Октябрьданул 15-17-нний, ДР-лул БакIчи Рамазан Аьбду­л­латIиповлул ва МахIачкъалаллал администрациялул бакIчи МахIаммад Сулаймановлул сипталийну, марцI дуллай бур Октябрь революциялул цIанийсса канал ва мунил чIарахсса кIанттурду.

Вай гьантрай шагьрулул Советский райондалул администрациялул зузалт КОР-данул каялувчиталну хъанахъисса «Мин­мелиоводхоз РД» ФГБУ-рал пишакартуращал архIал лавгун бия каналданул марцI бан захIматшивуртту хъанахъими кIанттурду ххал бан. Советский райондалул администрациялул бакIчи Мурад Аьлиевлул му­къурттийн бувну, щин нанаврихун бахчилай бур каналданул ялтту бивхьусса турбарду, тивун дичлачисса затру, инженерсса сооруженияртту. Ми гьарзат дурминнайн тапшур бувну бур октябрьданул 15-нин гьарзат дукьан дан. Му даву бакIуйн дуккан даншиврул, тикку зузи бантIиссар шагьрулул авариярттан хасъсса къуллугъру.
«ХIакьинусса кьини МахIач­къалалив КОР-данул щалва манзилданий ламурду марцI буллай бур. Хъуннасса захIматшиву дуллай дур шагьрулий ялапар хъанахъиминнал каналданучIа цирича, каналданул ялувгума къатри даврил. Утти тай къатри дукьан дан аьркинссар. Тай къат­равату КОР-данувун дичлай бур цIинцI-ччюрк, тивун буккан буллай бур канализациялул турбарду (стокру). Амма щиначIату яла гъанми къатрачIансса манзил бикIан аьркинссар 15-метралияр къачансса. Утти ми иширттайну каналданучIан техника гъан хьуну, каналданул чIан марцI дан бюхълай бакъар цаппара кIанттурдай», — бувсунни «Минмелиоводхоз РД» ФГБУ-рал директорнал хъиривчу Шамил ХIусмановлул.
КОР-дануватусса щин нани­ссар Къизилюртуллал, Къумторкъалаллал, Къарабудахккантуллал ва Къаяккантуллал районнайн, Къизилюрт , Каспийск, МахIачкъала ва Избербаш шагьрурдайн. Каналданувун щин наниссар Сулакь неххавату ва ишла дайссар багьу-бизулуву, ичIура.
Мунияту КОР-данул марцI­шиврух хъуннасса къулагъас дуллан аьркинссар.
ХIасан Аьдилов