Вот уже несколько дней нет стабильной подачи электричесва в газетно -журнальный комплекс, где издаются почти все республиканские издания на национальных языках. Эти проблемы повторяются из года в год. О тяготах и затруднениях в данном 

материале.
Вай махъсса гьантрай, хъярчиран бикIу, бунияла бикIу, зума-ккарччулун багьсса ахирзамана бучIантIиссар тIисса «декабрьданул 21-нний» буккан аьркинссия жул хъиривмур кказитрал номергу.

Залму АьбдурахIманова
Сайки щалла жул нюжмар ларгунни бявкъусса кабинетирттаву, дуцири гъили яннардугу ларххун, «ва чIумалнин ттукI къабикIантIиссар, я бувавагу къалахъантIиссар» тIисса жаваб ча-дунугу баянавав тIий щак-щукирдаву.
Ссятва дачIи, кIира ссят шагьрулувусса микIиран бавкьусса ххуллурдайсса «пробкардаву» дуллай, даврийнгу чIал хъанай, шаппайгу цIаннавух букIлай кказит буккан бан, жулва буккултрачIан му чIумуй биян бан хIарачат буллай бивкIнугу, Кказит-журналлал комплексраву шанна кьини ттукI лешлай, лахълай къабювхъунни редакциярдаща кказитру чIумуй итабакьин. Так цала-цала генераторду машан ласун каши хьуминнал кказитру бувккунни сайки чIумуй. ТтукI левшни ацIния цара-кIира зиву дусса щалва комплекс бикIайссар цIаннавун бахьлавгун, кабинетирттаву компьютерду ва цамургу техника къазий, шиккусса зузалтрал чурхрувагу гъили лаган бансса чяйлул стакан щаращи бан къахъанахъисса шартIирдаву щябивкIун.
Гьарца шинах кIи дучIаврищал ва ттукI лещаврил масъала жул Кказит-журналлал комплексрал «цIуцIи кIанур». Комплексраву ттукI бакъашивугу жун кIул шайссар даврийн нани ххуллийва, цаппара редакциярттал бусса, ттяр-ттяр тIисса, аьвзалзаманнай кунма ттукI бан ишла буллай бивкIсса кунмасса генератордал чIурду бавукун.
«Аьрасатнал яла ххуймур шагьрулий» ттукIру лешлай, лахълай халкь цIуру-кIуру тIутIи баву къаххуйри, къалайкьри.
Жува буккултрал чIявусса суаллан личIи-личIисса идарарттайн оьвтIий жавабру ляхълай буна, жуща ми гьантрай «ссайн бувну ттукI бакъассар, цуксса хIаллай левщун бикIантIиссар?» тIий, хасъсса къуллугъирттайн оьвтIий балжисса жаваб кIул дан къабюхъайссар. Му суалданун жаваб къадулай жул комплекрал директор М.М. МахIаммадовлулгу.
Тти цими шинни гьарца кIинттул укун комплексраву ттукIру лешлай, лахълай – жавабмур дикIайссар гьар шинах цара-ца – «ххал дурцун дур» тIисса. Ахиргу тари му дуцлацаврил, лачIун дуллалаврил, ччанакрурдал патта хьусса му пасатсса ххал даххана дантIисса? Гьар шинах ссут, кIи ялун найгу духьувкун, масъалагу кьунуцIакул щаллу къабувну интнийн бувккукун, къабучIиссарив ччянира му «дуцай ххал» даххана дан. Ягу му данну тIий, жул даву зия дан, буккултраву жул даврил кьимат лагь бан дуллалисса давурив?
КъакIулли. Ваксса хъуннасса, архниятура чIалачIисса, республикалул даражалийсса, цинявгу миллатирттал мазурдийсса кказит-журналлу итабакьайсса идара заллу-зал акъасса кунма, «ца гьилгьа дурксса, руцан хIадурсса ттукIрал ххалул» биялдаралу лирчIсса, цукунчIавсса жаваблувшинна дакъа кьабивтсса. Духьунссар ца мяъна, цанна дакъа къакIулсса.
ХьхьирицI буну тIийрив къакIулли, цуппа комплексраву ттукI левщун, ттукIрал пачру лещарча, гацIана редакциярттал зузалт някI лавгун, кару-ччанну лигьулул хьунуксса дяркъу шай. Гъилишиврун бивхьусса батареярттугу кказитру буккан бувну, халкь бигьалагай кьинирдай шаппа-шаппай лагаврищал къярз учин бувну лещай. Итни кьини кIюрххил лавхъсса турбарду ва батарейкарду цивппа кIири лаганнин, кабинетирттал чIиртту гъили лаганнин нюжмар къуртал хьуну, ми лещай кьини ялун дияй. Вава иш ларгмур шиналгу буссия.
Ва чIирисса макьала комьютерданий датIлай, дартIун къуртал хьунцIа кIилва ттукI левщун лавхъунни, мунияту, хIурмат бусса буккулт, зунгу кIулну бикIан, кказит чIумуй къабуккаврил тахсир жуй бакъашиву буслай бура. Зунияр жугу къуману буру зул хьхьичIсса жулла жаваблувшинна щаллу дан, лажинкIялашиву дан къабюхълахъаврия. Бюхъарча, ялтту бучIира, жувумургу бувчIира.