Буттаева Марзижат АхIмадовна, политикалул элмурдал доктор, ДГУ-рал социал технологиярдал кафедралул профессор, ДР-лул культуралул лайкь хьусса зузала, Аьрасатнал Хъаннил союзрал правлениялул член, ДР-лул Хъаннил союзрал президиумрал член, МахIачкъала шагьрулул Хъаннил союзрал председатель.

Имара Саидова
Инсаннал цалва язи бувгьу­сса элмулул ххуллий хьхьичI бивхьусса мурадругу бартбивгьуну, лаваймур шачIанттуйн лавхъун унагу, миннуйнугу гьашиву къадурну, ляхълайна ур ялагу элмулул куртIнивун уххансса ххуллурду. Мяйжаннугу мукунсса инсантал оьрмулухун кIулшивуртту ахттар дуллай, ялу-ялун цалла пишакаршиву магьир дуллай, бацIаву дакъа зий буссар. Щинни къатIааьнсса цала захIматран хIукуматралгу лавайсса кьимат бивщуну, халкьуннангу бусравну бушаву. ХIакьинусса кьини ми цинявгу, элмулул ххуллий бикIу, цила бувгьусса къуллугъир­ттай бикIу, хьхьичIуншивуртту Марзижат Буттаевал так цилла куртIсса кIулшивурттайну ва чIярусса шиннардий бувсса хъунмасса захIматрайнур лайкь дурсса.
Хъунма хIал къавхьунни ЦIущардал шяравасса Буттаева Марзижат АхIмадовнан политикалул элмурдал докторнал цIа дуллуну. Вай гьантрай Марзижат АхIмадовнал оьрмулуву хьунни ца уттигу ххаришиву. Дуллунни ванин элмулул аралуву ласайсса яла лараймур – профессорнал цIагу. Марзижат АхIмадовна хъана­хъиссар утти ДГУ-рал социальный технологиярттал кафедралул профессор. Жулла республикалийсса хъанниву политикалул аралувусса ахттаршиннарду даврихлу, микку тIайлану къуццу баврихлу, Марзижат АхIмадовна ДР-лул Президент Рамазан АьбдуллатIиповлул чулухасса Барчаллагьрангу лайкь хьуссар, буллуссар ванин «Мой дагестанский народ» тIисса, цува авторсса, дакIнийхтунусса чичрурдащалсса лугу. Ми иширттаву хьхьичIун личаврийн бувну, Рамазан АьбдуллатIиповлул Марзижат АхIмадовнайн вихшала бунни цIуну республикалий сакин бувсса «Народный фронт «За Россию» тIисса Дагъусттаннал региондалул отделениялий каялувшиву давугу. Ва буниялагу хъинну жаваблувсса, гьарица хIукуматрал хъунаманал бувсса хIукмурдал ялув бацIавуртту дурну, ми цукун щаллу буллай буссарив ххалбигьлагьисса, бигарду чIявусса къуллугъ бур. Укунсса, тIалавшиннарду гьарзасса, жаваблувшиву хъунна­сса дусса къуллугърай зунсса даврил опытгу, кIулшивурттугу дусса хъамитайпа жулва миллат­раясса бушивугу му пахру бан лайкьсса иш бур.
Марзижат АхIмадовнал оьр­­мулуву, давриву хьусса хьхьичIуннайшивурттая уттинингу цимилгу чивчуссар жулва кказитрай.
Ва цуппагу доктор, профессор тIисса элмулул ларайми цIарду ларсун, миннуйну гьашиву дурну бацIаймур ба­къар. Ванил цила оьрмулуву язи бувгьумур агьаммур ххуллугу бур хъаннил масъаларттан хас був­сса. Мунил хIакъиравугу бацIаву дакъа дуллайнма бур хъаннил оьрму бигьа бансса, хъис бунугу куклу бансса давурттив.
Вай гьантрайгу бувккунни Марзижат АхIмадовнал хъаннин хас бувну чивчусса «Женщина как субъект политики государства» тIисса лугу. Шиккува кIицI лаган, жулла рес­публикалий хъаннин хас бувсса масъаларттал хIакъиравусса ахттаршиннарду дуллалисса ва цалчинсса хъамитайпар. Аьрасатнал Хъаннил союзрал, Щалагу Аьрасатнал жяматийсса идаралул правлениялул член Марзижат АхIмадовнал ваниннингу чирчуссия хъаннил яла цIурувкьюми масъаларттан хас дурсса цикссагу элмийсса давуртту.
Ва луттиравугу гьарта-гьар­зану бувсун бур хъамитайпалуя, цIанасса паччахIлугърал политикалул субъект хIисаврай. Монография цурдагу дур уттизаманнай хъуннасса агьамшиву дусса, цIанасса политикалуву хъаннил тIитIлатIисса цIушиннардая, миннал личIи-личIисса даражалул паччахIлугърал структурардаву бугьлагьисса кIанттая. Мунийнгу кьимат бищун бюхълай бур политикалуву хъанахъисса хъуни-хъунисса цIушиннардан. Республикалийгу кьамул дурну дуссар мукунсса хъами социал-политикалул иширттавух хIала бувансса проектру, программарду ва закондалуцIун даркьусса цаймигу къулайшиннарду.
Му бакъассагу, хъаннин хас дурсса монографиялуву автор ккаккан буллай бур жяматийсса-политикалул ва социал-экономикалул хьхьи­чIуннайшавриву хъунма­сса бияла бушиву хъами хIала бу­ххаврия.
Марзижат Буттаевал хъаннин хас дурну чирчусса моног­рафиялул рецензентал бур политикалул элмурдал доктор, профессор Г. И. Климантова ва философиялул элмурдал доктор, ДГУ-рал профессор Р. М. Абакарова. Вайннал цалла рецензиялувугу лавайсса кьимат бивщуну бур хъаннил политикалуйн биян буллалисса асардан. Профессор Марзижат Буттаева цилва луттираву кIицI лаглай бур политикалул ишру дузал баврин къагьассар так ца паччахIлугърал властьрал органну чIарав бацIаву тIий. Чара бакъа аьркинну бур граждан обществалул бияла гьаз баву, цалчинва-цалчин хъаннил жяматийсса идарарттал, хъаннил цIу-цIусса потенциаллу сакин бувну, жяматийсса ва политикийсса давурттавух гьурттуну хIукмурду кьамул булланшиврул. Мукунсса граждан обществардал дуллалисса давурттив чIяруну ишла дуллалиссар региондалийсса дакьаву дуруччаву мурадрайгу, тIий бур луттирал автор. Аммаки хъаннил бияла ми иширттаву багьайкун тIалавну бакъашивриягу рязийну бакъар ва.
Ва монография цурдагу чирчуну дур, аьлимтурая байбивхьуну, укунмасса инсантурайн бияннин, бувчIин бигьасса ку­ццуй. Луттиравусса документру гьануну лавсъсса мисаллайну ишла бан бюхъайссар элмулуву ва практикалуву. Ва мяйжаннугу тематикалул щаллусса курс бусса, гьарца ишираву аьркин бан бюхъайсса справочник кунмасса лу бур. Мукунма ва ишла бан бюхъайссар политикалул процессру лахьлахьисса, ахттар буллалисса пишакартураща, преподавательтураща, студентътураща ва аспирантътураща.
Авторнал цилва бусласисса куццуй, хъунмасса гъираращал чивчусса ва лу ахиргу дунияллийн бувккун, ванил бивхьусса захIмат дузрайн буккаврищал, ва элмулул ххуллийсса циняв­ппагу шачIантту лахъаврищал Марзижат АхIмадовна барча буллай, учин ччай бур, гьарца дуллалимунил ахир хайрданийн дуккаваннав, тIайлабацIу баннав, ина жулва лакрал миллатран муниярвагу бусравну, ххиранува личIаннав куну.