Ва хъамитайпалух цихва ягу ванил суратрах ябивтсса чIумал, най бунува цума-цанналгу бакIраву, дакIниву гьич хIасул шайсса ххай бакъару ва инсан хъунмасса аьлимчуну, профессорну бикIан бюхъайхха тIисса асар. Цинияргу хьхьичI итталу аглан шайсса ххай буру ванил бюхъаву, бакIрал ххуйшиву, чани-парсса яру. БикIан бюхъай циниягу ца театрданул актриса, циниягу ца хъаннил сийлийсса салондалул хъунмамур – гьарзадраяргу хьхьичI яруннил тIуркIу тIалав буллалисса.
Къаччанссия! Варив тIурча, бур лап агьамсса къуллугъирттал ва цIардал заллу (вай жура кIицI данну оьрус мазрайра): «Булаева Казима Багдадовна, руководитель группы генетической адаптации человека Института общей генетики им. Н. И. Вавилова Российской Академии Наук, доктор биологических наук, член международного комитета по социальным, правовым и этническим проблемам генетико-эпидемиологических исследований (ELSI, IGES), избранный член Дагестанской Национальной Академии Наук».
Казима, бугу-бувну, хъунма хьуну бур ЦIуссалакрал райондалий, ЦIуссачIурттащиял шяраву. Школа бувккуну бур ЦIуссачIурттахь ва Хасав шагьрулий. Лахъсса кIулшиву ларсун мукьах дуккавриву хъинну итххявхсса зунттал душ бувххун бур аспирантуралувун. Ванил элмийсса каялувчинугу ивкIун ур дунияллийх цIа машгьурсса академик М. Дубинин.
Булаевал канила ттинин дурккун дур хъинну чIярусса элмийсса давуртту ва ми рирщунугу дур цаннияр ца хьхьичIунсса элмийсса журналлай – Ингилиснаву, Американаву, Австралиянаву, Германиянаву. Дур монографияртту, бур учебникру.
ДакIнийхтуну барча дуллай буру жунма ххирасса, бусравсса инсан бувсса кьини! Ванищала архIал барча тIий Казимахь 8-мур мартрал байрангу. Ина, лакрал бакъассагу, щалвагу Дагъусттаннал ва Аьрасатнал пахрура. Яхъанахъу цIуллуну, талихI буну, вила язи-язими мурадирттайнгу биллай!
«Илчилийсса»
вил дустал, гьалмахтал
