ЦIусса дуккаврил шин дайдишаврищал архIал хъуншагьрулул администрациялийн аьрзарду букIлай бур школалий дуклаки оьрчIал нитти-буттахъаяту, маршруткардал шофертурал оьрчIру къабуцлай бур тIий. Мукунсса тагьар дур МахIачкъалаллал чIарахсса кIанттурдай, тикку къатрачIан гъанну школарду бакъар, оьрчIан аьркинну бур занан жяматийсса транспортрай.
ХIасан Аьдилов
Маршрутрал таксирду паччахIлугърал транспорт дакъар, му дур цивппа шофертал заллусса транспорт. Мунийн бувну, шофертуран ччан къабикIай уква оьрчIру буцлан.
«Махачкалатранс» МУП-рал мюхчаншиврул отделданул хъунама Валерий Шияннул увкусса куццуй, маршрутрал, таксирдал шофертурая аьрзарду букIлай бур, амма ми шофертал даврия букьан буван хъанай бакъар. Цанчирча миннахь ихтияр дур ххуллух багьа къабуллалими къабуцлан. Цавагу документрай чивчуну бакъар, дуссарив шофернахь ихтияр оьрчIру къабуцлан. «Мунийн бувну, нитти-буттан бувчIин аьркинни шофертурал тIутIимур ва оьрчIахьхьун ххуллухсса арцу дулаван аьркинни», — тIий ур Валерий Шиян.
Укунсса чагъар бувкIунни «Илчилул» редакциялийн МахIачкъалаллал администрациялул прессалул къуллугърал цIанилу.
Редакциялул чулуха ххи бан бур укунсса зат. Ва утти кIира шинни Дагъусттаннал хъуншагьрулий жяматийсса транспорт, яни автобусру ва троллейбусру, занантIиссар тIий, амма мукунсса паччахIлугърал транспорт уттигу шагьрулий дакъар. Циванни мунилсса къабуллалисса шагьрулул администрациялул. Агарда мукунсса жяматийсса транспорт зий диркIссания, школалий дуклаки оьрчIругу, захIматрал ветеранталгу, инвалидталгу зананссия уква му транспортрай.
