Июльданул 22-нний Ма­хIач­къала шагьрулул администрациялучIа цIунилгу хьунни 2-мур базаллул зузалтрал пикет (батIаву). ХьхьичIмур пикет дурну диркIссар базаллуву дикI даххайминнал, базаллул кьатIув, кучардаву машинарттай дикI дахлан къадагъа дишара тIий. Муния жу чичарду хьхьичIмур номерданий.
ХIасан Аьдилов
Утти базаллувусса машачитураяр ххишала, базаллул кьатIув дахху-ласу дуллан къадагъа дишин аьркиншиврул хIакъираву буслай бур шагьрулий яхъанахъиминналгу. Мунил хIакъираву дия ва ххуллухсса батIавугу.
Базаллул кьатIув, кучардаву опталий дахлахиминнаща бюхълай бур ссят 9-нин дахху-ласу дуллан, амма миннал бакIлахъия дахлай бур къаопталул багьрайча — розницалий, базаллуву кунна, мунийну миннал лиян дуллалиссар базаллул низам, кьяйдарду. Му бакъассагу, миннал къадарххуну лирчIмур кьаритлай бур дунийра, хаснура ахъулсса ва ахънилсса. МахIачкъалаллал администрациялул бакIчинал хъиривчу Альберт Ярбилов лавгссар 2-мур базаллул каялувчитурачIан масъала ца чулийн бутан. Ганал бакIрайн лавсун бур базаллуву дахху-ласулул давурттаву низам дишин, утти яни дахху-ласу дуллантIиссар анжагъ базаллул вив. Мунил жаваб дулайми хъанахъиссар 2-мур базаллул каялувчитал.