Ноябрьданул 4-нний Дагъусттан Республикалул БакIчи Рамазан АьбдуллатIипов гьуртту хьунни Халкьуннал Цашиврул байрандалий. Республикалул каялувчинащал архIал бия Дагъусттаннал парламентрал спикер Хизри Шихсаидов, ДР-лул ХIукуматрал Председатель Аьбдуссамад ХIамидов, ДР-лул Халкьуннал Мажлисрал депутатътал, исполнительный властьрал органнал каялувчитал ва цаймигу.

МахIачкъалаллал хъунмур майданнив, чIявусса халкь бавтIсса тагьардануву, ПаччахIлугърал гимналул чIурдахун тIитIин бунни Аьрасатнал Федерациялул ва Да­гъусттаннал ттугъру.
Шадлугъру дайдихьлахьисса махъ лавхъунни хъуншагьрулул бакIчи МахIаммад Сулаймановлул. «Халкьуннал цашиврул кьини – жула билаятрал халкьуннал цашиву ва патриотшиву ккаккан дуллалисса яла цIуну хIасул хьуми байраннавасса ца хъанахъиссар. Ганил мяъна хъанахъиссар так циняв цачIун хьуну жущава бюхъантIишиву, захIматшивурттугу дух дурну, хьхьичIунмай бачин цIу-цIусса ххувшавурттайн, оьрму хъинчулийнмай баххана буван.
Дагъусттаннал агьалинал кка­ккан буллай бур личIи-личIисса миллатирттал инсантурал цашиву, лагма лагаву, дусшиву. На дакI дарцIуну ура жула Президент В. В. Путиннул ва Республикалул каялувчи Р. АьбдуллатIиповлул лагма лавгун жущава бюхъантIишиву жущава шайсса захIмат бишин Аьра­сатнал Федерация тIутIайхь бичин бан», — увкунни ганал, бавтIми барча буллай.
Рамазан АьбдуллатIиповлул барча увкунни майданнив бавтIсса ва циняв дагъусттанлувтурахь паччахIлугърал байранну хъана­хъисса Халкьуннал цашиврул кьини: «Му оьрмулуву жунна хъинну аьркинссар. Цанчирча агьали ца хьурча, ччимур масъала щаллу бантIиссар», — увкунни Республикалул каялувчинал.
«Халкьуннал цашиву – ми укунмасса махъру бакъари. Ми оьрмур, философияр, ми асардур, инсантурал хIарачатрур. Буттал КIанттул цIанийсса дяъвилий жулва билаят ххассал хьусса халкьуннал цашиврулли. Ттуршазарахъул дагъус­ттанлувтал гьаз хьуссар цалла Ватан дуруччин, дугу дурурччуссар. Аьпа баннав циняв цалла жанну жулва Буттал кIанттухлу кьурван дурминнал. Дагъусттаннай 59 Совет Союзрал, Аьрасатнал Виричу уссар, цанчирча дагъусттанлувтал муданма бивкIссар сивсусса, чувшиву дусса аьралийтал, цалва билаятрал патриотътал, муданна цIакь дуллай бивкIссар миллатирттал дусшиву.
ХIакьину Аьрасатнан бигьану бакъар, ганил лагмава вас-ццах бутлатисса чIурду бур. Укунсса тагьардануву жува аьркинссар национальный лидер – Владимир Владимирович Путиннул лагма лаган, ганал цIусса тарихрал тагьардануву ххассал дурссар жула Буттал Ватан, гьаз дуллай ур цIанагу жулла билаятрал цIа.
ЦIуллу аннав национальный лидер В. В. Путин!
Жува чулийн буккан буллай буру республика куртIсса кризисравату, кьяркьаравату, коррупциялул иширттавату, низам дакъашиврувату дуккан даврил захIматсса масъалартту. Ми гьарзат жулва халкьуннацIун даркьусса дакъар, ми дахчилай дур жулла цашиврухун. Мунияту жува аьркинссар цIакь дуллан жулла цашиву, дуруччин жулла бусравшиву. Жулва барачатсса ялун бучIанмур – цасса билаятравур, оьруснал агьалинащал хIала-гьурттунур.
ЦIуллу хьуннав Аьрасатнал халкьуннал дусшиву ва цашиву! ЦIуллу хьуннав Дагъусттаннал халкьуннал цашиву!» — куну къуртал дунни Дагъусттаннал БакIчинал барча баву.
ХIадур бувссар
ХI. Аьдиловлул