Лакрал райондалий аьдатравун багьну бур «Самый классный классный» тIисса классирттай каялувшиву дуллалисса учительтурал дянивсса республикалул конкурс. Конкурсрал сакиншинначи бур Райондалул КIулшиву дулаврил управление. Конкурсрай ххув хьусса учительтал барчагу бувну, КIулшиву дулаврил управлениялул чулухасса арцуйнусса бахшишругу дулайссар август зуруй хъанахъисса райондалул учительтурал совещаниялий. Уттинин му конкурсраву ххув хьусса Къушиева Сарижатлун (ГьунчIукьатIрал школа) ва Алхасова Жавгьаратлун (Гъумучиял школа) дуллуссар «Аьрасатнал кIулшиву дулаврил бусравсса зузала» тIисса цIарду.
Шиная шинайн гьаз хъанай дур конкурсрал сий, чIяву хъанай бур муний гьуртту хъанахъими. Лавгмур конкурсрай мукьа ивкIхьурча, ттигъанну хьусса республикалул конкурсрал райондалулмур этапрай гьуртту хьунни мяйя классрал каялувчи: Жамалова Юлиана (Кьубиял школалул байбихьулул классрал учительница); Гъужиева Изольда (Ккурккуллал школа); Ибрагьимова Шавлухъ (КIундиннал школа); МахIаммадова Аминат (ЧIарттал школа); ЩайхахIмадова Рукьижат (Ххюлуссуннал школа); Учуева Аксана (ШавкIуллал школа); Мудуева Фарида (ЧIурттащиял школа); Аьшаев Мурад (Хъунайннал школа).
Конкурсрай бивхьуну бия «Я и мой класс» тIисса видеоматериаллащалсса ва «Почему я работаю классным руководителем» тIисса цалла даврил программардащалсса папкарду.
Ми папкардал презентация хьунни конкурсрал кIилчинмур этапрай.
Конкурсрай ххув хьунни ШавкIуллал школалул кIилчинмур классрай каялувшиву дуллалисса Учуева Аксана. Ванил папка тIайла бувккунни март зуруй хьунтIисса республикалул конкурсрайн.
КIилчинмур кIану бувгьунни Ибрагьимова Шавлухълул (КIундиннал школа), шамилчинмур кIану – ЩайхахIмадова Рукьижатлул (Ххюлуссуннал школа).
ЧIа учинну Учуева Аксанан республикалул конкурсрайгу хьхьичIунну буккансса тIайлабацIу.
