КIира нюжмардул дянив хъундакъасса сектор Газалий ливтIуну бур 837 инсан, бивщусса хьуну бур 5 500. Ва дакъарив Палесттиннал агьалинал Израилнал хIарачатрайнусса геноцид?
ПатIимат Рамазанова
Авай, хъинну цIакьну къуллугъчитал къуллугъирттацIун лачIлай вардишсса билаятрай яхъанахъисса ттунгу,
на кунма чIявуссаннаннагу тамаша дирзуннигу къаучиннача, ххуйдирзунни ларгсса нюжмардий Великобританиянал хIукуматрал член, баронесса Саида Варсил дурсса тIул: Палесттиннал хIакъиравусса Великобританиянал министртурал кабинетрал политикалуцIун цуппа бакьлай бакъанутIий, мунил кьабивтунни цила къуллугъ. Зий буссия му Британиянал МИД-рал паччахIлугърал хъунмур министрну, хIукуматраву мукун лавайсса къуллугърайсса цалчинсса бусурман хъамитайпар. Бувссар ва хъунма хьуссар тиккува Великобританиянаву, мархри, мина-гьану Пакисттаннаясса кулпатраву. Политикалувун бучIаннин зий бивкIун бур юристну. Мунил цила твиттерданий чивчуну бур Великобритания ИзраилнацIун бавкьуну бушиву цинма хас къабизлай бушиву, мунияту къуллугъ кьабитлай бушиву. Великобританиянал премьер-министр Дэвид Кэмерон ур, ай, цувагу сектор Газалий дяъви бацIан бан аьркинссар тIий ура, амма баронесса Саида Варси анавар бувккунни къуллугъ кьабитан, тIий. Лондоннал мэр Борис Джонсонгу ур баронесса Саида Варси Британиянал хIукуматрал даврия лагаврил цува хъинну пашман увунна, му цила даврийн зана хьун аьркинссар тIий.
Гьаннайсса, политиктал-чиваркI лахъисса нагъиллу буслай кьабивтун, баронессал щалва дунияллун ккаккан бунни цуппа чувшиву ххисса политик бушиву, мунил щалвагу дунияллун баян бунни Британиянал хIукуматрал политика тIайла дакъасса душиву.
Цуппа политиктал – чиваркI тIий чIурчIав къадулланна, чиваркIуннавугу бунутIий чувшиву ххисса политиктал. Уттинин Турциянал премьер-министрну зий ивкIсса, утти президентну увчIусса Реджеп Тайип Эрдоганнулгу цува президентну увчIайхтува баян бувна щавурду дирсса, бивщусса Палесттиннал агьали хъин буллан Турциянавун буцланна куну. Сектор Газалийсса щавурду, цIунцIиярду дирминнал цалчинсса группарду самолетирттай биян бунни Турциянал госпитальлайн. Дяъвилул цIараву личIан бюхъайсса тамансса инсантурал оьрмурду ххассал бунни. Уттигу мукуна къуццу тIунхьуви тIисса умуд бур.
Эрдоганнул ва Саида Варсил уздансса тIуллал ххари бунна, ми лахъа-хъун бан бакIрая «шляпа букьлай бура» учивияв, тачIав шляпа бакIрай бивхьусса инсан буния нава. Мунияту ттунма кIулсса куццуй ва ттущава шайкун санаъру дуллай бура учинна миннаха.
