Зумаритавал байрандалул кьини Дагъусттаннал культуралул министр Зарема Буттаева хьунабавкьунни Аьрасатнал музыкалул ВУЗ-ирдаву – Москавливсса, Санкт-Петербурграйсса, Ростоврайсса, Астраханнайсса, Саратоврайсса, Нальчикрайсса консерваториярдаву дуклакисса студентътуращал.
Зулайхат Тахакьаева
Дусшиврийсса ихтилат лахъи лавгуна сайки кIира ссятрай. Цанчирча Зарема Ажуевна цуппагу ларайсса музыкалул кIулшиву ларсъсса къуллугъчи бухьувкун, ванин ххуйну кIулссар оьрму академическийсса музыкалун хас бан дакIнийсса оьрчI-душ школалиява байбивхьуну цукунсса захIматшивурттал хьунаакьайссарив. ЧIунархIал оьрчIру музыкалул инструментру бивхьусса къахълардай хъяй, гъира лещан буллай, яла жагьилсса пишакарнал гихунмайсса ххуллий хьунабакьлакьисса буруккинтталсса буллангу цанма багьлай бур. Ми захIматшивурттан тIурча ахир чIалай дакъар, щалла дунияллийра ларайсса магьирлугъ кризисраву душиврийн бувну. Музыкалул ларайсса кIулшиву ласуншиврул багьлай бур гьарца кьини чIярусса ссятурдийсса захIмат буллан. Студентътуравасса чIявуми тIурча бур дуккаврищал архIал музыкалул идарарттай дарсру дихьлай ягу музыкалул коллективрдаву зий. Мунийн бувну культуралул министрнахьсса гайннал тавакъю бия оьрчIансса музыкалул инструментирттал щаллушинна дансса, даврия махъгу оьрчIах къулагъас дусса, яни гай концертирттайн буцлацисса педагогтуран кабакьу бансса.
КIицI лавгуна студентътурахь цахьвами тавакъюрдугу, миннува яла агьаммур бия республика профессионал музыкантътурах ва педагогтурах мюхтажну душиврий чIурчIав дуллай, дуккаву дайхту Дагъусттаннайн кIура баера тIисса. Ихтилатраву хъярчирал зумуну маслихIат бувна хьхьичIунсса музыкантътуращал ташурду бувну ласурвавращал Дагъусттаннайн бизан. Микку хъярчиралгу цила кIану бугьлай бур, республикалий бувагу бусса ца контрабасистка бувкIун бур Москавлия МахIачкъалалив дагъусттанчунан щар хьуну. Му хъярчиравагума чIалай бур республикалий гьарцагу коллективрдаву хасъсса кIулшиву дусса пишакартал биялну бакъашиву.
Хьунабакьаврий ялагу гьуртту хьунни культуралул министрнал хъиривчу Елена Гьурунова, министрнал кумагчи, Лакрал театрданул каялувчи Бадрижат МахIаммадхIажиева, МахIачкъалаллал музыкалул училищалул директор Андрей Бондаренко, Дагъусттаннал паччахIлугърал филармониялул каялувчи Ирина Нахтигаль, филармониялул камерный оркестрданул дирижер Зарифа Аьбдуллаева, Аьрасатнал культуралул фондрал Дагъусттанналмур филиалданул хъунмур Луиза Гаврилова. Вай цинявппагу кIицI лаглай бия Аьрасатнал консерваториярдаву дуклакисса Дагъусттаннал студентътал академический музыка хьхьичIунмай бан хIарачат буллалисса бушиву.
Хъиривсса гьантрай Къумукьнал театрдануву хьунни му хьунабакьаврий гьуртту хьусса студентътурал концерт.
