АММАЛ ДУШ АМАЕВА МУСЛИМАТ
Вай гьантрай, мадара хIаллай къашавайгу бивкIун, оьрмулул 91 шинаву Москавлий жуятува личIи хьунни ххаллилсса зунттал хъамитайпа, дунияллий цIа дурксса аьлимчу Амаев Амирдул оьрмулул дус, уртакь, Амаева Муслимат Аммал душ.
Муслимат бувну бур 1923 шинал ГьунчIукьатIрал шяраву ххишала акъа лавайсса дарзинал кулпатраву.
МахIачкъалалив 2-мур школалий 10 классгу къуртал бувну, Муслиматлул Дагъусттаннал медициналул техникум къуртал бувну бур. Щар хьуну бур цила ссурахъу Амаев Амирдун. Муслиматлул мунияр махъсса щалва оьрму Москавлий лавгун бур цила лас Амирдущал. Вайннал ур ца арс.
ХIалимсса дакIнил ва хасиятрал заллу Амир Жабраиловичлул мудан учайва: «На ваксса хIаллай ялапар хъанахъисса, Муслиматлул аякьалийнура», — куну. Мяйжаннугу Муслимат ххишала бакъа аякьа дуллай бивкIун бур, цила ласнал цIуллу-сагъшиву дуручлай. Аллагьу Тааьланалгу Муслиматлул бувмур щялу къабанссар, мунал цIимилул хъаттиралу мунансса кIану лякъинссар. Аммахъал тухум хьхьичIвагу дин-чак дусса агьлу бивкIссар. Муслиматлул бувтсса оьрмугу чIявусса хъаннин эбратрансса хъанахъиссар.
Муслиматлул бивкIулул кьурчIишиву кIидачIлай, жижара буллай буру ванил ласнахь, жучIава хъинну хъунмасса хIурмат бусса Амирдухь, арснахь, уссу-ссурваврахь, цинявппагу гъан-маччаминнахь. Цил рухI алжаннул ххари даннав.
Амирдухьхьунгу Аллагьнал ссавур дулуннав ва кьурчIишиву духIансса.
ГьунчIукьатIрал жяматрал цIанияту Амин Аьбдуллаев
————————————————-
Мюртазалил арс Кьурбиев МахIаммад
Октябрь зурул 3-нний, оьрмулул 85 шинаву аьпалухьхьун лавгунни ххаллилсса лаккучу, Дагъусттаннал университетраву чIярусса шиннардий зий ивкIсса профессор, философиялул элмурдал кандидат, Ваччиял шяравасса Кьурбихъал МахIаммад. МахIаммад увну ур июнь зуруй, 1929 шинал. ЧIивину унува ппугу ялату лавгун, хъуними кIия уссугу Хъун дяъвилийн бувцуну, захIматну ларгун дия МахIаммадлул оьрчIшиву.
1949 шинал, ЧIяйннал дянивмур даражалул школагу къуртал бувну, МахIаммад зун ивкIун ур Ккуллал райОНО-рал хьхьувайсса школардалсса байма инспекторну. 1950 шинал увххун ур Дагъусттаннал пединститутрал филологиялул факультетрайн. Гагу отличнайну къуртал бувну, зун ивкIун ур ЧIяйннал дянивмур даражалул школалий мазрал ва литературалул учительну. 1963 шинал, оьрмулул 33 шинаву, МахIаммад дуклан увххун ур МГУ-рал философиялул факультетрайн. Гиву МахIаммадлул, практика хIисаврай, лекцияртту бувккуну бур МГУ-лул химический факультетрал студентътурахь. Гайннавухгу бивкIун бур махъ ДГУ-рал проректорну зий ивкIсса МахIаммадбековгу, ДГТУ-рал кафедралул заведующийну ивкIсса М. Вагьабовгу, ДГМА-лул доцент С. Жамаловгу. Лекцияртту буккаву бакъассагу, МГУ-раву МахIаммадлул дачин дурну ивкIун ур американал, венгриянал, румыннал ва кубанал студентътуращалсса жяматийсса ва дуккаврицIун дархIусса давурттивгу. 1965 шинал декабрь зуруй МахIаммадлул щаллу дурну дур «Проблемы диалога национальных культур народов СССР» тIисса кандидатшиврул диссертациягу.
1966 шиная шинай МахIаммад Кьурбиев зий уссия ДГУ-рал философиялул кафедралий личIи-личIисса факультетирттай философиялул ва эстетикалул лекцияртту ккалай. Му бакъассагу, ва уссия филологиялул факультетрал деканну, философиялул кафедралул заведующийнугу. МахIаммадлул хIарачатрайну ДГУ-раву тIивтIуна цIусса «История и теория культуры» тIисса кафедрагу. Га кафедралул заведующийну зузиссаксса чIумуй МахIаммадлул хIадур бувна аьркинсса учебно-методическийсса документругу.
1991 шиналсса конкурсраву МахIаммад лайкь хьуна профессорнал цIанин. Зузисса чIумул мутталий Кьурбиев МахIаммадлул канила дурккун дур 50-нния лирчусса элмийсса давуртту: «Сближение, взаимообогащение, расцвет» тIисса монография, «Запад, Восток, Россия в диалоге культур», «Духовное развитие народов Дагестана в 20-30-х годах» тIисса исследованияртту, «Тема судьбы и представление о времени в драме Г. Саидова «Лудильщики» тIисса статьяртту ва учебно-методический давуртту. Бувсса захIматран кьимат бишлай, МахIаммадлун дуллуна «Заслуженный работник образования РД» тIисса цIагу, «Ветеран труда», «За доблестный труд» тIисса хIурматрал лишанну ва медаллу.
Аьлимчу хIисаврайгу, инсан хIисаврайгу Кьурбиев МахIаммадлул хIурмат ва кьимат лахъсса бия студентътурачIагу, ванащал зузисса аьлимтурачIагу.
МахIаммадлул юбилейран хас бувсса, «Философская вахта Магомеда Курбиева» тIисса цалва статьялуву ДГУ-рал философиялул кафедралул заведующий Мусттапа Билалов ур укун тIий: «Магомед Муртазалиевич – один из немногих в Дагестане философ, способных на качественное творческое дерзание в науке и образовании… он по-человечески красив, как гражданин, достойный дагестанец, педагог, философ и уважаемый в многонациональном трудовом коллективе Даггосуниверситета коллега».
Укун бюхттулсса кьимат хIалал бувна цанма МахIаммадлул, аьлимчу хIисаврайгу, инсан хIисаврайгу. МахIаммад ия пахру бакъасса, инсантуращал хIалимсса, аькьлулул тамсса, дан-дитанмуниву шавхьсса, ва жул жяматрал вакилли, жул миллатрал вакилли куну пахру бан лайкьсса, ва буллалисса инсан.
МахIаммад жул жяматрал пахруя. Гьарца бивкIу-буккулий, тяхъашиврий ва цайми-цаймигу жяматрал хьхьичI бавцIусса масъаларттавух чялишсса гьурттушиву дайссия.
МахIаммадлул гъан-маччаминнащал жулла пашманшиву кIидачIлай, учин ччай буру: цал гьаттаву нур лахъаннав, алжаннул кьамул аннав, цан къабуллусса оьрму кулпатран, оьрчIан, гъан-маччанан булуннав куну.
Дустал, гьалмахтал,
Ваччиял жямат
—————————————————
КьурчIишиву кIидачIлай, жижара буллай буру жула бусравсса, хIурмат лавайсса хъуначу Амаев Амир Жабраиллул арснахь ванал ххирасса кулпат, оьрмулул дус-уртакь
Муслимат
яла лагаврийн бувну. Ванил барачат махъ ливчIун лякъиннав, гьав нурданул дуцIиннав, алжаннул ххари баннав. Ванилцириннал оьрмурду лахъи баннав.
«Илчи» кказитрал коллектив
—————————————-
Хъуннасса кьурчIишиву кIидачIлай, жижара буллай буру Дагъусттан Республикалул Халкьуннал Мажлисрал депутат, Мулиннул арс Гъазиев Гъазихь, ванал ххирасса уссу
МахIаммад
дунияллия лагаврийн бувну. Мунан къабуллумур оьрму махънан булуннав, цув алжаннул ххари аннав.
«Сияние» Научно-производственное объединениялул коллектив
—————————————-
Хъуннасса кьурчIишиву кIидачIлай, жижара буллай буру Дагъусттан Республикалул Халкьуннал Мажлисрал депутат, Мулиннул арс Гъазиев Гъазихь, ванал ххирасса уссу
Мулиннул арс Гъазиев МахIаммад
аьпалул шаврийн бувну. Имандалий лавгун лякъиннав, рухI алжаннул ххари даннав, махъминнал оьрмурдай барачат бишиннав.
«Илчи» кказитрал зузалт
