Декабрьданул 23-нний Аьрасатнал министртурал кабинетрал бакIчи Дмитрий Медведевлул качирчунни «О первоочередных задачах по опережающему развитию Республики Дагестан» тIисса АьФ-лул ХIукуматрал хIукмулий.
Мунил хIакъираву премьер-министрнал телефондалувух хьусса ихтилатраву бувсунни Дагъусттаннал БакIчи Рамазан АьбдуллатIиповлухь. Бувсун бур, мукунма, ва хIукму хIадур бувну бушиву АьФ-лул Президент Владимир Путиннул тапшур баврийну.
Жулла республикалун хъинну агьамсса хаварданул хIакъираву бувчIин бавуртту дуллай, Рамазан АьбдуллатIиповлул бувсунни му куццуйсса даражалул ва мяъналул документру личIину ларсъсса регионнан хасну Аьрасатнал ХIукуматрал нажагьли кьамул байшиву, мунияту ванил барашин дуллалишиву билаятрал каялувчитурал Дагъусттаннал чулухуннай ляличIисса бургаву душиврул.
Республикалул каялувчинал увкусса куццуй, микку хъунмасса кIану бувгьуссар республикалий махъсса 2 шинал лажиндарай социал-экономикалул чулуха тамансса лябукку хьуну бушиврул. Му мутталий хьхьичIуннайшивуртту хьуссар чIявусса бутIраву. Экономика хьхьичIуннай шаврил лябуккулун хасну, промышленностьрал производствалул индекс лахъ шаврил бущилун хасну республика дурккунни 1-мур кIанайн АьФ-луву, налогру салкьи даврил чулуха 4-мур кIану бугьлай дур.
Рамазан АьбдуллатIиповлул барчаллагь увкунни Дмитрий Медведевлухь Дагъусттаннах къулагъас дуллалаврихлу ва кумаг буллалаврихлу. Мукунсса ара душиврия кумаг хъанахъиссар чIявусса захIматсса масъалартту щаллу буллан, мунийну кумаг хъанахъиссар Аьрасатнал Федерациялул субъектирдаву Дагъусттан хьхьичIунми кIанттурдайн буккан, дакI дарцIуну ур Республикалул каялувчи.
ДакIнийн бутанну, ва документ (хIукму) баврил сиптачи хьуну ур жулла Республикалул хъунама Рамазан АьбдуллатIипов.
«О первоочередных мерах по обеспечению опережающего развития Республики Дагестан» тIисса АьФ-лул ХIукуматрал хIукмулуву ккаккан бувну бур щаллу бан цаппара масъалартту, АьФ-лул паччахIлугърал программарттавусса мероприятияртту ишакаш даврия тIайла хьуну, федерал ва ведомстварттал целевой программартту щаллу дан, цаппара отраслирду анаварсса бущилий лябуккан даву: цIуллушиву дуруччаврил, образованиялул, туристшиврул ва цаймигу. Мукунма ккаккан бувну бур агропромышленностьрал комплексран, шяраваллил хозяйствалуву импортозамещениялун кумаг буван 2015-2016 шиннардий.
