Аь. Аьлиевлул цIанийсса Каспийскаллал медициналул училищалуву дуклай бур 1500-ннийн бивсса студентътал. Миннахь дарсру дихьлахьиминнаву биялсса лакгу бур. Миннал кьюкьлувугу хьхьичIххуттай ур Дагъусттан Республикалул лайкь хьусса учитель, Ваччиял шяравасса Мусттапаев ХасмахIаммад Исял арс. ЦIанасса ппурттуву манзилданул журалий дарсру дихьлай ур ва цалва студентътурахь.
ХIакьинусса тагьарданий Каспийскаллал медициналул училищалуву цукун дуклай ва зий буссарив укун буслай ур ХасмахIаммад:
– Гьашинусса шинал март зуруя шинмай, ва бигьа дакъасса тагьар хIасул хьуния махъ, жул директор Асият Оьмарова кьянкьану бавцIуну бур студентътурал ва преподавательтурал цIуллу-сагъшиврул ялув. Мунил бунни амру: училищалул къатравун увххун нанийни, гьарца студентнай ва муаьллимнай чара бакъа дикIан медициналул маска ва цащалла антисептикращалсса шушагу. Увххун нанисса гьарцагу инсаннал чурххал температурагу ххал дуллалиссар. Аудиториярттал ва кабинетирттал дезинфекция дулланшиврул ларсунни ряхра электроприбор – рецеркулятор. Гьарца переменалий студентътал-волонтертал буссар аудиториярттавусса ва кабинетирттавусса гьава марцI буккаврил ялув бавцIуну. Шиккува кIицI лаган, жул студентътурал-волонтертурал цIа щалва шагьрулий, хIатта республикалийгума, машгьурссар. Вай дистанциялул пурмалий дарсру дихьлахьисса 65+ шинну дусса цалва муаьллимтурачIан шаппа-шаппайн лагайссар, ми цукун бурив, ссах мюхтажну бурив ккаккан. ЧIумул тIалавшиндарайн бувну жун, преподавательтуран, оьрмулул жагьилминнан ва хъуниминнан, манзилданул журалий ххуйну зун лавхьхьунни. КутIану бусан, жул гьарцагу студентнан ва преподавательнан ххуйну кIулссар цалла цIуллу-сагъшиву цала кIунттихь душиву, му зат дакIнийну къуццу тIийгу буссар.
Увну ур ХасмахIаммад 1932-ку шинал Ваччиял шяраву. ЧIяйннал дянивмур даражалул школагу къуртал бувну, увххун ур Дагъусттаннал паччахIлугърал педагогикалул институтравун. Мугу къуртал бувну, зий ивкIун ур Ккуллал райондалийсса личIи-личIисса школарттай, биологиялул дарсру дихьлай. 1965-ку шиная шийнай хIакьинусса кьининин ХасмахIаммад зий ур Каспийскаллал медициналул училищалуву. Шиву ва зийгу ивкIссар методистну, директорнал хъиривчуну, директорну. ЦIана ХасмахIаммадлул дихьлай ур психологиялул дарсру. Педагогнал аьмсса стажрив бур сайки 65 шинайн бивсса. Ванал дарс дирхьусса оьрчIру, агьалинал цIуллу-сагъшиву дуруччаврил къаралданий бавцIуну, зий бур жулла республикалул сайки гьарцагу шяраву, шагьрулий, Аьрасатнал личIи-личIисса регионнай, хIатта дазул кьатIувгума. ХасмахIаммад Мусттапаевлул элмийсса статьярду цимилгу бивщуссар «Вопросы питания» тIисса Аьрасатнал журналданий. ХасмахIаммад гьуртту хьуссар Киеврай буллалисса дунияллул халкьуннал лагрулийсса геронтологтурал конгрессрайгу, бувссар микку «Влияние низкокалорийной пищи на долголетие» тIисса цIанилусса доклад. Ванал хIарачатрайну дуккаврил программалувун дурхссар личIи-личIисса инновациялул технологияртту.
ДакI марцIну бувсса захIматрахлу ХасмахIаммад лайкь хьуну ур хIурматрал грамотарттан ва медаллан. Ва ур дяъвилул ва захIматрал ветеран.
Гьарца шинах ХасмахIаммадлул Щуну-Зунттуй бачIи барз бувайссар, цалва оьрчIащал, дустуращал, гъан-маччаминнащал, лагмасса тIабиаьтрай тамаша буллай, хаснува хьхьичIва, цалва аьзизсса кулпат, аьпа биву, Алла сагъсса чIумал. Ванан ххуйну кIулссар Лаккуйсса, Дагъусттаннайсса зунттурдал, жюружанттал, бярдал, цайми-цаймигу кIанттурдал цIарду.
Шиккува ххаллилсса лаккучунаха, жагьилтурал насихIатчинаха ва ттула дуснаха шеърилийсса вай ца-кIива ххагу аьлтту бан ччай ура.
ХасмахIаммадлул мудан,
гьарца гъинттул, зуруйсса,
Къуш бищай щаращучIа –
СалабакIул ухнилу.
Арх бакъа Бярнихалу –
Къичурлухиял чIарав,
Тинмай Чакъалиялу,
чIаххуврай Къаттаялу.
Райондалий акъари ина
къакIулсса цукIуй,
Уну тIий ина мудан
гьарманан эбратрансса,
ТIул-тIабиаьтгу ххуйсса,
инсаншиву ларайсса,
Инсаннай цIими ххисса,
лакраву ур учинсса.
ТIабиаьтрал чIюлу бай
ина бивщусса къушгу,
Вил имин хасиятрал
миккун хъамал кIункIу бай.
ЦIуллушиву дулуннав,
ттуршра шинай итаннав,
Ххирасса Лакку кIанайн
ххираминнащал иллай.
ХIажиев МахIаммад
Имраннул арс,
ш. Ваччи
