Инсантурал лалавсун бур тIабиаьтрал хасиятраву хьунабакьайсса ишру лелуххантрал къуццу тIутIаврийнугума кIул буван бюхъайшиву.
[dropcap]М[/dropcap]у иш, явара, ссанчIав бакъасса иширан хIисав къабувну, гьар мудангу оьрмулуву тасттикь хъанан бикIай. Амма зунттавусса шяраваллава хъинну чIявусса лелуххант бакъа хьуну бур.
ТамахIран ябитанмагу янилун багьлай бакъар читIри. ЧитIрал гьаваллавусса тIуркIурдах ялугьлай, инсантурал буруккинттугума арх шай. На шагьрулий яхъанахъисса чIумал, лахъ къатрал ларзнил чIавахьулугу тIивтIуну, икIайссияв читIрах ялугьлай. Ттул къатрал хьхьичIсса оьрчIал багъраву бикIайва ми хъинну чIявусса.
[dropcap]У[/dropcap]тти, шяравун ивзун махъ, на махIрун хьуну ура. Ттун, шяраву цир, тIабиаьтравувагу читIри нажагь бакъа янилун багьлан къабикIай. ХьхьичIва шяравусса тIиртIусса ларзурдал кьанчуллалу бикIайва читIрал кюртти бувну.
Ларзнил магъулусса тталлайгума тахтардал парчри бивщуну бикIайва, читIрал кюртти буваншиврул. Утти тIурча, щилчIав хIаятраву, ларзулу читIрал кюртти янилун багьлай бакъар. ЧитIри шяраваллава арх шаву ттун ца ссигъану чIалай бур. Ва ци ишривав? Макьала чичлачийни, сурат рищунсса читIувагу бакIрайн къабагьунни. ХIайп.
