«Щалва Аьрасат» тIисса СМИ-рдал Цалчинмур фестиваль хьуссар 1996 шинал. Га шинаяр шиннай ганил формат даххана хъанай дакъар: цIа дурксса журналистътуращалсса, аьлимтуращалсса хьунабакьавуртту, семинарду, брифингру. Фестивальданий гьуртту хъанахъими занай бур ца конференц-залданува цамунивун. Гьарзатрах вичIидишин, гьарзат ккаккан гъира бур. 

Яла агьаммур даву тикку дия, сакиншинначитурал пикрилий, «Журналистика – это миссия» тIисса форум. Ганий хъуннасса къулагъас дуллай бия Украиннаву хъанахъисса иширттах.
— Украиннаву цIана нанисса дяъвилияр ххишала най дур къизгъинсса инфляциялул талатаву, микку чялишну гьуртту хьуну бур журналистъталгу, — увкунни Аьрасатнал Журналистътурал Союзрал председатель Всеволод Богдановлул. – Фестивальданий жу ххалбигьланну, информациялул дяъвилул тагьардануву жулва пикри-зикрирду пишалул кодексрал этикалуцIун, даврил щаллу буллалиминнал биялалуцIун цукун бакьин бантIиссарив. Ихтилатру, пикрирду личIи-личIисса бикIан най бур. Микку бувчIин аьркинни, жува, журналистътал, жяматрал «яру ва вичIив» хъанахъишиву. Журналистнан аьркинссар дяъви нанисса кIанайн увкIун, гьарзат цанна кка­ккан, баян ва тIайлану ми иширттая чичин ва бусан инсантурахь. Мури журналистнал агьаммур даву.
Форумрай ххалбивгьунни цаймигу масъалартту.
Цамургу хьунни фестивальданул агьамсса семинар – «Аьрасатнаву журналистнал даврил правалул ва этикалул аспектру» тIисса. Журналистътурал ххалбивгьунни СМИ-рдал хIакъиравусса закондалуву цIусса дахханашивуртту даврил масъала. Масъалалул хIакъираву ихтилат бунни СМИ-рдал ихтиярду дуруччаврил центрданул директор Галина Араповал. Ганил пикрилий СМИ-рду правалул чулуха бакъачIинсса ххуллийн буклай бур.
Жулва региондалийн багьайсса дискуссия хьунни «Остывшая горячая точка» на карте Российской Федерации. Имидж Северо Кавказского региона в центральных и региональных СМИ» тIисса. Темалул хIакъираву ихтилатру бунни Аьрасатнал Журналистътурал союзрал Москавуллал шагьрулул цачIуншиврул председательнал хъиривчу Лариса Шамиковал ва «Мусульмане ТК «Россия-1» программалул каялувчи Василий Антиповлул. Уттигу цал гьаз бунни билаятрай Дагъусттаннал ва Ккав­кказуллал стереотипру душаврил хIакъиравусса масъала.
Дагъусттаннал Журналистътурал союзрал председатель Аьли Камаловлул пикрилий, дачин дурну дур оьмур, къаххуймур ялун личин дуллалисса информациялул политика: «Мукун циван хъанахъиссаривгу бувчIлай бакъар. Амма хIисав хъанай бур махъсса ппурттуву чIявусса Аьрасатнайн къаршисса санкциярду баян буллалисса тагьардануву агьамну билаятрал каялувчиталгу чансса паракьат хьуну бушиву. Утти жун чанну баллай бур жуятувасса къаххуйми хаварду. Умуд бур укунсса тагьар тихуннайгу лахъи лаганшиврийн ва жул регион му стереотипрацIату хьуншиврийн».
Даврил уртакьтуращалсса ца­ппара хьунабакьавуртту дунни «Журналист на войне» тIисса темалун хасну «Российская газеталул» журналист Владимир Снегиревлул, «Россия» телеканалданул корреспондент Александр Сладковлул ва жула ватанлув Руслан Гусаровлул. Миннал бувсунни цивппа цукун мюхчан хьуну бивкIссарив дяъвилул иширттая бусласисса чIумал.

Дагъусттаннал СМИ-рдугу гьуртту хьунни

Фестивальданий гьуртту хьунни РГВК «Дагестан», РИА «Дагестан», «Дагестанская правда», «ХIакьикьат», «Илчи», «Замана», «Елдаш» кказитру, «Женщина Дагестана», «Проджи», «Дагестан» журналлу.
Ккаккан бунни Расул ХIам­затовлул луттирду, лезгинкалул макьанну, Дарбантуллал ва Къизлардал коньякру, оьргърал усттартурал дурсса затру.
Аьли Камаловлул бунни хъун бакъасса интеллектуалсса конкурс, хъамаллуврал жавабру дуллунни Дагъусттаннаясса суаллахьхьун. ЛичIи-личIисса регионнаясса журналистътурал бувсунни «цалвамур Дагъусттанная», республикалийсса цалва дустурая, кIулсса инсантурая, ккавксса кIанттурдая.
Циняв рязину бия хьунабакьаврия.
«Дагестанская правда» кказит­рал фестивальданийн ларсъсса «Живи и дари жизнь другим» тIисса проектран диплом буллунни. Га проектрай рирщуну дия онкологиялул къашавайсса оьрчIан кумагрансса макьалартту.
Дагъусттаннал чулухасса цамургу проектрал ларсунни фестивальданул награда – «Рыцарь российской политики» тIисса хъундакъасса документальный кино хIадур дурну дия «Дагестан» РГВК-лул.
Га дур Дагъусттаннал БакIчи Рамазан АьбдуллатIипов цалва къуллугърай авцIуну махъ дурсса давурттал хIакъиравусса кино.

Бигьалаганссагу чIун дия

Даврия махъ лавгру ЛухIи хьхьирийн. Хьхьирил зу­маницI стол бивхьуну бия, тикку мюрщисса личIи-личIисса рангирдал чарттал суратру дуллан лахьхьин буллай бия. Тиккура дия личIи-личIисса суратру, трафаретру, кьаланну – винна ччимур дия канилу суратру дихьлан.
Ялагу 7 гьантлий фестивальданий гьуртту хъанахъими бия ххуйва-ххуйсса хIавзирдаву щинавун бучIлай, гьузуй, занай бивкIру аквааэробикалийн, гидромассажрайн, фитнес-клубирттавун, лечлай бивкIру гьавалий.
Кино-концертрал залдануву гьарца кьини ахттакьун чIумал ккаккан дуллай бия цIу-цIусса кинорду. Гьаннайсса бизар хьунсса иш бакъая.
К. ХIусайнаева
ХI. Аьдилов