Октябрьданул 13-нний луртаннал щаллу байсса организация «Махачкалатеплосервис» ОАО-рал каялувчинал ххал бунни МахIачкъала шагьрулул къатраву гъилишиву дулайсса шагьрулул котельнирду. Га предприятиялул биялалий бур 122 котельня. Миннувату чIявуми кугьна хьусса бур, мунияту гай бакьингу бувну, зузи бан аьркинну бур.
ХIасан Аьдилов
Котельнирдаву зий бур лаборантътал, оператортал ва слесартал. Вай гьантрай ми циняв зий бур котельнирду бакьин буллай.
ЦIанасса ппурттуву теплотрасса (гъилишиву дачайсса турбарду) бакьин буллай бур. Гъилишиву турбардаву щаллуну личIаншиврул турбардайх бакьлай бур полистиролданул макьара, га макьара цуппагу гава предприятиялий буллай бур.
Баххана бан багьну бивкIсса теплотрассалул 3,4 километралия ливчIун бур баххана бан 200-300 метраксса. ЦIана зий бур Орджоникидзел кучалийсса теплотрассалуха.
ЦIана давуртту щаллу даврил хIасиллах бурувгун учин бучIир, хъуншагьрулул котельнирду гъилишиву дулун хIадурну бур куну.
«Махачкалатеплосервис» ОАО-рал гендиректор Шяъбан Кьасумовлул мукъурттийн бувну, предприятиялул бур тамансса захIматнийн багьсса масъалартту. Агьали предприятиялун буржлувну бур 140-150 млн. къуруширттал. Предприятие цуппагу буржлувну бур «Газпром межрегионгаз Пятигорск» ООО-ран 2000 млн. къуруширттал.
Шиккува бусан, ва организациялучIа августрал 1-нния шиннай зий дур абонентътурал отдел, шиккун бувкIун шайссар хIаллихшиннахсса арцу дичин. ХьхьичIра му даву дайсса диркIссар «Махачкалаводоканалданул».
