ДР-лул территориялий 2012-2013 шиннардий ишакаш дурссар «Развитие малого и среднего предпринимательства в Республике Дагестан на 2012-2015 годы» тIисса республикалул программа. Мукуннасса программартту цIакь дурну дур республикалул цинярда 52-гу муниципал сакиншиннарай.
ХIасан Аьдилов
Ми программарттал мурад хъанахъиссар республикалий чIиримур ва дянивмур ишбажаранчишиву лядуккан давринсса шартIру дузал даву, шайссаксса чIявусса агьали бизнесравун кIункIу баву, бюджетравун налогру гьарзану дучIан дуллалаву.
Ларай кIицI дурсса Программа ишакаш даншиврул, 2012 шинал республикалул бюджетрава личIи дурну диркIссар 105 млн. къуруширттал, федерал бюджетрава тIурча – 285 млн. къуруширттал. 2013 шинал гара Программалун личIи дурну диркIссар 119,9 млн. къуруширттал, федерал бюджетрава – 336,1 млн. къуруширттал, аьмну – 456 млн. къурушру.
ЦIанасса ппурттуву ДР-лий кьамул бувну бур чIиримур ва дянивмур ишбажаранчишиву лядуккан дуллалаврин кумагрансса циняв аьркинсса правалул актру.
Программалуву ккаккан дурну дур 43 пунктрая дузал дурсса давуртту.
Программалуву ккаккан дурсса давуртту ишакаш даврийну 2012-2013 шиннардий 4000-ллихъайсса ишбажаранчитуран ва миннал зузалтран паччахIлугърал чулуха кумаг бувну бур.
ЧIиримур ва дянивмур ишбажаранчишиврул субъектирдал давуртту лядуккан даву мурадрай, сакин бувну бур ми арцул щаллу байсса ДР-лул Микрофинансированиялул фонд.
2012 шинал га Фондрал итадаркьуну дур 90,6 млн. къуруширттансса 138 микрозайм, 2013 шинал – 284,2 млн. къуруширттансса 377 микрозайм.
Кумаг баврийну дузал бувну бур 550-яргу ххишаласса зузи кIанттурду. Шагьрурдай буллай бур бизнес-инкубаторду, миннул цIуну байбихьлахьисса ишбажаранчитал щаллу буллай бур офисирттал ва зузи идарарттал хIаллихшиннал шартIирдай (кьювкьуну), мукунма миннан кумагругу байссар ишбажаранчишиву дачин давриву.
Уттинин 3 бизнес-инкубатор бувну бур.
ЦIанасса ппурттуву бизнес дачин даврил иширттаву ишбажаранчитуран кумаг буллай бур «Дагестанский республиканский центр развития предпринимательства» тIисса къакоммерциялул партнерствалул.
Министерствалул кумаграйну республикалий сакин дурну дур ишбажаранчитурал 7 цачIуншиву.
2012 шинал 457 жагьилсса ва айихьлахьисса ишбажаранчинан бувну бур грантирттайнусса 115,5 млн. къурушрансса кумаг, 2013 шинал – 628 ишбажаранчинан грантирттайнусса 138 млн. къурушрансса кумаг.
2012-2013 шиннардий чIиримур ва дянивмур ишбажаранчишиврул 49 субъектран дуллуну дур 10,66 млн. къурушру субсидиярттал. Республикалий мюрщими предприятияртту зий бур строительствалул, инновациялул, шяраваллил хозяйствалул, цIуллушиву дуруччаврил бутIраву. ХIакьинусса кьини паччахIлугърал хьхьичIсса хъунмур масъала хъанахъиссар ишбажаранчитал бизнесравун кIункIу бансса шартIру щаллу даву.
