«Дагестан без сирот» рахIму-цIимилул организациялул мубараксса Рамазан барз байбивхьунни бунияла чирилунсса даврия. Ва кьини МахIачкъалалив Художниктурал союзрал выставкарду дайсса залдануву вайннал сакин дурну дия ятинсса ва нитти-буттал аякьалулу бакъасса оьрчIал суратирттал выставка. Муний гьуртту хьунни ДР-лул Президент Рамазан АьбдуллатIипов, республикалул сайки цинявппагу министртал.
Зулайхат Тахакьаева
Сайки ххюра шин хъанай дур Москавлив ялапар хъанахъисса жула ватанлувтурал сипталийну сакин дурсса рахIму-цIимилул ккуран зий. Тамансса чирилул давуртту дунни ва мутталий организациялул. Ятинсса оьрчIал суратирттал выставка ттинингу дурссия. Амма, цинявппа министрталгу гьуртту хьун буржлув бувну, республикалул Президент цувагу цалчинни мукунсса даврий гьуртту хьусса. Выставкалийн бувкIсса ливчIми тIурча бия ятинсса оьрчIал дакIурдичIан гъансса ва организациялул давриву даин гьурттушинна дуллалисса, бюхъайкун чIарав бацIлацIисса инсантал. Мунийн бувну, га выставкалийн бувкIминнал дакIурдиву хIасул хъанай бия вания тихунмай жулла республикалий ятинсса оьрчIахсса аякьа ва ургъил хъиннува гьаз хьунссар тIисса ххарисса умудру. [pullquote]
Ислам жулва тарихрал ва мяърипатрал батIул къашайсса бутIа хъанахъиссар. Никирая никирайн ирсирай нанисса исламрал аьдатирттал кабакьу буллалиссар цинявппагу миллатирттал ва диннал дянив дакьаву ва ислахIшиву цIакь дан.
Вихну ура бусурманнан мубараксса вай гьантрай дагъусттанлувтурал хIарачат бантIишиврий цалла дакIру марцI дуккан дан ва хъинсса давуртту дуллан, чIаравнан цIимилул ка тIитIин.
Зума дургьусса гьарцагу гьантта АллагьначIа бучIину лякъиннав, дагъусттаннал халкьуннан барачатну бацIаннав!
Дагъусттан Республикалул чIумуйнусса Президент
Р. АьбдуллатIипов
[/pullquote]
Выставка тIитIлай, организациялул хъунмур Раисат ХIусмановал кIицI лавгуна дурусну шанна шинал хьхьичI хьусса выставкалий ятинтурал канил дурсса цурда-ца даву щяв къадагьшиву. Бувсуна ОьрчIал къатлуву ялапар хъанахъисса оьрмулул мукьра шинавун ияннин къюкIлий кIива-кIива операция бувхIусса оьрчIал (цIа дакIний дакъар) дирхьусса оьттувусса канил сурат та выставкалий аукциондалий 10 азарда къурушран ларсун диркIшиву ва кIива гьантлува цува оьрчIгу щиллив цалашиврий ивхьушиву. Бувсуна уттимур выставка тIитIиннинна сайки чIяруми давуртту машан ларсъшиву. «Жул пикри буссия выставка ацIва гьантлийсса тIитIин, амма хIакьину ттун бувчIунни выставка кIива гьантлуяр лахъи къалагантIишиву», — увкуна ванил.
Хъирив организация сакин даврил яла чялишма сиптачи, Дагъусттаннал хIакьсса патриот МахIаммад Аьбдулхабировлул цалвамур ихтилатраву увкуна: «ХIакьину ттун хъинну ччива Дагъусттаннал цIа чапал дансса иширттая бакъа къабусайсса центральный СМИ-рдугу ва выставкалий гьуртту хьуну, ккакканшиврул цанма жучIава ятинсса оьрчIру экьибивчуну бакъашиву, миннал ялун бучIантIимунил буруккинттарайсса бакIчи ушиву хIакьину республикалул. Ятинсса оьрчIал дурсса давурттал выставкалийн Президент учIайсса билаят цамургу бушиву ттун къакIулли.
На ччя-ччяни ияра ятинсса оьрчIру хъуни хъанахъисса ОьрчIал къатравун. ХIакьину гай гьарзатрал лащу-щаллуну бур, паччахIлугърал миннах дагьайссаксса къулагъас дуллай бур. Гай мюхтажну бур, анжагъ, ччаврих. Шинай цал бухьурчагу налусияра ятинсса оьрчIал ялун, мунияр хъунмасса чиригу, хIажгу цамур бакъассар. Ятинсса оьрчIавагур бувксса хьхьичIунсса инсантал: Дагъусттаннал бакIчи АьбдурахIман Даниялов, Американал президент Билл Клинтон, Наполеон ва чIявусса цаймигу. ХIакьину вай ятинсса оьрчIаватугу балики буккан Халилбаг Мусаясуллул даражалул художниктал. Барчаллагь шиккун бувкIцириннайн, зу хIакьину хIаж бувссар, зул дакIру марцI хьуссар, бюхттул хьуссар. Барчаллагь жула Президент Рамазан ХIажимурадовичлуйнгу, Дагъусттан цIубуккаврийн вихшала дишинсса давуртту дуллай ушиврухлу.
Хъирив ДР-лул чIумуйнусса Президент Рамазан АьбдуллатIиповлул цалва ихтилатраву увкуна:
— ХIакьину мубараксса Рамазан барз байбихьлахьисса кьини жува шиккун батIаву – му хъинну агьамсса ишри. Цанчирча Рамазан барз – му так зума дугьан ккаккан бувсса барз бакъар. Ва зуруй дурсса хъин-хъинсса давурттугу Аллагьнал кьамул дайссар. Рамазан барз жунма ккаккан бувну бур жува марцI буккан. Цуксса хIайпнугу, Дагъусттан махъсса шиннардий бунагьирттавун бювкьун бур. ОьрмурдацIа бунни муфтий, щайх, полицанал зузалт, журналистал. Ва хъунмасса балари жула ялун ливксса. Жагьилтурал хъунмур бутIа диндалул фанатизмалувун кьувтIуну нанавугу жуйнма ливксса оьсса балари. Вай шартIирдаву укунсса выставкарду дуллалаврийну жува хъун хъанахъисса никираву гьунттийсса кьининийнсса вихшала дихьлахьиссару. Мунияту на хIакьину цинявппагу министрталгу, Президентнал администрациялул зузалтгу буржлув бав шиккун бучIан ва ккаккиялий дирхьусса давуртту машан ласун.
На дакIнийхтуну барчаллагь тIий ура МахIаммад Аьбдулхабировлуйн. Жулла ватандалул ялун бучIантIимунил бунияла буруккинттарайсса инсан ур. Амма цумацагу интеллигентныйсса инсан куна, байнаварсса ур. Ванан ххан бикIай, агарда цалва къуллугъчитурачIан ссал-бунугу ялув чагъар чичирча, цалва тавакъю биттур бансса кунма. Цуксса хIайпнугу, жулва оьрмулуву мукун къашайча, талан багьай. Ва бусса оьрмулий талай ур тIайламунихлу. Укунсса инсантал бусса кIанттай ятинтал къабикIайссар.
«Ятин» тIисса махъ вичIилун баянма тIааьнсса бакъар. Мунийн бувну ятин ушиву кIицI лагланвагу къабучIиссар. Мукунсса оьрчIан цува ятин ушиву асар къахьунмур буллан аьркинссару жува.
Оьрчан яла хъинмур кIану ужагъри, кулпатри, нину-ппу цуксса кьянкьасса, тIалавшинна дусса бухьурчагу. Агарда жущава бюхъарча вай ОьрчIал къатравусса оьрчIру кулпатирттаву щаллу бан, му багьа бакъасса давур. Дуссар оьрчIру цалашиврий бивхьусса кулпатирттан кумагрансса программа. Жул пикри буссар чIал къавхьуну МахIачкъалалив бан чил канил ливтIусса полицанал оьрчIансса детсад. ДачIи шинал лажиндарай республикалий чил канища ивкIуну ур 40 полицанал зузала. Ва сияхIрал тасттикь буллалиссар полицанал зузалт цалла жанная ка ларсун, жува буручлай бушиву. Махъсса кьура шинал лажиндарай баян къабувсса дяъвилуву кIивагу чулух ятинтал личIлай бур. ЧIиви оьрчIан ча кIулссар, цала ппу полицанал зузалтравух ивкIуссарив ягу экстремистътуравух ивкIуссарив? Инсантал литIавурттайну жулла паччахIлугъ хьхьара дан ччиминнал мурадру дузрайн къабуккантIиссар, цанчирча жулла цIакьсса паччахIлугъ дуну тIий. Мукунсса пикри дакIниву буминнащал жува цачIун хьуну талан аьркинссару, жучIава ятинталгу, ОьрчIал къатригу чIяву къахъананшиврул, жулва оьрчIру бакъацланшиврул. ЛичIлулну бикIияра. Инсан аькьлулува уклай, фанат хъанай ухьурча, ттул ци ишри къакуну, леххаву учара, га ххассал анмур бувара. Агарда хIакьину жува мукунсса инсантал кьюлтI булларча, гьунттий бачIи Дагъусттан ятинтурахьхьун гьантIиссар. ОьрчIру нитти-буттацIа мабулларду. Агарда цу-унугу нитти-буттацIа хьурча, мунал чIарав бацIияра».
Президентнал барчаллагь увкуна выставка сакин дурминнахь, муниву гьурттушинна дурминнахь, ятиннан цIимилул ка тIиртIуну, вайннал дурсса давуртту машан ларсминнахь.
Муния махъ аукциондалий дирхьуна Къизилюртлия бувкIсса ятинсса Наталиял жанграй щаршсса ятинсса ххюра шинавусса цила душнил сурат. Суратрал бакIрайсса багьа бия 500 къуруш. Га сурат 50 азаруннин машан ларсуна Дагъусттаннайсса антимонопол службалул хъунама Кьурбан Кьубасаевлул.
Гихунмай Президентнал ххал дуруна оьрчIал дурсса суратру.
