Июльданул 26-нний, Дагъусттан Республикалул Конституциялул Кьини, Дагъусттаннал паччахIлугърал филармониялул гъинтнил площадкалий хьунни шадлугърал концерт. Га хас дурну дия республикалул агьаммур законшиврул актран 20 шин шаврил юбилейран.

ДакIнийн бутанну, дукIу декабрьданий жулва билаятрал дурссар Аьрасатнал Федерациялул Конституциялул 20 шин шаврил юбилей, ганил гьанулий 1994 шинал июльданул 26-нний кьамул бувссар Дагъусттаннал Конституция.
Концерт тIитIаврий гьуртту хьуну, Республикалул БакIчи Рамазан АьбдуллатIиповлул бувсунни республикалул Конституциялул Кьини Дагъусттаннал агьалинан байран хъанахъишиву. «ДакIнийри захIматсса чIун, Аьрасат граждан дяъвилул ккурккай бавцIуну бивкIсса, та чIумал Конституция хIадур баврил мяъна хьуссар СССР пасат хьуну махъ хьусса цIусса билаятрай ккаккан бувсса циняв политикийсса гужру рязишиврийн бучIаву. Хъунисса дахханашивуртту хьуссия та чIумал экономикалувугу, политикийсса системалувугу, даххана хьуна паччахIлугърал низам. Аьркинну бия ми циняв масъаларттал хIакъираву машварартту бувну, цалийн бучIан», — увкунни Р. АьбдуллатIиповлул.
Республикалул БакIчинал увкусса куццуй, ДР-лул Конституция хIадур буллай байбивхьуссар Аьрасатнал Конституциялущал архIал, АьФ-лул Конституция циняв агьалинал хъинчулий ккавккун махъ, рес­публикалул каялувчитурал хIадур дурссар ДР-лул Конституциялул проект, Аьрасатнал Конституциялул принципру гьануну ларсун. ДР-лул Конституциялуву хIисавравун ларсъссар республикалул циняв хасшивуртту: чIявумиллатру бушиву, тарихрал цашиву. Му даву дуллай бивкIссар МахIаммадаьли МахIаммадовлулгу, МухIу Аьлиев­лулгу, Аьбдуразакь Мирзабековлулгу, Хизри Шихсаидовлулгу каялувшиврулу. «Да­гъусттаннал бакIрачIан чIявусса бувкIссар тай шиннардий. Жулла давурттаву диялдакъашивуртту диркIнугу, бювхъуссар сахла дан республикалул цашиву. Мяйжанссар, цуксса хIайпнугу, ца­ппара ятIапирттай жува хьхьара бувссар паччахIлугърал властьрал даража, давуртту, политикийсса система. Яла властьрайн Владимир Путин увкIукун, билаятрай ччаннай дацIан дуллан бивкIссар каялувшиву даврил низам ва паччахIлугърал властьрал цашиву. Вай шиннардий тамансса давуртту дурссар. Дагъусттан махъун багьну бия экономикалул ва политикалул чулухату. Ларгсса шинал байбивхьуссар республика хьхьичIуннай шаврил цIусса ятIап, дайдирхьуссар дузалшинналул давуртту. Дагъусттаннан аьркинну дур марцI буккан баву ва цIушиннарду. Миккугу жуща бювхъунни уттара дуккан дан каялувшиврул низам, законшиву ва аьдлу-низам. ХIакьину жущава бюхъанссар жува цалий дарцIусса республикалий яхъанай буссару учин», — увкунни Рамазан АьбдуллатIиповлул.
«Барча ва жулла хъуннасса байран. ЦIуллу хьуннав Аьрасатнал Федерациялул цашиву! ЦIуллу хьуннав Дагъусттан Рес­публикалул цашиву!» — увкунни Дагъусттаннал БакIчинал.
Яла агьали барча буллали­сса махъ лавхъунни Ма­хIач­къалаллал бакIчи Ма­хIам­мад Сулаймановлул. Аьрасатнал ва Дагъусттаннал Гимнарду дурцуну махъ ккаккан дунни концертгу. Концертрая махъ дунни байрандалун хасъсса фейерверкгу.