Вай гьантрай Дагъусттаннай ва Къиримнаву хьунни Совет Союзрал кIийла Виричу, бусалардавун агьсса летчик-испытатель АхIмадхан Султан ниттил увсса кьинилун хасъсса мероприятиярду. Октябрь зурул 26-нний гьар шинах Виричунал цIанийсса Каспийскаллал №8 школалий, оьрмулул 25 шинаву СССР-данул кIийла Виричу хьусса, цIа дурксса летчик дакIнийн утлатисса, мунал оьрмулия бусласисса мажлис бувай. Миккува, хьхьичIава «октябрятанал» кьюкьравун кунма, лахъа-хъунну, шадлугърай кьамул бувай «ахIмадхановцынал» кьюкьлувунгу.
П. Рамазанова
Севастопольлай АхIмадхан Султан дакIнийн утлатисса мероприятиярдай гьуртту хьунни Дагъусттаннал хIукуматрал Севастопольлайсса полпред Мурад СалихIовгу. Микку гьуртту хьуну бур мукунма Къиримнал федерал округрайсса АьФ-лул Президентнал полпреднал вакил Владимир Толкачев, Къиримнал вице-премьертал Дмитрий Полонский ва Руслан Бальбек, Къиримнал Госсоветрал вице-спикер Ремзи Илиясов, Симферопольлал шагьрулул Советрал председательнал хъиривчу Тейфук Гафаров ва цаймигу къуллугъчитал. Гьаннайсса, Къиримнал хъуниминнал диялсса къулагъас дур АхIмадхан Султаннул, СССР-данул паччахIлугърал премиялул лауреатнал, 603 аьрали вылет дурсса, душманнал 30 самолет руртсса летчикнал цIа-кьини хIурматрай ядаврих. Къиримнал агьалинан летчик бусрав шаврил хIуччардавух бухьунссар 1956 шинал къиримнал татар реабилитировать бувара тIисса миннатрал чагъарданий цалчин къулбас дурминнавух АхIмадхан Султан ивкIшивугу.
ЦIадурксса летчикнан хас дурсса мероприятиярду хьуну дур Симферопольлал хъун майданнивгу, Алупкалийсса АхIмадхан Султаннул цIанийсса музейравугу.
Мурад СалихIовлул Виричу дакIнийн утлатисса митинграй лавхъсса махъ тикрал буванна шикку:
«АхIмадхан Султаннущал ца полкраву къуллугъ буллалиманал цIувххуну бивкIун бур Виричунахь, ина летчикнал даврия шацI къавхьурав, циван къакьаритара му даву куну. АхIмадханнулгу мунахь укунсса притча бувсун бур: «Барзулт тачIав аьрщарай къалитIайссар. Оьрмулул ахир гъан хъанахъисса кIулну, ми бусса чаралий ссавруннайн, кIийн, хъит тIун бикIайссар, ссавруннайра жангу дуллуну, ливтIуну махъри аьрщарайн багьайсса».
АхIмадхан Султан буниялттунгу ссавруннай жан дуллусса зунттал барзур. ЯлунчIинсса октябрь зуруй мунан 95 шин хьунтIиссар. Дагъусттаннал ва Къиримнал агьалинал му юбилей бюхттулсса летчикнал цIанин лайкьну, лахъсса даражалий дуванссар тIисса хьул-умуд бур.
