МахIачкъалалив 14 къурушрая 16 къурушрайн бияннин маршруткардаву багьа лахъ хьун бюхъайшивриясса хаварду сукку хьуну бур вай гьантрай.
Проезд ххира хьун бюхъайшиврия журналистътурал дяниву хьусса ихтилатраву буслай ур МахIачкъалаллал промышленностьрал ва транспортрал управлениялул хъунама Андрей ХIусайновгу:
— Транспортрал хIаллихшиннардил даража къулай буваншиврул, жула халкь рахIатну давурттайн, цанма аьркиннийн бияншиврул, чIал къавхьуну проездрал багьа гьаз бувансса хIукму кьамул буван бюхъайссар жулва хъуншагьрулий. Багьа гьаз баврил сававгу махъппурттуву газрал ва бензиндалул, транспортрал запчастирдал багьри лахъ шаврицIун бавхIуну бур, — буслай ур А. ХIусайнов.
Ванал бусаврийну, маршруткардал шупиртуран маэшат къахъанай буну тIий, жулва хъуншагьрулул ххуллурдай маршруткарду чан хьуну бусса бур. Шинал дайдихьулий ми бивкIхьурча 3 000-ксса, цIана бусса бур 2 200 маршрутка. ЧIалачIиссаксса, 800 шупир маршрутрая лавгун ур. Сайки циняр маршрутирдай 5-нния 10-ннийн биянуксса машинарду чан хьуну бусса бур. Укунсса тагьар хIасул шаврил сававгу дур ччуччия, запчастру ххира хьуну, халкь ххилаххаврия маэшат, дуланмагъ къахъанахъаву, мукун цанма къулаймур кIанай зун лавгун бур халкь.
Управлениялул хъунама, мукунма, ххи буллай ур хьхьунил ссят 8-нния тихунмай халкь ххилаххисса маршруткардал шупиртурахьхьун проездрах 20 къуруш ласлансса ихтияр дулунсса хIукмугу цIакь бан бюхъайшиву. Цанчирча, цIан ларкьусса чIумал халкь чанну буну тIий, оьнма-аьдада заназаврия хайр бакъа тIий, маршруткарду маршрутирдайн къабуклай, хьхьувай кьатIув бувксса халкь азурда хъанай битан къабучIишиву.
Шиккува кIицI лаганну махъва-махъ МахIачкъалалив жяматрансса транспортрал багьа гьаз бувну бивкIшиву 2013 шинал мартрал 1-нния тинмай.
ХIадур бувссар
З. АьбдурахIмановал
