Гьашину печатьрал кьинилул шадлугъ «Бал прессы» дунни ва зурул 24-нний Журналистътурал къатраву. ЧIявусса журналистътал бия премиярттайн тамахI бивхьусса. ЧIявусса министерстварттал ва ведомстварттал вакилтал бувкIун бия цалла-цалла чулухасса премияртту дулун цаятува гьарзану чичлачисса журналистътуран.
ХIасан Аьдилов
Аьмну ласурча, премияртту, хIурматрал грамотартту дулаву ххуйсса иш хъанай бур, амма ми дулаврил низам хьхьарану дур. Гьашину утти ва 13-чинни укунсса байран-шадлугъ дуллалисса, уттирагу ца нирхирайн руртун дачин дан хъанай бакъар. Гьай-гьай, цалчин ирглий махъ булун аьркина районная бувкIсса администрациярттал вакилтурахьхьун, архния бувкIунгу бухьувкун. Яла махъ булун аьркина СМИ-рдал каялувчитурахьхьун, цанчирча яла бусравмур премия журналистнан хъанахъиссар цалва редакциялул бакIчинал дуллумур, яла лирчIмигу.
Министерстварттал ва ведомстварттал дулайми махънин ритарчагу за бакъая.
Масалдаран, жул зузалтран ЦIуссалакрал администрациялул чулуха дуллуми премияртту кIицIрагу къадунни. Му къатIайлар.
Республикалул кказитирттал бакIчитурахьхьун махъ буллай бия махъва-махъ, ресторандалувусса халкь, журналистътал ппив хьусса чIумал. Масалдаран, яла бусравмур премиялун жул редакциялий ккалли дайссар Гьарун Саэдовлул цIанийсса премия. Циванни муксса ххаллилсса премия дулаврил хIакъиравусса махъ лахъаву дуван журналистътурава бачIиннал бачIи ливчIсса чIумал? Мукунсса ишру ттинияр тихунмай къахьунсса низамрай дачин дуллан аьркинни.
Ца цамургу. ДР-лул Печатьрал ва информациялул министерствалийн жул редакциялул 5 инсаннал цIа ккаккан дурну диркIссар ванияр 2 шинал хьхьичI республикалул лайкь хьусса культуралул зузалал цIа дулун. Амма цаннаннагу къадуллунни хIакьинусса кьинигу. Амма гара 2012 шинал цайми редакциярттал 4-5 инсаннан дуллуну дия мукунсса цIарду.
