул хъунама пишакарну.
ЧIярусса шиннардий бувсса захIматрахлу Рамазаннул даврин хIукуматралгу лайкьсса кьимат бивщуну бур: мунал тамансса хIурматрал грамотарду, бахшишру дур. Рамазаннун 2011 шинал дуллуну дур ДР-лул лайкь хьусса ветврач тIисса цIагу.
ЗахIмат ххирасса кулпатраву хъуна хьусса Рамазан цIанихсса захIматчи, ххуйсса каялувчи акъагу, дакI-аьмал хъинсса, агьалинащал хIал бавкьусса, хъярч-махсара ххирасса чув уссия. Райондалул жяматран Рамазан ххирасса ивкIшиву исват хъанай бия, му ивкIусса кьини ша бизансса кIану бакъа шяравалу машинарттал дурцIуну дия.
Шагьрурдая, шяраваллава бувкIми лап чIявуя.
Ва лялиян бан захIматсса бивкIулул кьурчIишиву кIидачIлай жижара буллай буру Рамазаннул арсурваврахь, кулпат Наидахь, душнихь, ниттихь Гумсиятлухь, уссу Аьлихь, ссурваврахь ва миннал наслулухь, цинявгу гъан-маччацириннахь, агьлу-авладрахь.
Рамазаннун къабуллумур оьрмулул бутIа мунал наслулун ххи бувну лякъиннав, цув Алжаннул ххари уваннав, гьаттай нур дизаннав!
1-мур ЦIувкIуллал жямат
————————————————
Ттула хъинсса чIаххучувнал,
Асланбагхъал Рамазаннул
бивкIулул къума-банд лаган бувминнащал архIал жижара буллай, кьурчIишиву кIидачIлай бура Кьурбановхъал ва Мустиевхъал кулпатирттащал, ниттилссу ХIуруннущал, щалвагу Аьлиевхъал кулпатращал ва Санеращал, цинявгу гъан-маччацириннащал.
Рамазаннул рухI бигьаний дишиннав, Алжаннул ххари уваннав.
ПатIимат Рамазанова
