Ноябрьданул 5-нний Кабардин-Балкарнал хъуншагьру Нальчикрай Аьрасатнал ХIукуматрал Председатель Дмитрий Медведевлул каялувшиврулу хьунни БакIссавнил Ккавкказуллал маэшатрал даража лавай баврил ХIукуматрал комиссиялул заседание.
Заседаниялий гьуртту хьунни Аьрасатнал Президентнал БакIссавнил Ккавкказуллал федерал округрайсса вакил Сергей Меликов ва ДР-лул БакIчи Рамазан АьбдуллатIипов.
Ххалбигьлай бия СКФО-рал субъектру инпортозамещениялувух гьуртту шаврил ва мукунма округрай инвестициярдал проектирдацIун кабакьулунсса паччахIлугърал гарантиярттал хIакъиравусса масъалартту.
Дмитрий Медведевлул бувсунни, региондалий душиву промышленностьраву ва шяраваллил хозяйствалул импортозамещениялул гужсса каширду, миннул хъунмасса кIану бугьантIишиву «дорожные картарду» ишакаш давривуми бутIраву, ххи бан экономикалул бюхъурду, гьарза бан зузи кIанттурду.
«БакIссавнил Ккавкказуллал округрай дур цаппара хъунисса проектру, ми дузрайн дуккан даврийну бюхъан тIий бур импорт чан дан ягу муния азад хьун химиялул промышленностьраву ва хIаллил промышленностьрал комплексраву. Округрал предприятиярттаву технология цIудуккан дурну махъ ишла бан хьун най бур авиациялул ва медициналул промышленностьраву, фармацевтикалул, радиоэлектроникалул импортозамещениялул бутIраву, мукунна куклумур промышленностьрал, янна, усру дуккан даврил импортозамещениялул бутIраву», — увкунни Дмитрий Медведевлул.
ХIукуматрал Председательнал мукъурттийн бувну, хъуннасса мяъна дур шяраваллил хозяйствалулгу, Ккавкказуллал тIабиаьт шяраваллил хозяйствалун даркьусса душавугу хIисавравун лавсун. Ми бюхъурду дузрайн буккан бан аьркинссар. Аьркинни гьарзану ласлан ахънилссаннул, ахъулссаннул, къалмул, къюмайтIутIул ва ризкьилул бакIлахъия.
Дмитрий Медведевлул бувсунни агьамсса мяъна дусса проектру дузрайн дуккан дуллалиминнан паччахIлугърал чулуха кумаг буллантIишиву.
Заседаниялий ихтилат бувсса Дагъусттаннал БакIчи Рамазан АьбдуллатIиповлул бувсунни республикалий хIадургу дурну дузрайн дуккангу дуллай бушиву «ЦIусса индустриализациялул» приоритетсса программа. «Га программалийн бувну, жунма аьркинссар 2018 шинайннин промышленностьрал производство лядуккан дан 2,5- ллийла. Р. АьбдуллатIиповлул мукъурттийн бувну, хIакьину промышленностьрал индексран хасну жува бугьлай буру хьхьичIунсса кIану. Амма Дагъусттаннал экономикалуву промышленностьрал производствалул бутIа лап чIивисса бур, мунийн бувну импортозамещениялияту Дагъусттаннан кумаг хьунссия производство лядуккан дан. Дагъусттаннай бур хъунисса заводру, миннувух бур военно-промышленностьрал комплексраву зий бивкIссагу, ми цIана щаллуну зий бакъар. Республикалий дур 800 азардаксса квадрат метрарду илкинсса площадкарттал, микку хьунссия производство дузал дан.
Рамазан АьбдуллатIиповлул гьартану бувсунни цIанасса ппурттуву Дагъусттаннал заводру цукун ва ссаха зий буссарив.
Дагъусттаннал БакIчинал гьаз бунни ххалбигьин цаппара масъалартту: республикалийн инвестициярду дучIан даншиврул, хIукуматрал гарантияртту ккаккан даврил хIакъиравусса, промышленность лядуккан даврил, хаснува электроэнергетика лядуккан даврил хIакъиравусса, тIабиаьтрал луртанну ишла даврил хIакъиравусса, конкуренция духIан бюхъайсса продукция итадакьлакьаврил, Каспий хьхьиривату навт буккан буллалаврил хIакъиравусса ва цаймигу.
Рамазан АьбдуллатIиповлул бувсунни мукунма республикалий дузрайн дуккан дуллай бушиву «Эффективный агропромышленный комплекс» тIисса проект.
ХIадур бувссар
ХI. Аьдиловлул
