АЬБДУЛЛАГЬЛУЛ АРС ДИБИРОВ ДИБИР
Лахъисса хIаллай цIуцIи шанийгу ккуруккаву дурну, октябрь зурул 17-нний ахиратравун лавгунни мубараксса зунтталчу, Дагъусттаннал медакадемиялул доцент Аьвдуллагьлул арс Дибир Дибиров.

Увссар Дибир Аьбдуллаевич Ххутрал шяраву 1927 шинал. Шяраву 7 классгу бувккуну, увхссар Гъумучиял педучилищалувун. Гагу марцIсса ххювардай къуртал бувну, 1944 шинал Мукьардал байбихьулул школалул каялувчи хьуссар. 17 шинавусса Дибирдул му школалий зий ца шингу дурну, Ххутив увкIун арулла шинал школалул завуч хьу­ссар. Микку 5 шинай зийгу ивкIун, яла, Гъумуксса дянивмур даражалул школалий математикалул дарсругу дихьлай, райОНО-рал педкабинет­рал хъунаманугу ивкIссар ва цува ххаллилсса педагог ушиву чIалачIи бувссар. 1952 шинал увхссар Да­гъусттаннал пединститутрал математикалул факультетрайн ва ги­ккува комсомолданул секретарьнугу зун ивкIссар. Амма Дибир Аьбдуллаевичлун даимангу хиял бивкIссар хIакин хьунсса. Му хиял дузрайн буккан баншиврул, му шинал 1-мур курсгу «ххювардай» бувккуну бунува, махъмур шинал экзаменнугу дуллуну, мединститутравун увхссар ва мугу ЯтIул диплом лавсун къуртал бувссар. Мединститут бувккуну цува Гъумукун санэпидстанциялул хъунаману тIайла увккукун, кутIасса чIумул мутталий райондалунгу, Гъумучиял шяраваллингу мюнпат бусса тамансса давуртту дурссар. Яла аспирантурагу бувккуну, медициналул элмурдал кандидатгу хьуну махъ дайдирхьуссар Дибир Аьбдуллаевичлул къашайшалт элмулийн чул бивщуну хъин баврил ва студентътуран цIакьсса кIулшиву дулаврил давуртту.
СССР-данул цIуллу-сагъшиву дуруччаврил отличник, Дагъус­ттаннал ва Аьрасатнал лайкь хьу­сса хIакин, чIярусса ХIурматрал грамотартту, медаллу ларсъсса Дибир Аьбдуллаевичлул цалва бувтсса щалва оьрмулий халкьуннангу, паччахIлугърангу, цала буттал шяраваллингу бувсса мюнпат хъинну чIявуссар.
Ванал сакиншинначишиврул гьунар кIул хьусса ПаччахIлугърал Аьрасатнал банкрал Дагъусттаннайсса отделениялул бакIчи Сиражуттин Илиясовлул, медакадемиялуву зийгу унува, ванахьхьун изму буллуссар цалва зузалтран тIивтIусса поликлиникалий каялувшиву дан ва му давугу тамансса шиннардил мутталий Дибир Аьбдуллаевичлул лавайсса даражалий дурссар.
Дибир Аьбдуллаевичлул ас-ламус буну, духIин дуну тарбия бунни цала шамагу арсгу: АьбдурахIиннуя – медициналул, ХIусайннуя археологиялул элмурдал кандидатътал хьунни, чIивима МахIаммадгу миннаяр махъун къаагьанссар.
ХъатIий, бивкIу-буккурдай, Ххувшаврил байрандалул батIа­вурттай Дибир Аьбдуллаевичлул жагьилтураву патриот асарду загьир хьунсса, ми ас-ламус, мяърипат дуну занакьулу хъанансса, дин-исламрал тIутIимунийх бачинсса ххаллилсса дарсру дишайссия.
Угьара хьуну ухьурчагу, хъин­сса инсан ахиратравун гьаву – му кьурчIисса, пашмансса иш бур. Дибир Аьбдуллаевичлул бивкIулулгу шяраваллил жяматгу, архIал зий бивкIмигу, кIулмигу хъинну къума лаган бувшиврийн щак бакъар.
Дибир Аьбдуллаевич ахиратравун лагаврил кьурчIишиву кIидачIлай буру ванал арсурваврахь, кулпатрахь, гъан-маччаминнахь, ванал дустурахь ва кIулминнахь. Цал бунагьирттал аьпа баннав, алжаннул ххари аннав, махънал оьр­мурдай барачат бишиннав. Амин.
Ххутрал жямат

——————————————

Вай гьантрай, оьрмулул 87 шинаву, жуятува лавгунни цалва жяматгу, лакрал миллатгу ххирасса, республикалий бусрав хьусса хIакин, пагьму бусса ишккакку, мукъул пасихIсса усттар
Дибиров Дибир Аьбдуллагьлул арс
Халкьуннал эбрат ласунсса хасият, тIуллу дия Дибирдул. ЧIявусса инсантурал цIуллушиву дуруччаврил къаралданий, чIявучин бусравну ия райондалий медициналул давурттай зузиний. Дибир Аьбдуллаевич жуятува лагаврил кьурчIишиву кIидачIлай буру мунал арс Дибиров АьбдурахIиннухь, махъсса оьрчIахь, кулпатрахь, гъан-маччаминнахь, Ххутрал жяматрахь. Цан Алжан нясив баннав. Махънан мунан къабуллумур оьрмугу булуннав. Гьав нурданул дуцIиннав.
Юсуп МахIаммадов, Абакар Къюннуев, Юсуп Рамазанов,
Соня Макьаева, Амсар Къажлаев, Лакрал райондалул администрациялул зузалт, Райондалул Мажлисрал депутатътал

———————————————

Уттигъанну, оьрмулул 77 шинаву, цIуцIи шаний лахъигу къалавгун, жуятува лавгунни буттал ватангу, Лакку кIанугу ххирасса хIакьсса зун­тталчу, пагьму бусса пишакар
Хизриев МахIаммад Алхаслул арс
МахIаммад жулла райондалул агьалинан кIулссар чIарав ацIуну, аьмал хъинсса инсанну. 1992-1994 шиннардий, захIматсса, билаятрал тагьар да­ххана хьусса чIумал каялувшиву дуллай ия райондалий. Цащава шаймур бувна агьалинал ахIвал, багьу-бизу ххуй бан.
МахIаммад хъинну бусравну ия цалва мачча-ляхъиндалул, уссурссуннал, шяравуминнал дянив.
МахIаммад жуятува лагаврил кьурчIишиву кIидачIлай, жижара буллай буру мунал оьрчIахь, кулпатрахь, уссурссуннахь, гъан-маччанахь, щалва жяматрахь. Цал гьав нурданул дуцIиннав, алжан нясив баннав.
Юсуп МахIаммадов, Абакар Къюннуев, Юсуп Рамазанов,
Соня Макьаева, Амсар Къажлаев, Мусалав Мусалаев,
Лакрал райондалул администрациялул зузалт,
Райондалул Мажлисрал депутатътал