Ххаллилсса учительтал, ахир дакъасса дунияллул куртIсса мяъна дурчIин жула яру тIивтIумий, щала Лаккуйгу, Ккуллал махIлалийгу чансса бакъассар. Цавай – цала жяматраву сийлийсса, гайми- лагма щархъавухгу машгьурсса, амма бакъассар райондалий жямат, мюрщими, хъуними пагьму ххисса учитель, гьунар лавайсса тарбиячи, хIакьсса аькьил, алвагьсса мукъул усттар, чумартсса лаккучу, аьпалухьхьун лавгун вай гьантрай мукьцIал хъанахъисса Каримхъал МахIаммад – ЧIяйннал «Калла МятIу» къакIулсса.

Увссар М. Кь. Керимов 1925 шинал сентябрьданул 25-нний. 1942 шинал буттал шяраву «Похвальная грамоталущал» (Танийсса мусил медальданущал) школа къуртал байхту, 17 шин хьун дурасса МахIаммад, итххявхсса ва зирангсса оьрчI, цала гьалмахтуращал – шяравучу Амиров Апаннинащал, Ккулатусса Атаев Кьурбаннущал ва ТIилиев Рамазаннущал, Хъусращатусса Ванатиев Кьурбаннущал ва цайминнащал лавгун ивкIссар фронтрайн гьан ува тIий. Амма ми трудовой фронт­райн къанаврду дуклан тIайла бувккун бур, яла – учительтал фронтрайн бувцуну бачIва ливчIсса щархъал школардай дарсру щил дихьланссия. Мукун МахIаммад Кьурбанович 1942-45 шиннардий цал Гьамияхь ва ТIаннул ЦIувкIрав оьрус мазрал ва дяъвилул иширттал дарсру дихьлай ивкIссар, яла Вихьуллал школалул директорну. Дяъви къуртал шайхту МахIаммад Кьурбанович МахIачкъалалив пединститутрал филологиялул факультетравун увххун, 1949 шинал га къуртал бувссар.
Зий ивкIссар цала буттал шяравусса дянивмур даражалул школалий цал учительну, яла директорну. Пагьму бусса даврил сакиншинначи уну тIий 1955-58 шиннардий МахIаммад Кьурбанович Министерство просвещениялул гьан увну уссия Агъуллал райондалий Ппиппихъуллал (Тпигуллал) дянивмур даражалул школалул директорну. Гания махъ зий ивкIссар Ккуллал СШ-лул завучну, райОНО-рал методкабинетрал хъунаману, школарттал инспекторну, райондалул заочный СШ-лул директорну. Пенсиялийн увккун 15 шин хьуну махъгу буттал шяраву ЧIяйннал СШ-лий дарсру дихьлайна уссия. 53 шинал мутталий бигьа дакъасса, амма бусравсса педагогикалул даврийсса МахIаммад Кьурбановичлул захIматран хIукуматрал лавайсса кьимат бивщуна. Ва лайкь хьуна «За оборону Кавказа», «За доблестный труд в Великой Отечественной войне 1941-45 г.г.» тIисса ва ялагу цайми медаллан, «Отличник просвещения РСФСР» тIисса хIурматрал цIанин, «Ветеран Великой Отечественной войны, «Ветеран труда» ва цаймигу цIардан.
Амма ми цинявннуяр лараймур бахшишну МахIаммад Кьурбановичлул хIисав бай­ссия оьрчIал ва щала агьулданул цайнмасса хIурмат ва ччаву. ЧIяту ва щала райондалия ба­къассагу, муначIан маслихIатрайн, оьрмулул ччанарккусса къурхъру ттирихIин кумаг ба тIий бучIайссия хъамал, дустал, кIулвагу бакъами СсурхIияту, Агъуллая, цайми кIанттурдавату. Цаягу махъунай рязи акъагу къатIайла уккай­ссия.
МахIаммад Кьурбановичлул ва мунал иминсса, ас-ламусрал бувччусса кулпатрал, цува кунмасса дарс дишаврил усттарнал, машгьурсса учительницал, аьпа биву, Жаннатлул, хъуни бувну оьрмулул ххуллийн буккан був­ссар арс ва кIива душ. Минналгу ацIниясса оьрчIру ва оьрчIал оьрчIру бур. Цивппагу бусравну оьрму бутлатисса.
Арс МухIуттин – медициналул элмурдал кандидат, Дагмед­академиялул эпидемиологиялул кафедралул доцент, ДР-лул роспотребнадзорданул начальникнал хъиривма. Душ Тамари Къизлардал санэпидстанциялул лабораториялул хъунмурну бур. Гамур душ (аьпа баннав цил) СултIанат РФ-лул ХIурматрал цIанин лайкь хьусса учительница, уттигъанну ахиратрал хьунни.
МахIаммад Кьурбанович ия аьчухсса, оьрму ххирасса, му­къуй цIу бусса, щяикIангу, изан­гу кIулсса зунтталчув. ХъатIай ва мажлисирттай мунал дуллалисса тямадашиврия, даражалия ва кьяйдардая бусаларду бикIайссия.
МахIаммад Кьурбановичлул учениктурал, гайннал нитти-буттахъал, щала агьулданул дянивсса бусравшиврул ва сийлул дайдихьу ва савав, жул пикрилий, мунал педагогический принципирттаву тIалавшиннардаву дия.
1960-70 шиннардий Ккуллал СШ-лул завуч, райОНОрал методсоветрал хъунамасса чIумал цува, аьпа биву, аьчухну буслай ахттар дуллан икIайссия ми принципирттавасса яла агьамми.
ХIакьсса учитель, тарбиячи хьун яла агьаммур, аьркинмур цир? Щияр шайсса му? ХьхьичIра-хьхьичIмур, яла агьаммур тIалавшинна – цува щаллу-ккурккисса инсан ушиву. Цал инсан, яла учитель.
Урив учитель – адимина, му икIан аьркинссар зирангсса, чумартсса, цахлува цува ацIан шайсса, нигьа къаусайсса. Укун­сса акъахьурча, кIа цала касмулул академик ухьурчагу оьрчIачIа ганал хIурмат ба­къассар. Бурив учительница — хъамитайпа, га бикIан аьркинссар марцIсса, ас-ламусрал бувччусса, щищакIуй га укунссар-тукунссар чин къабюхъайсса.
Ва тIалавшиннарая гъалгъа тIий жун дакIнин багьай 50-ку шиннардий МахIаммад Кьурбанович директорну ивкIсса чIумал хьусса иш. Интернат­райсса оьрчIан ххал хьуну бия кьунниялай чIумал Ваччату ЧIяв лахълахъисса ххуллий жагьилтал куннайн кув щусса. Рагьру хьуну дия 2 учительналгу, 2-3 къурубугъазсса жагьилналгу. Куннайн кув щайхту га ца учитель (аьпа баннав цал) загълунсса, гужсса унува ливхъун ия («Учительнан талан, иллан къабучIирхха» — тIий ухьунссия). Цувалу ливчIсса МахIаммад Кьурбановичлул рай къабуллуну, бишлай хIала увххун, тай цивппа лихълахъи бувну бия. Ургу яла ина интернатрайсса оьрчIал дяниву директорнал сий, хIурмат цуксса лахъ хьуна, та ливхъманалсса цуксса ялавай багьуна!
«ХIакьсса учительнайнсса кIилчинмур тIалавшинна ученикнал хIурмат баву, ганаву дусса ххуймунийн чул щуну, га гьаз аву, — тIун икIайссия Ма­хIаммад Кьурбанович. Ва зад тасттикь буллалисса дакIнийн бичавуртту.
Учкъулданий ккалакки­сса чIумал муния гъалгъавагу къатIунна. ДакIнин дагьай яла махъ институтгу къуртал бувну, нава цащала школданий зийгу ивкIун, гичча аспирантуралувун увхсса чIун. ЩийчIав аьй дуллай акъара, цала-цаласса буллай ухьунссия. Амма ттухь дакIниймур лавсун, ци иш бур, дуланмагъ щаллуну дурив, кIа хъавтусса ва бявкъусса шагьрулий (Ленинградрай), ламус мабав, ссал кумаг бави, учинсса ца ттула ххирасса учитель МахIаммад Кьурбанович акъа къавхьуссар, хIатта гъан-маччаминнавугума.

Адаврал ва мукъул заллу ия

На институтравун увхссара лап хъунмасса аваралущал, хIатта на кьамул увсса приказрай бивкIссар чул бищаву дурну РСФСР-данул просвещениялул министерствалул хIукмулийн: «Выделить Дагестанскому государственному педагогическому институту одно место (по специальности «иностранные языки») для зачисления в студенты Шалласуева Ш. Р., успешно сдавшему вступительные экзамены».
Му уххаврищал на барча уллай МахIаммад Кьурбановичлул дуркIуна ххал: «Шалласуй! Барча уллай ина – пахрулий ура. ДакI хъун мадував такIуй. КIулну икIу: «Ца кьини чувшиврий хъинссар оьрму бутлай, шинай лухIи хъатIунунияр!»
Ва адаврал, мукъул заллу ия МахIаммад Кьурбанович.
Ялагу МахIаммад Кьурбановичлул педагогикалул ца принцип жунна ччянира хавар хьусса. Жу, оьрчIру, ганал махIаттал байвав инсантурал цIарду дакIний дитаврил. Интернатрайсса гьарца оьрчIал цIагу, фамилиягу ганан школа къуртал бувну цимигу шин ларгукунгу кIулну дикIайва. Дурагу 2 шин Ккулув зий дурну, мунан кIиккусса инсантурал цIарду яла личIлулма ккуличунаннияр кIулну дикIайва. Цал цIувххуссия, цукун бюхъай вища микссара цIарду дакIний дитан куну. Укунсса дия жаваб: «Ургу, Ккируп, (ттуйн чIаванияцIа учительнал укун чайссия), инсаннал вичIан яла тIааьнну баяймур зад ганал цалла цIар. Мунияту инсаннан хIурмат бан ччай ухьурча, ганал дакIниймур ласун ччай ухьурча, ганал цIа дакIний дити, уча. ЦIа хъама диртуннихха – къурталссар, зул дянив бару хьуссар».
ВаницIун бавхIусса ца «нарочно не придумаешь» тIисса сериялувасса иш дакIнийн бутанна.
1967 шинал райондалул учительтурал (августовское) совещаниялий гьуртту хъанай бия Да­гъусттаннай бакъассагу, учиннуча, Щаллагу Совет Союзрайх цIа ларгсса Гь. Саэдовлул цIанийсса Ккуллал колхозрал бакI дургьу­сса, аьпа баннав цал, ХIажиев МахIаммадхIажи ва Рамазанов ХIасан, куннахь кув цIухлай бур цурив-ца ккуличувная, га щил тухумраясса уривав тIий. Микку МахIаммадхIажинал увкунни: «ХIасан, Ккуллал тарихгу, тухумругу ина та жула «Калла МятIухь» цIухха, танан кунма ми затру кIулсса цIана цукIуй уссаххай акъара на». Мунайн, мяйжаннугу, «Жула МахIаммад» учайва Ккуллал райондалул щархъал агьулданул.
Ца-кIива махъ ялагу Ма­хIаммад Кьурбановичлул педагогикалулгу, оьрмулулгу принципру ялун личин дуллалисса – хIанттил ва хъамитайпалул хIакъиравусса.
«ХIан (ххуйсса, марцIсса) дуккан дурсса инсаннал оьрму, багьу-бизу ххуй банни, хъатIай, тирхханнарай тяхъашиву гьаз дуванни. Амма чара бакъа хIачIан аьркинссар ми адиминал тIутIаврицIун на къаакьлакьи­ссара. Адаминан адиминашиву ккаккан дан цайми цикссагу шартIру ва кьяйдарду дуссар, — тIун икIайссия аьпа биву.
На рязиссара Оьмар Хаяймлущал «щищаллив, цикссарив, цумур чIумаллив, кIулну хIачIарча аьйгу дайссарив» — тIиний. Амма «инсаннан тарбия хIанттил дулайссар» тIиминнащал къарязийра. ТIайлану бикIанссия «инсаннал тарбия хIанттил (хIанттищалсса аралул) ххал дайссар учирча».
Кулпатраву, адаминал багьу-бизулуву хъамитайпалул бугьлагьисса кIану бувчIин буллай, МахIаммад Кьурбановичлул щарсса урчIа каниха, лас – куя каниха лащан байссия, лас къатлул оьрмулул ттарцIри, щарсса – къатлуву лавхъсса чирахъри, тIун икIайссия.
Ва дакIнихтунусса кьур­чIишиву кIидачIлай, жижара буллай буру арснахь МухIу­ттиннухь, душнихь Тамарихь, уссихь Загьидинахь, циняв­ппагу гъан-маччаминнахь. Аьпа баннав!
Ина тачIав хъама къаитайссара, вил цIагу, адав ва къириятгу оьрмулул кьибламарттуну мудан жула дакIурдиву дургьуну нанисса чIявусса учениктуран.
ЧIяйннал ва Ккуллал
жяматирттал цIания
Киров Султанов,
Шалласу Шалласуев

P.S.
БучIияхха Ккуллал райондалул администрациялул, образованиялул Управлениялул, ЧIяйннал школданул дирекциялул чулухатусса кьурчIишиву кIидачIлачIисса некролог дулун. Укунсса иширттал чIарах бу­ккан къабучIиссар. Вагу жулва миллатрал маданиятрал ца яла асар бияймур оьрмулул шачIанур. Ва шачIану къала­хъанссагу цучIав акъассар!