Гьашину ризкьи ябаврил бутIуву ларсун дур 20,8 млрд. къурушрансса бакIлахъия ягу дукIумур шинах бурувгун 103,9%. Ризкьилул ва аьнакIал дикIул 90,8 азарда тонна хьуну дур, дукIумуних бурувгун 106%. НакI ттирзуну дур цинярдагу 612,4 азарда тонна (103,2%), лавсун бур 155,5 млн. ккунуккирттал. Хозяйстварттаву бур лухIи ризкьилул 989,2 азарва бакI, миннува гъаттара бур 464,5 азарва бакI. Ятту бур дукIуксса – 5 млн. ва 653 азарва бакI.

ХIасан Аьдилов
НакIлиха зузисса Аьрасатнал 54 региондалувату жулла республика дур хьхьичIунми кIанттурдай. Шяраваллил хозяйствалул предприятиярттай ца оьлища ттирзуну дур 1347 кило накIлил, дукIуних бурувгун 2,1 % ххишаласса. Гьашину дурну дур 10 ризкьилул ферма, 1410 хIайвандалунсса, шинал ахирданий дурну бакIуйн ду­ккан дантIиссар уттигу 5 ферма. Мукунма шинал ахирданийннин къуртал бан най бур нис дайсса 15 цех, миннувату 5 зий байбивхьуну бур.
Агьали дукиялул щаллу баврил масъала ччясса мутталий чулийн буккан баншиврул, аьнакIал дикIул ва дикIуя цайми продуктру дайсса 5 цех бувну зийгу бур, шинай 3600 тонна аьнакIал дикIул дуккан дайссар ва 10 млн. ккунуккирттал булай­ссар цехирдаву.
Бувну къуртал бавай бур Нугъайнал райондалий «Боз торгай» КФХ-луву хъуни ризкьи биххайсса цех.
Зий бур 7 охладитель 26 тонна лагайсса, миннуву дишайссар агьалинаща машан ласайсса накIгу.
Гьашину 9 зуруй дурну дур 14 лухIи-гъаттарансса откормочный площадкарду, тиккура дантIиссар яттинсса фермарду, кормоцехру, ятту кьатIувппай буккан байсса кIанттурду. 2014 шинал ризкьилул продукция дантIиссар: яттил, гъаттарал ва аьнакIал дикIул – 210 азарда тонна, накIлил – 792,7 азарда тонна, ккунуккирттал – 222,4 млн.