Август зурул цанний МахIачкъалалив республикалул хъунимигу гьурттуну Дусшиврул къатлуву хьунни Зумаритавал байрандалун хас дурсса батIаву.

Мероприятие хIадур дурну дия Дагъусттаннал бусурманнал рувхIаний управлениялул республикалул динийсса идарарттащал зузисса комитетращал ва «Муслимат»хъаннил ккурандалущал ва «Инсан», «Чистое сердце» тIисса ихIсандалул фондирттащал уртакьну. Байрандалий бия ДР-лул ХIукуматрал хъунаманал хъиривчу Рамазан ЖахIпаров, муфтий АхIмад-хIажи Аьбдуллаев, машлул, инвестициярдал ва предпринимательствалул министр Ю. Умавов, динийсса идарарттащал зузисса респуб­ликалул комитетрал хъунама Сулайман МахIаммадов ва цаймигу къуллугъчитал, диндалул идарарттал вакилтал, журналис­тал, махъ нанисса жяматийсса ишккаккулт.
Байрандалийн оьвкуну бия ахIвал кIюласса кулпатирттава­сса ттурша оьрчIайнгу. Ми нитти-буттахъащал, гъан-маччанащал бия.
Байран дайдирхьуна Кьурандалул аятру буккаврия. Хъирив цинявппа дагъусттан агьали барча буллалисса ихтилат бувна Дагъусттаннал муфтийнал.
ХIукуматрал хъунаманал хъиривчу Рамазан ЖахIпаровлул бувккуна республикалул хъунама Рамазан АьбдуллатIиповлул жямат барча буллалисса чагъар.
«Дагъусттаннай аьвзал заманная шинмай дагъусттаннал агьали цала-цала миллатирттал ляличIишивугу ядурну, рувхIанийсса ва динийсса ххазинардал кьиматгу буну, бавкьуну, нахIуну, куннал ку гьаз буллай яхъанай бивкIссар ва буссар. Жува уттигу жагьилтал чил миллатирттал культуралул, цамур дин дуллалиминнал хIурмат буну тарбия буллан аьркин­ссару», — тIий ия республикалул бакIчи агьали барча буллалисса чагъарданий.
«Хайрат» тIисса оьрчIал коллективрал оьрус ва аьраб мазурдий нашидру увкуна. АхIвал кIюласса кулпатирттан дуллунни бахшишругу.

Марзижат Кьурбанова, (мукьва оьрчIал нину):
-Ттун тIааьнну бур республикалул хъуни къуллугъчиталгу диндалул байраннай гьуртту хъанай. Аьрасатнал хъуниминнал царагу ххачпараснал байран лях гьан къаритай.
Жун асар хьунни жува хIукуматрангу, республикалунгу аьркинну бушиву. Школалийн аьркинмур дусса кьуцуртту бавчIунни оьрчIайх, фойелуву оьрчIру хъамалу бансса нацIу-кьацIу дур, оьрчIру бялахъан буванмур дур. Иш ми ссайгъатирттаву бакъар, иш — аякьалувур. ЧIалай бия оьрчIругу, нитти-буттахъулгу рязийну, ххарину бушиву.

Руслан, 8 шин:
-ХIакьину ва байрандалий ттун гъанну ккавккунни Дагъус­ттаннал муфтийгу, ХIукуматрал хъунамагу, уттинин ми телевизордавух ккаккайва. Ниттил бюджетрай къия къахьунссар, ттун утти школданийн ласунмур чан хьунни, мадарасса затру дур ттун дуллусса ва набордануву.