Къабюхълай бур щаллагу дунияллийсса урандалул цIуцIавринсса (рак) дарув лякъин. Жунма личIлай бур, жува хъирив буклай, му оьсса цIуцIаврия буруччинсса продукты канан.
ЦIана на чичлачисса затурдия зун укунмагу кIулссар, амма миннух ургъил бувну, ми дукралун ишла дуллай бакъару жува.
Бачияра цIунилгу, ми дакIнийн дирчуну, миннуя чичиннуча. Дурагу 9 журалул продукт дур ракрал клеткарду литIун байсса.
— Зун бувчIусса куццуй, цалчин ва сияхIраву бур лаччи. Ванил иммуннай системалул клеткарду чялиш буккан байссар, мунийну дайшишру шайссар ракрал клеткардан. Аьлимтурал исват буллай бур лаччул инфарктру, инсультру чан дайшиву, кIулну бур лаччул буруччайшиву цIуму ва хъун ххютту ракрая, лаччи дукралуву ишла буллалисса инсантураву цIумулул ва хъун ххюттул рак хъинну чанну хьунадакьайссар. Мунияту аьлимтал маслихIат буллай бур цIуллу-сагъсса инсантурангума гьарца кьини лаччи канан. Нюжмардий канан аьркинссар яла чанну 5 ккарччи лаччул.
— СияхIрал кIилчинмур кIанттай дур шагьнал хъюрув. Вайннул ракрал клеткарду литIун байссар, шиву гьарзассар ххяххиялул белок ва клетчатка. Цумур дунугу хъюруврал (бобы) дуруччайсса дур простата ва ххюттука ракрая.
— Къур ва сияхIраву дур шамилчин. Ва хъинну гужсса антиоксидантри, шиву чIявусса бета-каротин буссар. Къур мудан канакисса инсантураву, кьакьарттуй, кьацIливу, цIумурай, хъун ххюттуй, пурпуххуй рак дусса чанну хьунабакьайсса бур. Къур шархьмурнияр къашархьмур хъинссар.
— Брокколи – ва каландалул (капуста) жура дахьра дайдирхьусса ракрангума дарувну шайсса бур. Брокколигу гужсса антиоксидантри, ванил инсаннал клеткарду талати байсса бур цIуцIаврищал.
— Ттуккулнисирттаву хъинну инсаннал щаллагу организмалун аьркинсса ва хайр бусса затру дуссар. Китайнал халкьуннал 6 азарда шинал хьхьичI хъин хьун ишла дайсса диркIссар азиянал ттуккулнисру. Вайннул дурухлугу дацIан дурну, ракрал клеткарду цалва цивппа литIлатIи байсса бур. Яла инсаннан хайр буми ттуккулнисругу хъанай дур шиитаке, рейши, вешенки ва м.ц.
— Ва сияхIрал ряххилчинмур ххуттай бур малина. Вагу гужсса антиоксидантри, инсан ракрая уруччайсса. Аьлимтурал дурсса ххалбигьавурттайн бувну, кьюнукьи канакисса къулччакIуллай ракрал клеткарду хъинну чан хьуну бур, яла вава дарув ракрал къашайшалтран бувну хIасиллу оьккисса къархьуну дур. Мунияту ва тIааьнсса ва хъинну дарувсса хIаллил ахъулсса канарча хъинни.
— Щюлли чяй. Яла ххуймур чяй Японнава дуркIмурди. ЖучIавасса хъуни ттучаннаву (супермаркетирттаву) дахлахими чяй дакъарча, яла ххуйми азиянал ттучаннай дахлахимири. Мунияту, зува ракрая бурувччуну ччарча, лякъияра азиянал ттучан, гива ларсъсса щюлли чяй хIачIлачIияра.
— Махъра-махъгу — помидорду. Шивугу дур инсаннан хайр бусса хъинну чIярусса затру, личIишиву дакъар помидор свежийну дукарча ягу шархьун, гания дукра дурну дукарчангу. Мудан дукралувун помидор ишла дуллалисса арамтурай простаталул рак хъинну чанну шайсса бур.
— Жулла сияхIравун дутанну ттигу ца продукт, халкьуннан хъинну кIулсса куркума. Ва ишла дай аьвкъу-гъили хьунал, сатиржан хьунал, астма думиннал. Индиянаву предстательный железалул рак къашайсса дур щийчIав, цанчирча вайннал цинявннал дукралун ишла дайсса дуну тIий ва приправа.
Канакияра вай ялув кIицI ларгсса 9-гу продукт, личIантIиссару цIуллуну- сагъну. ЦIуллуну битаннав.
ХIадур бувссар Т. ХIажиевал
