Сентябрьданул 25-нний Дарбантлив Нарын-Къалалий хьунни шагьрулун 2000 шин шаврин хасъсса Республикалул миллатирттал культурардал фестиваль «Традиция», 2000-яр ххишаласса инсантал бувкIун бия га байран хъун дангу, цанма тамашалунгу.
ХIасан Аьдилов
Фестиваль сакин дурну дия ДР-лул Культуралул министерствалул, Республикалул Халкьуннал творчествалул къатлул, ПаччахIлугърал «Нарын-Кала» тIисса тарихрал-архитектуралул ва художествалул музей-заповедникрал. Тикку гьуртту хьунни пишакартурал ва халкьуннал творчествалул коллективру, балайчитал бия Лакрал, Лаващиял, Бабаюртуллал, Къурагьиял, Рутуллал, Сергокъалаллал, УнцIукIуллал, МахIарамккантуллал, Нугъайннал, Хасавюртуллал, Хивуллал районная, Дарбант ва Избербаш шагьрурдая. Концертрай балайрду увкуна АьлихIажи Щамххаловлул, МирзамахIаммад Исяевлул, ПатIимат Мажидовал, Альберт Мачишевлул, Алибий Романовлул, Зугьра ХIамзаевал ва цайминналгу.
Фестивальдания махъ къалалувух бунни экскурсия, бувсунни «Нарын-Калалул» тарихраяту, тиккусса экспонатирттаяту, архитектуралул гьайкаллаяту.
Къалалувун буххайсса кIанттул хьхьичI хьхьуттайх лахълай бия пагьламантал, гай бия «Гьунар» тIисса группалувасса. Чансса тихунмайну бия миллатирттал майданну, миллатирттал традициялийнусса культуралул центрдал хъюрду (этноподворье).
Декорациялул ва дайканил магьирлугъ, миллатирттал дукрарду даву, халкьуннал касмурдал затру даву ккаккан дунни Бабаюртуллал, Къарабудахккантуллал, Лакрал, Лаващиял, Нугъайнал, Сергокъалаллал, УнцIукIуллал ва цаймигу районнал.
Халкь рязину бия фестиваль даврия, гьар шинах дан, бучIан рязину бия, цаппарасса бия гъинттул гьар зуруй, личIи-личIисса кIанттурдай дулларчагума хъинну хьунссия, цалва миллатрал балайрду, аьдат-эбадатру, лаххияртту хъамакъадитланшиврул, ялун нанисса никирттангу кIулну дикIаншиврул, тIий.
