АьФ-лул Президентнал ХIукмулийн ва АьФ-лул МО-рдал амрурдайн бувну, Щалвагу Аьрасатнаву ва зурул 1-нния тинмай байбивхьунни аьрали къуллугъ буллан жагьилтал буцлай, яни дайдирхьунни ссуттилмур призыв. Лакрал ва Ккуллал районнал МО-рдал бакIчитурал хIукмурдайн бувну, вара даву най дур Лакрал ва Ккуллал районнайгу. Октябрьданул 1-нния тинмай бавчунни жулва лакрал жагьилталгу ватандалул хьхьичIсса цалва бурж лахъан. Мунийн бувну, Лакрал ва Ккуллал районнал призывной комиссиярттал дайдирхьунни цалла даву.
Бадрижамал Аьлиева
Ва шинал, яни 2013 шинал ссуттил аьралуннавун буцлациссар 1986-1995 шиннардий бувсса оьрчIру, цалгу аьрали къуллугърая махъунмай хьунсса цичIав гьану, багьана бакъасса. Аьрали бурж лахъан гьан аьркинсса жагьилтурал цIуллу-сагъшиврул хIал-тагьар (медицинское освидетельствование) ххал дуллалиссар 2003 шиналсса №200 АьФ-лул МО-рдал хIукмулийн бувну. Аьралуннал кьюкьравун гьан буваннин ххал буллалиссар ми цуксса хIадурну бурив къуллугърал бурж лахъан. Аьралуннавун гьан бантIиссар ларайсса кIулшивуртту ларсъсса ва ДР-лул ВК-рал МО-рдал отделлал ВУС-райн бувну хIадур бувсса пишакартал.
Жагьилсса ник аьралуннавун тIайла дуккаву щаллу дуллантIиссар ДР-лул Аьрали Комиссариатрал графикрайн бувну. Умуд бур 2013 шинал ссутнил аьралуннавун къуллугъ буллан жагьилтал буцлацисса даву цила кьаралданий, низам лиян даву дакъа, биттур дуван бюхъанссар тIисса, — буслай ур ДР-лул Аьрали Комиссариатрал Лакрал ва Ккуллал районнайсса отделданул начальник ХIасан Масуев.
Жувагу чIа учинну жулва жагьилтуран, лажин кIялану, Дагъусттаннал ва лакрал цIа лайкьну ккаккан данну буржгу лавхъун, махъунмай нитти-буттахъачIан, гъанминначIан цIуллуну-сагъну зана шаву.
