Дайдирхьунни цIусса дуккаврил шин. Мунищала архIал зун бивкIунни спортрал школардугу (ДЮСШ). Мукунсса школардайгу дур личIи-личIисса кружокру: волейболданул, футболданул, акробатикалул, лачIун буккаврил ва цаймигу. Жул, Ккуллал 1-мур школалул, майдан гьар кьини вай кружокирдайн заназисса оьрчIал бувцIуну бикIай. Спортрал тIуркIурду чIявусса цаймигу журардал бикIай, масалдаран, шашкарду ва шахматру. На цIухху-бусу бувссия дуссарив мукунссагу кружокру тIий. Дакъасса дия. ХьхьичIва оьрмулул хъунисса арамтал бикIайва ккурчIа-чIирах шахматирттай буклай. Утти мигу къабикIай. «Яр, жула шяраву шахматирттая за кIулсса, миннуй уккайсса цучIаввагу уривав?» — куну, цIувххукун, ттул ниттил увкуна: «Яр, та Бадруттинхъал МахIаммад, гужсса шахматирттай уккур. Ялагу та усса ур шахматру батIлай, коллекция буллай». Хьунабавкьура на Сулайманов МахIаммадлущал. Ванал бусласаврийн бувну, ва тIуркIу бувккун бур Индиянава Чапура тIисса шагьрулия. Аьрасатнавун бивну бур 9-11-ми аьсрурдай, яла Ираннавух Ккавкказнавунгу. МахIаммадлун цанма шахматир­ттай уклан лавхьхьуну бур чIивину унува. Цал классраву, яла школалий, яла райондалий, гихуннай рес­публикалий ва армиялийгу цалва гьалмахтуращал уклан ивкIун ур. Махъ билаятрай хъанахъисса турнирдавухгу гьуртту хъанай, хьхьичIунсса кIанттурду бугьлан ивкIун ур. Цалва гъирарайну, цува хIарачат буллай уклай ивкIнугу, цукун уккайссарив, ци аьмаллу бикIайссарив лахьхьин буллали­сса шахматирттаясса литература дикIайсса къакIула тIар. Яла цаярва гужну цайми буклан бикIайхту айивхьуну ур ккалан. Ваная гъира бивзун бур ЩайхахIмадов Магьдингу. Куннаяр кув ххув шавай, бух шавай, оьннасса чIумуй бук­лайнма бикIайсса бивкIун бур. МахIаммадлул буслай, Магьди цаяр ххув хъанан ивкIуна тIар ялу-ялун, цанчирча, цува зузи­сса кIанай компьютерданувусса шахматирттай икIу, укун вана-танащал икIу уклайна икIайва тIар, цаллив чIун къадикIайва тIар, СумбатIлив дарс дишин занай уну тIий. 1983-ку шинал армиялия учIайхту, 20 шинал хьхьичIва бувксса, «Наука и жизнь» тIисса шаппа лявкъусса журналданий МахIаммадлул дурккуну дур ца немецнал картардал ца колода датIин цими шин лагайрив ххал дуллай ивкIшиврия чирчусса макьала. Хьуну дур 8 шин, цанчирча немец лази лавкьусса буну тIий, миннал картарду ччи-ччиний къакьаритайсса диркIун дур. Микку МахIаммадлун пикри хьуну бур шахматру батIлан. БавтIун бур дуклакинийгу, армиялийгу, цува зузисса кIанайгу къачансса комплектру. Ссивирлив зун лавгсса чIумалгу лявкъуну бур 2 комплект шахматирттал. Москавлий стройкалий зузисса кIанайгу лявкъуну бур цаппарасса. Амударья неххачIасса къундалувугу лявкъуну бур цимигу шинай гиву бивкIсса, кIялагу лавгсса шахматру. Гайгу СумбатIуллал школалун буллуну бур. Танал булавай, гаманал чурив буссар куну лякъавай, ца-цаних тIий батIлай, кутIану учин, хьуну бур личIи-личIисса шахматирттал 20 ккило. Тамансса шахматру бавчIуну бур цалва гьалмахтурайх, буллуну бур музейравун, творчествалул къатлун, цаппара районнал школардангу. Му игра цуппагу инсаннал пикри хьхьичIунмай байсса бур. ХьхьичIва, бусласаврийн бувну, гьар шяраву цIа дурксса буккулт бивкIун бур. КкурчIа-чIирах бикIу, шаппа бикIу, муксса шавкьирай буклай бивкIун бур­хха шахматирттай, куннайн кув чIурду лахъ буллай, ххув хьума ух хьуманал ччаннахун ччан бахчин бувну, му утлай бивкIун бур. Уттигъаннунин гьарца школардай кружокру, шагьрурдай клубру, соревнованиярду дайсса диркIхьурчагу, ттирив хъамава бивтун, сан къабуллай бур му тIуркIу тIий, буруккинттарай буслай ур МахIаммад. ДиркIун дур чIунну Хъусрахь Абачара ХIусайнаевлул цIанийсса шахматирттал турнирду дайссагу. Гания мукьах Агъуллал райондалия бувкIми жуламиннаяр бух хъанан бивкIукун, му райондалийсса гьарцагу школалий шахматирттал ва шашкардал кружокру дихьлай байбивхьуну бур, жучIарарив миннухсса къулагъас чан хьуну дур. Тамансса шиннардил хьхьичIра дакIнийри ттулла нинугума шахматирттал ва шашкардал кружок дихьлай, мигу цалла тIалав дурну, ялагу ца-кIира шинава дукьан дурна. Ялагу учительтурал дянивгу дикIайва соревнованиярду дайсса чIунну. Ттуява тIайла хьуну, ттизаманнул халкьуннан цукун буккайссариввагу къакIулли шахматирттай. Мунияту аьркинни школардай, институтирдаву шахматирттал кружокру тIитIин, гай хъинсса аьдатру цIулаган даншиврул. Карина Далиева