Февральданул 4-нний ДР-лул Президентнал кIанайма Рамазан АьбдуллатIиповлул дунни республикалул маэшатрал ва политикийсса тагьарданул масъалартту ххалбигьлагьисса совещание.

ДР-лул Президентнал пре­ссалул къуллугърал бувсъсса куццуй, совещаниялий гьуртту хьунни ДР-лул Госсекретарь Такибат МахIмудова, ДР-лул Мюхчаншиврул советрал председатель МахIаммад Баачилов, ДР-лул Президентнал управлениярттал хъуними ва цаймигу.
Рамазан АьбдуллатIиповлул, совещание тIитIлай, бувсунни ялун нанисса чIумуву властьрал органнал щаллу дан аьркинсса яла агьамми давурттая.
«Республика зий дур паракьатсса низамрай. Щаллу бансса масъалартту чIявусса бур. Цинявннан аьмсса задача – ДР-лул ХIукуматрангу, ДР-лул Президентнал ва ХIукуматрал Администрациялунгу, шагьрурдал ва районнал администрациярттал бакIчитурангу – АьФ-лул Президентнал 12 хIукму биттур баврил ялув бацIавур. Ми хIукмурду кьамул бувну бивкIссар 2012 шинал майрал 12-нний. Ми циняв лахьхьин аьркинссар, гьарца хха хIисавравун ласун аьркин­ссар, пландалий ккаккан бувмур агьалиначIан биян аьркинссар. На цIухланна каялувчитурахь АьФ-лул Президентнал 7 статьялул мяъна-мурад. Цалсса ттун къачIалай бур зу – Администрация, ДР-лул ХIукумат – Дагъусттан Республикалул цIусса Президентнал ихтилатирттал анализ дуллалишиву: цукунсса хIасиллу (выводы) хьуссарив, цукунсса тапшур бавуртту дур­ссарив. Инсантурал хьхьичI, телевизорданувух, Аьрасатнал Президентнащалсса хьунабакьаврий на увкусса цавагу махъ бакъа хьун къааьркинссар. Акъахьурча на лащантIиссара, махъру хъунисса лахълай, амма иширайну цичIав бакIуйн дуккан къадуллалисса инсаннаха. Мукун къахьунтIиссар! ХIакьину мукунсса даву дурну дакъашиврул бусласиссар Администрациягу, республикалул ХIукуматгу мюнпатну зий дакъашиву. Зун аьркинссар оперативну, респуб­ликалий хъанахъисса иширттал хьхьичIун буклай.
ХIакьину на ккаккан уванна ДР-лул цIуллушиву дуруччаврил цIусса министр Ибрагьимов Танка Ибрагьимович. Га цукунсса ци инсан уссарив, ци даражалул пишакар уссарив, цумур тухумраясса уссарив гьарцаннан кIулну икIан аьркинссар. Уттигу цал ккаккан ан аьркинссар ттигъанну ивтсса АьФ-лул ПрезидентначIасса ДР-лул муданасса вакил Александр Ермошкин. Га ур ца яла мюнпатну зузима инсан, управлениялул методолог, Аьрасатнал ца яла хъунама менеджер.
ДР-лул Президентнал кIа­найма Рамазан Аьбду­ллатIиповлул бувсунни республикалий информациялул политика дакъашиву: «Хаварду, тIарду буслан – машаллагь, яла аьркинмур цичIав дакъари. Дакъар анализ. Аьмну лавсун хъинчулийсса ара дур СМИ-рдал чулуха. Амма му, зу хъинну зий бушаврийн бувну бакъарча, цайми иширттайн бувнур.
Жува муданма махъун багьлай буру информациялул бутIуву, мунияту инсантурал аькьлу-кIулши щаллу шаврийн асар биян буллай бакъару. Бюхъай хIатта ца-ца чIумал жулла давурттая буслан нач хъанай дикIан. Мукун бикIан къааьркинссар. Властьрал хIакъираву инсантурал цамур пикри-зикри бикIан аьркинссар: га магълустурал ва цуркинтрал ккучун дакъашиврул, властьрал органнаву цалва билаятрал, цалва миллатрал патриотътал бушиврул пикри хIасул хьун аьркинссар. Мукунсса инсантал чIявуссар, минная буслан аьркинссар. Масалдаран, ДР-лул ПаччахIлугърал секретарь Такибат МахIмудова, ДР-лул Мюхчаншиврул советрал секретарь МахIаммад Баачилов, ДР-лул Президентнал ва ХIукуматрал Администрациялул Каялувчи ХIасан Идрисов. Ми инсантал ккаккан буллан аьркинссар, так рушватчишивурттая чичлачаву дакъасса.
Инсантурая арцу цIик­лакаврил хIакъиравусса чIири-кьирисса информациялийну, ГИБДД-лул инспекторная тIайла хьуну, шяраваллал, шагьрурдал администрациярттал бакIчитурайн биянцIа, най буна даврия букьан бантIиссар иширал хъирив лаяннин.
Гьассар инсантурая арцурду цIиклан ва кьюкьин буллан марцIну зузисса инсантал. Уттигу цал чIурчIав дуллай ура, гай чIяву бакъасса инсанталли властьрацIун «цIупI тIий лавчIсса» ва чIярусса шиннардий так цалва къайгъулий­сса. Миннал Дагъусттанналгу, цалла паччахIлугъралгу, паччахIлугърал властьралгу буруккин буллай бакъассар. Аьркинссар мюнпатну зун. ДР-лул Президентнал ва ХIукуматрал Администрациялуща къабювхъунни ца кьинилунсса, нюжмардийсса ва зурунсса давурттал план дурну ккаккан дуван. КъакIулну дур. Аьркинссар проектрайнусса каялувшиву. Аьркинссар личIи буван ДР-лул Президентнащал архIал щалла республика зунсса масъалартту.
Жулва баччибакъашиврул бю­хъайссар чIявусса «вацIравун» лавгун бикIан. Агана кIай тIайлашиврухлу рушватру ласласаврийн къаршину талай бухьурча, на кIайннахь тавакъю буллалиссара зана хьун, цанчирча нагура мива масъалар­ттаха зузисса, амма цамур журалий. Бачияра цинявннал гужру цачIун бан», — увкунни ДР-лул Президентнал кIанайманал.