ЦукунчIавсса щак ба­къар ва цIа дуккайхтура чIявусса буккултран дакIнийн багьантIишиврийн 1970-80-ку шиннардий машгьурну бивкIсса балай. Махъру МахIаммад-Загьид Аминовлул, макьан Мазагьиб Шариповлул.

Учайссия жулва цIанихсса балайчи, Дагъусттаннал Халкьуннал артистка Мирханум Шариповал. Балай дакIнийн багьминнан, дакIнийн багьхьунссар танийсса жулва хъуншагьругу.
Нагу ва балайлий хъунма хьуссара. МахIачкъала шагьругу чIивиний так луттирдай ва телевизорданувух бакъа ххал къашайссия. Таний суратирттайгу, телевизорданувухгу так лухIисса ва кIяласса рангирдай бакъа чIалай къабивкIхьурчагу, щюллишиву личIи дан бюхъайва, гьар кIани-кIанттай – мурхьру, къатIри, тIутIив.
На дуклан бувкIсса 90-ку шиннардийгу яхьуну дия щюллишиву. 26 Бакинских коми­ссаров ва Кировлул кIичIирттал тия ва шия загълунсса мурхьру, гьарца кIичIирттаву гьалххара-гьалххасса щюллишиву. На шагьрулий ялапар хъанахъисса 20 шинал лажиндарай кьукьлай-кьукьлай кIачIа бувккунни жула хъуншагьру. Щюллишиврул кIанугу ччюрклил бувгьунни. Уруган ан хъина хIакьину аьпа биву МахIаммад-Загьид Аминов. «Даиман щюллисса, жул МахIачкъалай» тIисса балайлул ялтту «ЧчюрклицIа марцI къашай, жул МахIачкъалай!» тIисса назму лачIун дан бучIир хIакьину. Амма бюхъай ттунма ттигу щалва шагьру къакIулну бикIангу, бю­хъай щюллишиврувун багьлавгсса ва ччюрк дакъасса кIанттурдугу ххал къавхьуну бикIангу. Гьай-балики, бухьуви мукунссагу кIичIиртту.
Ччя-ччяни дакIнийн багьай ттун кIа балай, дягъинттул маршруткалух ялугьийни няй-няй тIисса бургъия лабикIансса мурхь хьурдай тIутIинигу, ссуттил гъараллу ларчIун, никирттайн бияннин бярдавух нанинигу, шинай бувагу цал байсса марххала бувну, кьяркьаравун кьутIлатIинигу. Ца кьинисса гъараллу лачIурчагу, шагьрулувух дуссар нехру дуклай. Базаллувун лавгтари къищу-къищуми янна-уссуй я бацIарчагу, укунсса гьантрай мукIру шара чавахъру бугьул лахъира-лахъисса ризиндалул чакмарду ва щин къадуккай плащ жулва хъуншагьрулий яла чара бакъа аьркинмур лаххия душиврий, миннун ттула гардеробраву кIану лякъин багьлай бушиврий.
Мукун хьунни ларгсса нюжмар кьинигу. КIюрххил 10.00 ссятрая ахттакьун 15.30 хьуннин Дагъусттаннал ишбажаранчитурал форумрая кьатIув букканнин дяхъуншагьрулул квартирарду яла ххирасса элитный райондалул кIичIиртту лахъансса иш бакъая. Светофорду къазузиссар тIий шанна-мукьра ссятрай пробкардава буккан къахъанай инсантал азурда хьуну бия. Ссавур кIюла дуркми маршруткардава бувккун никирттайн бияннинсса бярдавух занай най бия. ЧIявусса апатIругу хьуну бия. Га кьини ччанну бявкъуну ягу апатIру хьуну азарханардайн къабагьну ливчIминнан мусил цадакьа бачIин бучIия.
Ишбажаранчитурал форумрая мукьах ттун ялагу гьан багьлай бия жулва хIурмат бусса РайхIанат Буттаевал юбилейрал шадлугърайн, ци тIюпан бухьурчагу къалавгун къабучIиссия. Амма яла хьхьувай, я маршруткарду, я таксирду бакъа, шаппай биянгу захIмат-жапа хьуна. Аллагьнал буруччиннав дукIу Амурдал областьрай кунна гъараллу лахъи гьарча, щалва шагьру щиналу личIанссия. Лаккуй, зунттавугу нюжмардай лахъи лагайхха гъараллу, мугьалтту, нехру дуккай. Зунттал дайгьайхьунссар, къат­ран апатIру къашай. Мунияту бухьунссар жулва ппухълуннал жуйнмасса яла хъунмур васият «Буруччияра зунттурду» тIисса. «Даиман щюллисса хъуншагьрулиягума» кьянатсса зунттавунмай лихъан хьурдай тIутIи барухха Занналгу ца-ца чIумал жува.