Вай гьантрай республикалул ФСИН-лул управлениялий хьунни нанисса шинал 9 зурул лажиндарай дурсса даврил хIасиллу дуллалисса заседание. Коллегиялул заседание дачин дурну ия ДР-лул УФСИН-лул хъунама, виваллил службалул генерал-майор Муслим Да­ххаев.

А. Аьбдуллаева
БатIаврий гьуртту хьунни управлениялул хъунаманал заместительтал, отделлал каялувчитал, управлениялул биялдаралусса идарарттал хъуними, ДР-лул ОНК-лул председатель ХIасан Айгунов.
Коллегиялул заседание тIитIлай, Муслим Даххаевлул кIицI лавгунни вай 9-гу зурул лажиндарай цала управление ва мунил биялдаралусса идарартту Аьрасатнал ФСИН-лул хъуниминнал ккаккан бувсса, мукунма республикалул УИС-рал системалуву мугьлат бакъа щаллу бан багьлагьисса масъаларттаха зий бивкIшиву. УрчIва зурул дянив республикалул УИС-рал даврил хIасиллу дуллалисса цалва ихтилатраву Муслим Даххаевлул бувсунни цалла ккаккиярттая ва уттиния тихунмай щаллу буллантIисса масъаларттая. Ванал бусласимунийн бувну, хIакьинусса кьини ДР-лул УИС-рал давриву хъуннасса къула­гъасралун ласласисса масъала бур дуснакь бувминнал ихтиярду дуруччаву.
— Хъуннасса агьамшиву ду­сса ишну хьунни «Жямат ялув бацIаврил нюжмар» тIисса даврил лагрулуву жул идарарттайн Аьрасатнал ПрезидентначIасса граждан общество хьхьичIуннай шаврил ва инсаннал ихтиярду дуруччаврил Советрал вакилтал бияву, — увкунни М. Даххаевлул.
ОНК-лул Председатель ХIасан Айгуновлул бувсунни комиссиялул даврия, ва давриву цанна хьунадакьлакьисса захIматшивурттая.
— Дуснакь бувминнал ихтиярду дуруччаврил масъаларттаха ччянияцIава бавкьуну, хIала-гьурттуну зий буссар Дагъусттаннал ОНК ва УФСИН, — увкунни цалва ихтилатраву ХIасан Айгуновлул.
Заседаниялул ахирданий Муслим Даххаевлул кIицI лавгунни цалла давриву хъунна­сса къулагъас дуллай бушиву граждан обществалул институтирттащал бавкьуну зузаврил, спецконтингентран къулайсса шартIру дузал даврил ва медициналул кумаг баврил, мукунма цалва зузалт мюхчан баврил масъаларттах. Бувсунни чялиш дуккан дуршиву коррупциялул иширттан ххуллу кьукьинсса ва ми ашкара бансса давуртту.
Ихтилатру къуртал хьуну махъ давриву хьхьичIунсса ца­ппара зузалт лахъ бунни чиндалул, цаппарассаннан дуллунни ХIурматрал грамотартту.