Ца-цавай инсантурал дикIай хасият – ссаятучIаввагу рязи бакъасса. Гайннан ччан бикIай цалла лагма «дуниял» гьанай. Амма жунма оьрмулул тасттикь бувай му иш мукун къабикIайшиву, дунияллул лагма жува гьанан аьркиншиву, ххуймургу, оьккимургу личIи дуллай, ххуймур язи дугьлай.
Вихьуллал шяраваллил жяматран ххюра шинал хьхьичI бахтти хьунни. Му шавунугу хьунни шяраваллил бакIчину жагьилсса инсан, ТIурахъал тухумраясса Сулайманнул арс Сулайманов СайкIу увчIаву. СайкIу муниннин, яний 2015-ку шинайннин, зий ивкIссар ЦIуссалакрал райондалул бакIчинал кумагчину.
Гьашину СайкIун бартлаглай дур 40 шин. Яла чагъиравусса, бакI зузисса шинну дур вай шинну. На хIисав-сан дуллай уссияв СайкIуща вай ххюра шинай дуван хьусса давурттал. Инсаннан ца яла аьркинмур зат дикIай щин. Мунал щинал щаллу дурунни шяравалу. Гьарца махIлалий буссар кранну бивхьуну, зийлурду бувну. ЧIявуминнал щин дурцунни шарда-шардай. Ва бакъарив инсаннан буллу мурад, цуппагу зунттаву яхъанахъисса инсаннан. Щуну-Зунттуя щин дурцусса, шяравун нанисса кIивагу щинаххуллу бакьин бувунни (баххана бувунни аьвсса муххал бургъурду, бивхьунни цIусса). Бакьин бувунни шяраваллил вивсса ххуллурду. Бувунни жагьилтал футболданий буккайсса майдан-стадион.
БартIуаривсса,Чаралихсса хIатталлал лагма муххал чапарду дацIан дурунни. Меценатъталгу цалва лявкъунни. Шяравун буххайсса ххуллул урчIа чулий аьрщи дуллунни цIусса мизит буван. Ва мизит бувну къуртал шайхту, хъинну ххуйсса чIалачIин хьунтIий дур шяраваллилгу. Бувунни инсантал бигьалагансса парк. Къатри буван ччиминнан дуллай ур аьрщив. Шяравун буххайсса шанбачIулий буссия райондалул бюджетрайну бувсса къатри-хIаммам. Му лавсунни шяраваллил администрациялул балансрайн. Гьай-гьай, дурунни, шикку кIицI къадуварчагу, цаймигу хъинну чIярусса давуртту.
Мунияту СайкIу цIунилгу Вихьуллал жяматрал бакIчину увчIунни. Умуд бур вания тихуннайгу вайннуяр чIярусса давуртту дуван бюхъанссар тIисса ва бюхъу ххисса жагьилнаща.
ХIадур бувссар ХIажимурад ХIусайновлул
