Ссайну дакIний лирчIри вин ларгсса нюжмар? Укунсса суал ва мунинсса жавабру дулару жу лях-карах жулва кказитрай.

МахIаммад Аьбдуев, ишбажаранчи:
— Ларгсса нюжмардий жулва лакрал миллат мискин хьунни Совет Союзрал Виричу Якьув Сулайманов жуятува лагаврийн бувну. Якьув Сулаймановлул бу­ссар хъинну авадансса, ялун нанисса никиран эбратрансса биография. Якьув МахIаммад-Аьлиевичлул пахру-ххара бакъашиврул, ва Виричу ушиву цикссагу шиннардий щинчIав кIулнувагу къабивкIссар. Ванал къучагъшиврийну, дур­сса чувшивурттайну жура тарбия дуллан аьркинссар ялун нанисса ник. Хъун дяъвилий Якьув Сулаймановлул дурсса чувшивурттугу дуссар бусалардавун дагьну. Ттун хъинну кьурчIи бизлан бикIай уттизаманнул оьрчIан мукунсса вирттаврая, миннал гьунардая чанну кIулшиву ва бувагу кIулну бакъашиву. Мунийн бувну, жува аьркинссар мудан ми вирттаврал чувшивурттая ялун нанисса никирахь буслан, ччя-ччяни вирттаврал аьпа абад буллалисса батIавуртту дуллан. Ванал оьрму ялун нанисса никирансса тарбиялул дарсри. Мудан пахрулий икIара Якьув Сулайманов лакрал миллатраясса уну тIийгу. Якьуб МахIаммад-Аьлиевич ва мунал къучагъшивуртту абадлий личIантIиссар жулла дакIурдиву.

Муслим Идрисов, инженер:
— Махъсса ппурттуву жучIава телевизорданувух бусайсса хаварду бур чIявуми криминалданиясса. Ларгсса нюжмардий тIурча «Звезда» тIисса Аьрасатнал телеканалданувух ккаккан бунни Дагъусттаннаясса ца жагьилнал цала каруннах бувсса чартту кьукьайсса ва бакьин байсса комбайн. На махIаттал хьуну, хIайран хьуну ливчIра жагьилнал бюхъу-гьунарданий. Ва комбайн бувсса Даирдул къуртал бувну бакъар цавагу ВУЗ, бувккуну бур бувагу 9 класс. Даирдул був­сса комбайнрал механизм чил билаятиртталминнуяр шамийлла кьюркьуну дацIлай дур. Яла-яла зунттаву, ххуллурду, асфальт бакъасса кIанай комбайн бувну бур ца кIанава ца кIанайн бачин бан бюхъайсса куццуй. Зунттаву, ххяллал кIанттай му механизм дуллай айивхьукун, шяраваллил жямат мунал му бакIуйн дуккан даншиврийн вих хъанайгума къабивкIун бур. Машинарттал техникалул элму кIулсса экспертъталва бивкIун бур ванан бувчIин буллай ца цувалусса инсаннаща мукунсса даву щаллу дан къашайшиву. Аммаки, ванал бюхъу ялтту бувккун, дунияллул билаятирттал машинарттал фирмардал инженертураща дан къабюхъайсса даву дурну душиву исват бунни. Мяйжаннугу уттинин укунсса цIушинна щилчIав дурнугу да­къар. Укунсса комбайн бикIу, цамур техника дикIу итадакьайссар ххирасса, миллионнансса оборудование дусса ва чIявусса хьхьичIунсса специалистал бусса хъунисса заводирттай. Ва комбайналуща ца кьини 50 кубометра чарттал дуван бюхълай бур. Уттирив Даир пикрилий ур укунсса журалул комбайнартту итабакьлансса давриха зун. На буниялагу кIукунсса гьунарду каруннива буккайсса, бюхъу бусса инсантурал дурсса давурттал акъа хIайран къаара. Ва ххуллухгу щалла дунияллийх, щалва Аьрасатнавух жула дагъусттанлувнал цала каруннах комбайна бунни тIисса цIа ларгун тIий пахрулий ивкIра. Агана жучIава укунсса комбайнартту буллай байбиширчангума, даву дакъасса цикссагу инсантуран зунсса кIанттурду хьунссия.

ПатIимат Аьлиева, учительница:
— Ларгсса нюжмардий жулва школардай най дуссия «Да­гъусттан – ттул буттал улча» тIисса цIанилусса тIиртIу дарсру. Му дарс дихьлахьисса кьини шагьрулул 16-мур школалийн, ниттил мазрал учительтал бакъассагу, бувкIун бия дагъусттаннал литературалул тарихрал дарсирдал учительталгу. Ттул тамансса хIал хьуна ва дарсирайн оьрчIру багьайкун хIадур буллай. Жу миннащал лахьлай бивкIру жула Ла­кку билаятрал цIа-кьини бюхттул дурсса ПартIу ПатIимал, Хан-Муртазааьлил, Сурхай-ханнал ва мукунма цаймигу вирттаврал тарихру. Тарихрал дарсирдал учительтурая сакин хьусса жюрилул жул захIматран лавайсса кьимат бивщунни. ДакI рахIат хьунни, рязийну ливчIра ттущара ттунна ччисса куццуй ва даву дан бювхъуну тIий. Ва ца тIиртIу дарс дишаву дакъассагу, жул школалий ниттил маз лахьхьаву мурадрай дуллалисса давурттив чIярусса цаймигу дуссар. Жул дуклаки оьрчIругу мудан гъирарай мукунсса давурттавух гьуртту шайссар.
ХIадур бувссар
И. Саидовал