Махъсса ппурттуву чIяву хьунни электрон сервисрайх хIарамзадатурал инсантал хъяврин буллалисса ишру. Мукун хъяврин хьуминнал гьан дуллай бур арцу хIарамзадатурал электрон сервисрайхчIин кIул бакъасса инсантурайн. Зува SMS-дайхчIин хъяврин къабансса цаппара маслихIатру.
ХIакьину сайки гьарица инсанначIа дур сотовый телефон. ГьарначIан дукIлай дур личIи-личIисса SMS-ду. Зува хъяврин къахьуншиврул, кIул бувара зучIанна ихтиярду дуруччай органнал ва банкирдал зузалтрал, лотереялул сакиншинначитурал, сотовый связьрал оператортурал, къуллугъчитурал, гъан-маччанал цIания чичлачимур цуксса тIайласса бурив. Телефоннавух оьвтIий, SMS гьан дуллай, хIарамзадатурал дувара тIимур дан анавар мабуккару, хаснува ми арцу дичияра ягу гьан дувара тIисса бухьурча.
Клиентътуран кумаг байсса центрданийн оьвкуну, зучIанма бувкIсса информациялул хIакъираву цIухху-бусу бувара.
Жуликтурал бувара тIимур бан анавар буккарча, зулла арцуцIа хьун бюхъайссару. Анавар мабуккару телефон ягу компьютер вирусрацIа марцI данну тIисса ягу цайминнаясса затру кIул бан бюхъайсса сервисрал реклама дуллалисса оьвчавурттан ягу SMS-ран жаваб дулун. Информация цуксса тIайласса бурив кIул бувара зулва операторначIа. Мува операторнайхчIин кIул бан бюхъайссар контект-провайдертурал дуллалисса викторинардаву ва акциярдаву гьуртту хьун бюхъайсса номердал багьа ци буссаривгу. Агана зува хIарамзадатурал хъяврин бувну бухьурча, баян бувара ихтиярду дуруччай органнайн, зула операторнал службалийн. Миннал бусантIиссар зухь ци дантIиссарив, булунтIиссар аьркинсса номерду.
Агана вичIа «Билайн» связь духьурча, вища оьвчин хьунтIиссар уква вай номердай: 0611, 6-99-99.
«МТС» связь духьурча, вай номердай: 0890, 8-800-333-08-90.
«Мегафон» дусса ухьурча, оьвчияра 0500, 8-800-333-05-00 номердай. ОператорначIан оьвтIисса чIумал, бусияра зуйнма оьвкусса ягу SMS гьан дурсса номер, хIарамзадашиву дурминнащал ххуллу ласун.
Ци дан аьркинссар, агана интернетрайхчIин ци-дунугу ласун арцу гьан дурну махъ, я тIалав дурмур къадукIлай, я арцу зана къадуллай бухьурча?
ИнтернетрайхчIин ци-дунугу машан ласун ччай бухьурча, кIулбакъасса даххултрал тIутIимур буллан анавар мабуккару, хаснува ми арцу гьан дувара тIий бухьурча. Интернетраву зун ччимур зат ккаккан дан бюхъайссар, подделка духьурча, интернетраву му кIул дан захIматссар.
Укунсса иширттаву цахъи личIлулну бухьурча, зулва бакIран дигьалагрур. Зунна кIул дакъасса сайтрай ци-дунугу ласланнин, му сайтрая гьарзат кIул бан хIарачат бара, ххал бувара мунил хIакъираву цума ци тIий урив. КIул бувара мукунма даххуя, мунал даврия.
Зу бакIрай бацIан аьркинссару, агана кьайлухсса багьа хъиннува чIивисса бухьурча, мукунма даххул адрес ягу телефон ккаккан дурну дакъахьурча. Му чIумал зун я подделка гьан дан ччай бикIантIиссар, ягу зул арцу цIиккин ччай бикIантIиссар.
ЦIанасса чIумал интернетраву хъинну ппив хьуну дур хIарамзадашиву. Инсантал хъяврин бишин цIу-цIусса ххуллурду ляхълай бур. Мунияту хъинну личIлулну бикIан багьлай бур. Агана зува интернетраву хIарамзадатурахьхьун бириярча, зува ялапар хъанахъисса кIанттурдайсса ихтиярду дуруччай органнайн баян бара, миннал ххалбигьавуртту дурну, уголовное дело сукку даншиврул.
ЛичIлулну бикIияра жуликтурал къатIухьхьун къабириян!
ДР-лул МВД-лул
пресс-служба
ХIадур бувссар
А. Аьбдуллаевал
