Июльданул 26-нний Республикалул БакIчи Рамазан АьбдуллатIиповлул 37 дагъусттанлувнан дуллунни АьФ-лул ва ДР-лул паччахIлугърал наградартту.

БавтIми барча буллай, Рамазан АьбдуллатIиповлул бувсунни, шадлугърал тагьардануву наградартту дулаву – му наградартту ласласиминнал республика хьхьичIуннай давриву бугьлагьисса кIанттурду паччахIлугърангу, агьалинангу бувчIуну, миннан лайкьсса кьимат бищаву хъанахъишиву.
Миккува бувсунни республикалул Конституция кьамул бувну бивкIшиву Аьрасатнал Конституция кьамул бувну цаппара манзил лавгун махъ. Рамазан АьбдуллатIиповлул бувсунни цуксса захIматсса чIумуву хIадур буллай бивкIссарив Конституция ва щил каялувшиврулу хIадур бувну бивкIссарив.
Республикалул БакIчинал бувсунни хIакьинусса кьини Дагъусттаннай захIматсса реформартту най душиву, цIакь хъанай душиву каялувшиврул давуртту, паччахIлугъ, цIулаган дуллай бушиву инсаннал ихтиярду ва тархъаншивуртту, экономика. Мунищала архIал му хъанахъиссар Дагъусттаннал Аьрасатнал культуралущалсса, экономикалущалсса интеграция, микку уттигу чIярусса давуртту дан дур.
«Республикалул каялувчитурал ва депутатътурал хIара­чатрайну, жуща бювхъунни республика хьхьичIуннай давриву тамансса давуртту дан. Жуща бювхъунни экономика, промышленность хьхьичIуннай дуллай бачин. Жуща бювхъунни жулва агьалинал аькьлу-кIулши даххана дуван – му яла агьаммурди. Жул хьхьичIсса масъала, власть хIисаврай – шайссаксса агьалиначIан гъан шаву ва бюхъайссаксса ххуйну бартлаган хIаллихшинну, муницIунма жулва агьали захIматрал, дузалшинналул давурттайн кIункIу бавур», — увкунни Дагъусттаннал БакIчинал.
Рамазан АьбдуллатIиповлул цинявннахь барча увкунни Конституциялул Кьини ва Зумаритавал Байран. Муния махъ дуллунни паччахIлугърал наг­радартту цалва-цалва къуллу­гъирттай личIину захIмат бихьлай бивкIминнан.
ДР-лул Музыкантътурал правлениялул союзрал председатель Хан Башировлун дуллунни республикалул лаваймур даражалул орден «Орден за заслуги перед РД».