Январьданул 21-нний Ккуллал райондалул муниципал сакиншиннарал Ваччавсса актовый залдануву дия Дагъусттаннал бакIчинал, Халкьуннал Мажлисрайнсса «Дагестан: обретение государственности и современный этап развития республики» темалун хас дурсса, Рисала ххалдигьлагьисса батIаву. Ванинмава тIий итабавкьуну бия чIивисса брошюрагу.

ХIажимурад ХIусайнов
Ва батIаврий, ялув кIицI бувсса ца масъалалиясса бакъагу, ихтилатру бувуна Аьрасатнал Президент Владимир Путиннулмур Рисалалия, Дагъусттаннай январьданул 20-нний 1921-ку шинал хIасул хьусса, Дагъус­ттаннал миллатирттал цачIусса хIукумат шавриятугу.
БатIаврий гьуртту хьун МахIачкъалалия бувкIун бия: Халкьуннал Мажлисрал депутат Оьмаров Муса, Дагъусттаннал бакIчиначIасса Экономикалул Управлениялул отделданул хъунама Султанов ХIажи, Дагъусттаннал элмурдал центрданул зузала-аьлимчу Мамараев Руслан.
Хъамаллурах вичIидишингу, цалвами пикрирду бусангу залданувун бавтIун бия шяраваллал хъуними, школардал, культуралул идарарттал директортал, райондалул вивсса сайки циняв идарарттал хъуними. БатIаву дайдирхьуна Ккуллал райондалул муниципал сакиншиннарал хъунама Сулайманов Сяидлул. Ванал цалчин махъ буллуна Оьмаров Мусахьхьун. Ванал ихтилат бия миллат цила ялун бучIанмунилсса буллалисса бикIан багьаврияту. КIицI бувуна ванал мукунма Дагъусттаннал бакIчинал Рисалалувасса тезисру гьаваллава лавсъсса бакъа, бунияласса, жула Дагъусттаннал инсантурал оьрму ххуй бувансса ниятрайсса бушиву. Ттун къакIула циксса оьрмулуву бивкIсса зат буссияв, ванал эбратран кунма кIицI бувуна: «1944-ку шинал чачаннал миллат Къазахъисттаннал авлахърайн бизан бувну бивкIсса чIумал, тиккун бизан бувсса къужрал пикри бувссар цала дянивату язи угьан оьвхъусса, интеллект гьарта-гьарзасса жагьил. Яла та жагьилнал бувцуссар Хрущевлул душ. Куявнал хIурматран 1957-ку шинал бувкссар яла репрессировать бувсса чачаннал миллат цала хьхьичIарасса миналийн зана хьун бучIишиву бусласисса хIукму», — куна.
Султанов ХIажинал ихтилат­рив бия аьмну экономикалул, инвестициярдал масъалардацIун бавхIусса. Мамараев Русланнулмур ихтилат бия жагьилтурал оьрмулуцIун бавхIусса, Да­гъусттаннал бакIчинал Рисалалувасса тезисру оьрмулуву биттур буваншиврул, цала жагьилтуралгу курчIилшиву къадуллай, бажар бикIан багьлай бушиву. БатIаврий ихтилат бувуна, райондалий дуллалисса ва дуван дакIнийсса давурттая буслай, Сулайманов Сяидлулгу. Гьур­ттушиву дуруна, мукунма цалва пикрирду аьч буллай, Ккуллал райондалул Экономикалул комитетрал хъунама Оьмаров МахIаммадлул, райондалул Фин­отделданул хъунама Амучиев Кьурбаннул, зул корреспондент ХIажимурад ХIусайновлул. Залданува буллусса суалла­хьхьун гьарта- гьарзасса жавабру дуллуна хъамаллурал ва Сяид ХIасниевичлул. Ванийну батIаву къуртал хьуна.