Лакку билаятрал, лакку мазрал бучIантIимунил буруккинттарай­сса лакрал жагьилтурал хIасул дурну дур «Лакку Билаят» тIисса цIанилу Культурно-просветительский центр.

Центрданул сиптачигу, гьану бивзмагу, жагьилтал ккурандалул лагма лаган бувмагу ур КIулушацIрал шяравасса Нураттин Юсупов.
Дагъусттаннал агьалинан ххуйну кIулсса чичу Нураттин Юсуповлул арснал Рашидлул арс. ЦIанихсса ттаттал цIа дирзсса. Нураттин дуклай ур Дагъусттаннал паччахIлугърал педуниверситетраву психологиялул факультетрай. Режиссернал оьвкуну, артистну зун увкIун ур Лакрал театрданувун. Гьаннайсса, ванал уттива бусанмур чIявур. Амма къадагъа дуллалисса миннат буллай ур ихтилатрал бакIрайва: «Ттуятува бюхъайссаксса чанну чича лажинни. Центрданул даврия бусавур ттул мурад».
Нураттин укун тIий ухьурчагу, ххуйну лакку маз кIулсса, дакIнийхтуну лакрал балаллийсса жагьилнахьхьун цалвамур оьр­мулул хIакъиравусса ца-кIива суалвагу къабуллуну къабучIия.

— Нураттин, ина мукун­сса патриот уккавриву буттал ппу Нураттин Юсуповлул бияла цукссари?
— Бияла, мяйжаннугу, хъунмассар. На мудангу ккалай икIара мунал чивчумур. ОьрчIансса шаэр хIисаврай машгьур хьусса инсан ур. МуницIухва, мунал гьарцагу шеърилуву лаккучунал рухI, жан дур. Лакрай хъуннасса дакIцIуцIаву дур. Ттула тта­тталсса бакъагу, на лакрал цайми чичултрал произведениярттугу буккара. Жулва тарих, литература жунма кIулну бикIан аьркин­ссар. Чара бакъа. КъакIулшиву – къаххуйшивур.
— Актер хьунсса хиял чIаваний, тачIав бу­ссияв?
— Бакъассия. ТачIаввагу. Лакку мазрахсса ччавумур оьрчIнийра цIакь хьуну дур ттуву.
— Буси инара хIасул дур­сса ккурандалул агьамми мурадирттая.
— Жунма цинявннан ххуйну кIулли жулва миллатрал чIявусса агьлу тарихийсса ватандалий яхъанай бакъашиву, республикалул кьатIушав, цайми регионнай, шагьрурдай мина дирхьуну бушиву. Сайки 70% жагьилтуран къакIулли лакку маз. Миллатрал иш гьаксса къаххуйну багьну бушиврул исватшиннар.
Жун пикри хьунни агьали чантI учин бансса мурадрай, хIасул буван жагьилтал батIайсса, агьамсса масъалартту гьаз буллалисса, лакку мазрах къулагъас дуллали бувансса Центр «Лакку билаят». Мяйжаннугу миллат ххирасса, миллатрай аьтIутIисса, гьарцагу лаккучунавусса дард, къюву дур ттувугу. Циванни бюхттулсса тарих бусса жулва миллатрал иш оьчулий багьан аьркинсса? Ягу багьан битаву жунма багъишла бантIиссарив ялун нанисса никирал? Ппухъруннал лажин кIялану, адаврай ябувсса тарих миннал цIардан лайкьну ва хIурматрай ябан жувагу буржлувссару. Мури жул гьанумур мурадвагу.
— Цуку-цукунсса давур­ттаха зун дакIний буру?
— Лакрал театрдануву ла­кку маз лахьхьин буллалисса курсру тIитIлай буру. Лакку маз лахьхьин гъирасса инсантурайн оьвтIий буру, бухьхьияра жучIан тIий. Курсирдайн занан хьунтIиссар хъуниминнащагу, мюрщиминнащагу. ЛичIишиву дакъа. Оьрмулул шиннардих бурувгун шанма группа хIасул буванну: чIавамур, дянивмур ва лаваймур. Бувагу лакку маз къакIулминнан азбукалия дайдишин тIий буру дарсру.
Лакку мазрал дарсру дихь­лантIиссар Лакрал театрданул машгьурсса актрисахъул: Уди Аьлиева, Жинасат Дин­махIаммадова, Ларина Оьмарова ва цаймигу.
— Мукун машгьурсса учительтурая лакку маз лахьхьин ччисса чIявусса бикIан аьркинни, ттул пикрилий. Миннал бусласимуних вичIидишинмагу ссал къабагьар! Театр – пасихIсса мукъул ду­ссукъаттар, лабораторияр.
— Цамур хIисавравун ласун­сса кIану. Школалий дуклаки оьрчIаву лакку мазрал дарсирдайн занан багьлай тIий заназисса бикIангу бюхъай чIявуми. ЖучIаннив занантIиссар цивппа хушрай. Маз лахьхьин гъира буну. ЖучIасса курсирдай гъирагу ххишаласса бикIан бю­хъай, тренинграл кьяйдалийсса лахьхьин баву дуну тIий. Цалсса курсру Лакрал театрдануву бикIантIиссар. Ми курсирдайн занан ччиминнал цIухху-бусу бан оьвчара ттучIан ва номерданий: 8.929.870.65.25. Ягу бучIиссар оьвчин Лакрал театрданувун ва «Илчилул» редакциялийн.
— Цаймигу цукунсса давурттив дуллан дакIний буру?
— Цаймигу дуллансса давур­ттив чIярур. ХIакьину багьайкун лакку мазраха зузисса кIива идара бур Дагъусттаннай – Лак­рал театр ва «Илчи» кказит. Мунияту чара бакъа театрданущалгу, редакциялущалгу уртакьну зунтIиссару. Мукъуйну, маслихIатрайну, иширайну чIарав бацIлацIиссагу бур. Цинявннал аьмсса мурад – миллат­рал цIа-кьини адаврай ядаву ва гьаз даву бухьувкун, зунтIиссару лагма лавгун, жулва миллатран хайрмуниха.
Жул группа буссар Интернетраву, «ВКонтакте» сетьрай. Цаймигу социал сетирдайн, «Фейсбукрайн», учиннуча, бу­кканну. Бувагу шанма барзри Интернетраву жул группа хIасул бувну, машгьуршивумур ччянива хIасул бувсса группардалнияр лувсса дакъар. ХIакьину интернетрал, сайтирдал каширдугу ишла буван бюхълай бур жулва хьхьичI бивхьусса мурадру бартбигьланшиврул, хайр-мюнпатрансса проектру зузи дулланшиврул.
— ТIайлабацIу баннав, Нураттин!
Дузрайн букканнав хияллу, цIакь хьуннав умудру!
— Барчаллагь. Зугу, жугу дуллалимуницIун Аллагьналгу кабакьиннав!

Ихтилат бувссар
ПатIимат Рамазановал